ဒါ မြန်မာကွ

ဆောင်းပါးရှင် - ကိုညီညီ ( တောင်ကြီး )

.

.

ပထမတစ်ခေါက် လျောင်ကီး လာတုန်းက ဆန်ဖရန်လေဆိပ်မှာ အထုပ်တွေကို ဖောက်စစ်မခံရဘူး။ ပြည်ဝင်ခွင့်စာရွက်တွေစစ်တာ စောင့်ရတာပဲရှိတယ် အားလုံးအဆင်ပြေတယ်။ နောက်ပိုင်း မိတ်ဆွေတွေ ဒီလေဆိပ်ရောက်တော့ ကြာတာပဲရှိတယ် အဆင်ပြေကြပါတယ်။

.

.

အလုပ်မှာ မြန်မာတွေများတဲ့အခါ ပွဲလုပ်တိုင်း လက်ဘက်သုပ် ထည့်လေ့ရှိတယ်။ အစပ် နဲ့ ကြက်သွန်ဖြူ ပေါ်မူတည်ပြီး ဒီနိုင်ငံက ဘို တွေ စိတ်ကြိုက်ဖြစ်လာတာတွေ့ရတော့ “ ဒါ မြန်မာကွ ” လို့တောင် ကြွေးကြော်ချင်စိတ်ဖြစ်မိတယ်။ သူတို့စားနိုင်အောင် ကြက်သွန်ဖြူထည့်လို့မရဘူး။ ငြုပ်သီးစိမ်းတောင် ပါတယ်ဆိုရုံလေး၊ အငန်လည်း မကဲစေနဲ့၊ ဟင်းချိုမှုန့် MSG ပါတာလည်း မသိစေနဲ့၊ ခရမ်းချဉ်သီးလှီးတာ သန့်ပါစေ၊ ဂေါ်ဖီထုပ် က လတ်ဆတ်နေမှနော်၊ နှမ်းလဲမမေ့နဲ့ဦး။ တစ်ချို့တံဆိပ်က ပဲကြော်ထဲမှာ နှမ်းကို သီးသန့်ထည့်ပေးတဲ့အိတ်လေးပါတော့ အဆင်ပြေတယ်။ သုပ်ပြီးရင် သပ်သပ်ရပ်ရပ်လေး Foil လေးနဲ့အုပ်ထား။ လူစုံမှ ဖွင့်၊ သူတို့သိပ်ကြိုက်တာ။ ဘို အရမ်းများတဲ့ စားပွဲတွေဆို ဗန်း - Tray ရဲ့ ရှေ့မှာ မစပ်ဘူးဆိုတဲ့အကြောင်း Non-Spicy ဒါမှမဟုတ် Medium-Spicy လို့ စာတန်းလေးရေးချပေးထားရင် ယုံကြည်မှုရှိစွာ မြန်မာ့ရိုးရာအစားအသောက် “ လက်ဘက်သုပ် ”  ကို သူတို့စားနေတာကို ကြည်နူးစွာကြည့်ရင်း ထပ်ပြီးအော်မိပါတယ် .. “ ဒါ မြန်မာကွ ”

.

သူငယ်ချင်းလာမယ် ဘာသယ်ပေးရမလဲဆိုတော့ ကိုယ်လည်း အဆင်ပြေ သူလည်းလေယာဉ်လက်မှတ်ခ အတွက် အစိတ်အပိုင်းတစ်ခုလောက် ကျေအောင် လက်ဘက် နဲ့ ပဲကြော် ကယ်ရီ ( ၁ ) ထုပ်တင်ခိုင်းလိုက်တယ်။ အိမ်လည်းစား အမျိုးတွေလည်းပေး။ လိုသူရှိရင်လည်း ပြန်ရောင်းပေးလို့ရတာကိုး။ လေဆိပ်ရောက်လာပါပြီ။ သူ့အဝတ်အစားထုတ်ဖောက်စစ်ခံရတယ်၊ ပြန်ပိတ်ပေးတယ်၊ ဘာမှမဖြစ်ဘူး အားလုံးအိုခေ။ အဲ .. နောက်တစ်ထုတ်ဖောက်တော့ မြန်မာ့ရိက္ခာ လက်ဘက် နဲ့ ပဲကြော်တွေတွေ့သွားပြီ။ သူငယ်ချင်း က ကြောက်နေတယ်။ မလွတ်ကင်းရင် အရေးယူခံရမှာကိုး။ အနည်းဆုံးတော့ Passport မှာ တံဆိပ်တုံးထုပေးလိုက်ရင် နောက်တစ်ကြိမ် ပြည်ဝင်တဲ့အခါ အသေစစ်ပြီလေ၊ ဒါကို သူသိတယ်။

.

.

လေဆိပ်တာဝန်ရှိသူ အကောက်ခွန်အရာရှိက ဖွင့်ကြည့်ပြီးမေးတယ်။ ဒါဘာလဲ တဲ့။ သူငယ်ချင်းက မြန်မာပြည်ကသယ်လာတဲ့ Tea Leaf and Beans လို့ဖြေတယ်။ ဝန်ထမ်း က အထုပ်မှာ တံဆိပ်လိုက်ရှာတယ် .. တွေ့ပါပြီ .. ယုဇန တံဆိပ် နဲ့ ရည်မွန် လက်ဘက်ထုပ် နဲ့ အကြော်စုံ အထုပ်တွေ။ ပြီးတော့ တစ်ခွန်းပဲပြောတယ်၊ သွားလို့ရပါပြီ တဲ့။

.

.

သူငယ်ချင်းနား အထုပ်သယ်ပြီးတော့အလုပ်မှာ ဒီအကြောင်းပြောပြမိတယ်။ နားလည်သူတစ်ယောက်က ဟုတ်တယ် .. လက်ဖက်တွေဆို သူတို့မဖမ်းဘူး ။ အကြောင်းက သူတို့ ဘို တွေ လက်ဘက်သိပ်ကြိုက်တယ်။ သူတို့ဆီမှာရှိတဲ့ Green Tea နဲ့ လက်ဘက်သုပ်လို့မရဘူးလေ။ ဒီပစ္စည်းက ဗမာတွေသယ်တဲ့ အထုပ်တွေ ကနေလာတယ်ဆိုတာလည်း သူတို့သိတယ်။ နိုင်ငံအတွက် အန္တရာယ်မရှိဘူးဆိုတာ စစ်ပြီးတဲ့နောက်မှာ သူတို့ကို ဖြတ်ကျော်လာသမျှ လက်ဘက် နဲ့ ပဲကြော်တွေကို မျက်စိမှိတ်ပြီး ဖြတ်သန်းခွင့်ပြုခဲ့တာ လို့ ရှင်းပြမှ လျောင်ကီးလည်း နားလည်သွားရတယ်။ ဟုတ်တယ် ..  ကမ္ဘာက သိသွားတဲ့ “ ဒါ မြန်မာကွ ”

.

.

မင်္ဂလာဒုံလေဆိပ်မှာ မြင်သာမြင် မကြင်ရ ဖြစ်နေသူက လျောင်ကီးရယ်ပါ။ လာကြိုသူက မှန်ချပ်ကြီးရဲ့ ဟိုဘက်ခြမ်းမှာ ဒီမှာက ပစ္စည်းစစ်တဲ့နေရာက မလွတ်သေးဘူး။

.

.

လေဆိပ်တာဝန်ရှိသူ အကောက်ခွန်အရာရှိက အထုပ်ကို ဖွင့်ကြည့်ပြီးမေးတယ်။ ဒါဘာလဲ တဲ့။ လျောင်ကီး က အမေရိကားကသယ်လာတဲ့ Centrum အားဆေး လို့ဖြေတယ်။ ဝန်ထမ်း က ဗူးပေါ်မှာ တံဆိပ်လိုက်ရှာတယ် .. တွေ့ပါပြီ .. Centrum 365 လုံးပါတဲ့ ဗူးတွေ ။ ပြီးတော့ တစ်ခွန်းပဲပြောတယ်၊ ဒီနားလိုက်ခဲ့ တဲ့။ သွားပြီ ဒီအထုပ်လွတ်အောင် တစ်ခုခု လုပ်ရတော့မယ်။ တစ်လွဲမတွေးပါနဲ့၊ တောင်းတောင်းပန်ပန် ပြောရတော့မယ် ပြောတာပါ။ ရှက်ရှက်နဲ့ပဲ ထပ်အော်လိုက်ချင်တယ် .. “ ဒါ မြန်မာကွ ” လို့

.

koko2yeye@gmail.com