အာလူးကြော်လို ကြွပ်ကြွပ်ရွရွမဖြစ်တဲ့ဘဝ ( တိုးနီ အဋ္ဌမပိုင်း )

ဆောင်းပါးရှင် - ကိုညီညီ ( တောင်ကြီး )

.

.

မနက်စောကြီးလာခေါ်တော့ ပုံးအပြာကြီး ပြန်တွန်းလာပြီး ကျွန်တော်တို့လာခါစက အကျီထုတ်တွေကို ပြန်ရွေးယူခိုင်းတယ်။ လက်ရှိဝတ်ထားတဲ့ ထိန်းသိမ်ရေးစခန်းက အဝတ်အစားတွေကို ပြန်လဲခိုင်းတယ်။ သူတို့ပေးထားတဲ့ အဝတ်တွေကို အဲဒီပုံးထဲ ပြန်ထည့်ရမယ်တဲ့။ ကားပေါ်မတက်ခင်မှာ လက်ထိပ်ခတ်ပြန်တယ်။ အိပ်ချင်မူးတူးနဲ့ စိတ်ညစ်နေရတဲ့အထဲ လက်ထိပ်ခတ်ခံရတာ မြန်မာနိုင်ငံမှာဆို မင်္ဂလာမရှိတဲ့ မနက်ခင်းလေးလို့ပြောရမှာပေါ့။ သွားရမယ့်နောက်ထပ်တစ်နေရာက ကျွန်တော်တို့ဘဝကို အလှည့်အပြောင်းတစ်ခု လုပ်ပေးနိုင်မယ်ဆိုရင်တော့ လက်ထိပ်နဲ့လည်း မင်္ဂလာရှိပါတယ်လို့ အကောင်းဖက် လှည့်တွေးမိလိုက်ပါတယ်။

.

နောက်ထပ် ခပ်လေးလေး လှည်းတစ်စီးဝင်လာတော့ ကျွန်တော့အတွေးမျှင်စတွေ ပြတ်တောက်ကုန်တယ်။ စိတ်လည်း တော်တော်ညစ်သွားတယ်။ လှည်းပေါ်မှာ ခြေကျင်းဝတ်တွေ အများကြီးပါလား။ လူအားလုံးကို ခြေကျင်း နဲ့ လက်ထိပ်ကို ဘောက်ချိတ်နဲ့ တွဲခတ်လိုက်ကြတယ်။ အရာရှိတစ်ယောက် အားလုံးကိုရှင်းပြတာက “ အခုသွားမယ့်နေရာက ဝေးတယ်။ ကြားထဲမှာ မြို့ငယ်လေးတွေကို ဖြတ်သွားစရာရှိတယ်။ ထွက်ပြေးလို့မရအောင်လို့ ယာယီခတ်တာပါ။ စိတ်မပူကြပါနဲ့ ” လို့ အင်္ဂလိပ်လိုရော စပိန်စကားနဲ့ရော ကောင်းကောင်းမွန်မွန် ရှင်းပြပါတယ်။

.

.

ကျွန်တော်က ( ၄ ) ဂဏန်းနဲ့ တော်တော်အကျိုးပေးပုံ ရတယ်။ ကားပေါ်မှာ နေ့လည်စာ - Lunch ပေးတော့ အထဲမှာ ( ၄ ) မျိုး ပါနေတယ်။ ဆန်းဝှစ်တစ်ခု၊ လိမ္မော်သီးတစ်လုံး၊ ပန်းသီးဖျော်ရည်စက္ကူဗူးတစ်ဗူး နဲ့ Lay တံဆိပ် Classic အာလူးကြော်တစ်ထုပ်။ အခုနောက်ပိုင်း အဲဒီအာလူးကြော်ထုပ်ကိုတွေ့မိတိုင်း အတိတ်ဘဝကို မမေ့နိုင်ဘူး။ ပုံရိပ်တွေ ပြန်ပြန်ပေါ်လာတယ်။ စားရပုံလည်းကြည့်ဦး .. လက်နှစ်ဖက်က ခတ်ထားတော့ အာလူးကြော်ထုပ်ကို ကိုယ်တိုင်မဖောက်နိုင်ဘူး။ ဖောက်လို့ရတော့လည်း လက်နှိုက်စားလို့ မရပြန်ဘူး။ လက်ဖဝါးပေါ်မှာတင်ပြီးတော့ လူက အရှေ့ကို ကိုင်းပြီး စားရတယ်။ ပန်းသီးဖျော်ရည်ဆိုလည်း ကိုယ့်လက်နဲ့ကိုယ်အဖုံးမဖွင့်နိုင်ပြန်ဘူး။ သိပ်ခက်ခဲတဲ့ ဘဝပါ။

.

ပိုဆိုးတာက သွားရတဲ့ခရီးကရှည်တော့ ကားပေါ်မှာ အိမ်သာသွားရတဲ့ကိစ္စပဲ။ ယောက်ျားလေးပဲ ..  အပေါ့အပါးသွားတာ အဆင်ပြေအောင် စီစဉ်လို့ရပါသေးတယ်။ ခြေကျင်း နဲ့ လက်ထိပ်နဲ့ အိမ်သာထဲမှာ ဘယ်လိုလုပ် နောက်ဖေးသွားမှာလဲ။ အတွေးက ညနက်ထိအောင် မစောင့်နိုင်တော့ဘူး။ ခန္ဓာကိုယ်ကလည်း မနက်ထိအောင် တောင့်မထားနိုင်တော့ဘူး။ ဒါနဲ့ပဲ ကျွန်တော် တစ်လမ်းလုံးအိပ်ပျော်သွားတယ်။ လယ်ကွင်းရှည်တွေဖြတ်သွားရင်း ရောက်ခါနီးကတည်းက အဆောက်အဦကြီးတွေကို လှမ်းမြင်နေရတယ်။ ကုန်လှောင်ရုံအကြီးစားတွေကို လေးဖက်လေးတန် အုတ်နံရံကြီးတွေနဲ့ ထူထူထဲထဲ တံခါးဝမှာ အစောင့် ( ၂ ) ယောကက အသင့်စောင့်လို့။

.

.

အပေါက်ဝကနေ အထဲ အဆောင်ကြီးတွေအထိ ( ၁ ) မိုင်လောက် ဝေးတယ်။ တခါးကလွန်တော့ နောက်တံခါးတစ်ခုမရောက်ခင်မှာ ကားလုံခြုံရေးကို နောက်ဆုံးပေါ်နည်းပညာတွေနဲ့စစ်တယ်။ ရထားသံလမ်းလို တွင်းပါတဲ့နေရာပေါ်ကနေ ကားလှိမ့်သွားတာနဲ့ ဗုံးပါ မပါ စစ်ပြီးသားပဲ။ ဝင်ခဲ့ပြီးသားတံခါးပိတ်ကိုပိတ်လိုက်မှ နောက်ထပ်တံခါးတစ်ခုပွင့်လာတယ်။ ခန့်မှန်းကြည့်တာ ကားမောင်းပြေးလို့မရအောင် လုပ်ထားပုံပဲ။ ပြီးတော့ အားလုံးကို ကွန်ပျူတာနဲ့ထိန်းထားတာ လူဆိုလို့ လက်နက်မပါတဲ့ အစောင့်အနည်းငယ်ပဲရှိတာ။

.

ကျွန်တော်တို့တစ်တွေ တစ်ခုအတွေးပေါက်လာတယ်။ ကျွန်တော်တို့မှာ ပါ့စပို့မရှိဘူး။ နိုင်ငံအပြင်ဘက်ထွက်နိုင်တဲ့ ဘာစာရွက်စာတမ်းမှမရှိဘူး။ ဒီအချိန်မှာ တစ်ခုခုလုပ်မယ်ဆိုရင် လက်စဖျောက်လို့အလွယ်ဆုံးလေ။ ပြောလို့မရဘူး ..ကျွန်တော်တို့က တိုင်းတစ်ပါးသား။ တစ်ခုခုစမ်းသပ်ထားပြီး ကျွန်တော်တို့ကို လူသားဒိုင်း လုပ်မယ်ဆိုရင် ဘယ်လိုလုပ်မလဲလို့ ဆိုပြီး စိတ်မတင်မကျ ခဏခဏဖြစ်တယ်။

.

.

ကားပေါ်ကဆင်းတော့လက်ထိပ် နဲ့ ခြေကျင်းတွေဖြုတ်ပေးပြီး ကျည်ကာမှန်လိုအခန်းထဲကို သွင်းလိုက်ကြတယ်။ ပတ်ပတ်လည် ကင်မရာတွေနဲ့ အစောင့် ( ၅ ) ယောက်လောက်က မျက်လုံးဒေါက်ထောက်ကြည့်နေတယ်။ အဝတ်လဲဖို့ ထပ်ခိုင်းပြန်တယ်။ Hall ခန်းအလယ်မှာ TV တစ်လုံးကနေ အခုရောက်နေတဲ့ ထိန်းသိမ်းရေးစခန်း - Detention Center ရဲ့ သိကောင်းစရာတွေကို အင်္ဂလိပ်လိုလွှင့်ပေးနေတယ်။

.

ခေါင်းဆောင်သူငယ်ချင်းက သွားနားထောင်ပြီး “ ဒီစင်တာဟာ ခင်များတို့ရဲ့နောက်ဆုံးစင်တာပဲ။ ဒီနေရာကနေ ခင်များတို့ဘဝကို အဆုံးအဖြတ်ပေးလိမ့်မယ်။ ဒီတို့ခင်များတို့ကို ပြန်တော်ပြန်ပို့မလား? ဒီနိုင်ငံမှာ အခြေချခွင့်ရမလား? ဒါကိုတော့ တရားသူကြီး - Judge ရဲ့ အလုပ်ပဲ ” ဆိုတာကို ပြန်ပြောပြတယ်။

.

.

ဒီစင်တာမှာဝတ်ရတဲ့ အကျီအရောင်တွေကို ရှင်းပြပါဦးမယ်။ အပြာ က သာမန်လူ နဲ့ အများစုဝတ်တာ။

.

လိမ္မော်ရောင် က ပြစ်မှုရှိသူတွေဝတ်တာ။ နောက်တစ်မျိုး Illegal တရားမဝင်ရောက်လာသူတွေကိုလည်း လိမ္မော်ရောင်ကိုပဲ ဝတ်ခိုင်းတယ်။ သူတို့က ပြစ်မှုရှိတယ် ဒါပေမယ့် နိုင်ငံသားမဟုတ်ဘူး။ သူတို့ကို Deportation လုပ်ပြီး ပြန်ပို့ကြလိမ့်မယ်။

.

ရာဇဝတ်ရှိသူ၊ မူးယစ်ဆေးဝါးရောင်းဝယ်သူ၊ လက်နက်ရောင်းသူ၊ ဖောက်ခွဲရေးနဲ့ပတ်သက်ပြီး မင်္သကာသူ၊ Green Card ရှိသော်ငြားလည်း အိုဗာစတေး ပါ့စပို့ကို “ အို  ” လိုက်သူ စတဲ့ အန္တရာယ်များတဲ့ ခပ်ကြမ်းကြမ်းသမားတွေကို အနီရောင် ဝတ်ခိုင်းတယ်။

.

.

လောကဓံအကြောင်း ကျွန်တော်ပြောပြမယ်ဗျာ။ ခန်းမအကျယ်ကြီးကနေ အထုပ်လေးတွေကိုယ်စီဆွဲပြီးထွက်လာတာ လူအယောက် ( ၂ဝ ) လောက်ရှိတယ်။ သူတို့မျက်နှာမှာ ပျော်လို့ ပြုံးလို့။ သူတို့ကြည့်ရတာ အခုမှ ထောင်က လွတ်လာသလိုမျိုး။ ဘာကြောင့် ဒီလိုပျော်နေကြလဲ မေးလို့လည်း မရဘူး။ သာမန်တော့မဟုတ်တာ သေချာတယ်။ နောက်ထပ် ( ၁ ) နာရီခွဲလောက်ကြာတော့ နောက်ထပ်တစ်သုတ် ထွက်လာပြန်ရော။ လက်ထိပ်တွေကိုယ်စီနဲ့ သူတို့ဒီဇိုင်းက နောက်တစ်မျိုး။

.

နောက်မှ ပြန်သိရတာက ပထမအုပ်စုက Passed ဖြစ်သွားလို့ အမေရိကားမှာ နေထိုင်ခွင့်ကျလာတဲ့သူတွေလေ .. ပျော်ကြမှာပေါ့။ ဒီအတွက်ပဲ ဒုက္ခခံခဲ့ကြတာ မဟုတ်လား။ တစ်ချို့များကျပြန်တော့ ခံဝန်တွေ၊ Bond တွေ၊ အာမခံတွေ ထိုးထားရတယ်။ ဒါပေမယ့် လွတ်လွတ်လပ်လပ်နေခွင့်ရတယ်လေ .. ပြစ်မှုတော့မကျူးလွန်နဲ့ပေါ့ .. ဒါဆို ပြီးပြီ။

.

ဒုတိယအုပ်စုက အယောက် ( ၁ဝဝ ) လောက်ရှိမယ်။ ကံမကောင်းရှာသူတွေကို ပြန်ပို့ဖို့ ထုတ်လာကြတာ။ ပို့ပုံ ပို့နည်းကလည်း တစ်မျိုးဗျ။ သူတို့ကို ( ၁ဝ ) ယောက်တန်သည် ( ၂ဝ ) တန်သည် ကုန်တင်လေယာဉ်နဲ့ တင်လွှတ်လိုက်ကြတယ်။ Transit အတွင်း မက္ကဆီကို နဲ့ တစ်ခြားနိုင်ငံတွေမှာ ကုန်ချရင်း ဒေသခံ လဝက အရာရှိတွေဆီ ပြန်အပ်ဖို့ ချခဲ့လိုက်တာပဲ။ အထူးသဖြင့် လက်တင်အမေရိကနိုင်ငံတွေဖြစ်တဲ့ ဟွန်ဒူးရပ်၊ ဆာဗားဒိုး၊ ဘရာဇီး၊ ပီရူး နဲ့ အာဂျင်တီးနား တို့တစ်တွေက စပိန်စကားပြော ပဲစားတွေအများကြီးပဲ။ တစ်ခါတစ်လေဆို တရုတ်တွေပါ ပါတယ်။

.

.

ကံဆိုတာကလည်း လူလုပ်တဲ့ကံရှိတယ် .. သူ့ဖာသာသူလာတဲ့ ကံရှိတယ်။ လူတွေရဲ့ ကံကြမ္မာဟာ ဒီကံ ( ၂ ) မျိုးထဲက တစ်မျိုးမျိုးနဲ့ပတ်သက်နေတယ်။ ကျွန်တော်တို့က မြန်မာနိုင်ငံမှာ မနေနိုင် မစားနိုင်လို့မဟုတ်ဘူး။ ပြောရမယ်ဆိုရင် ကျွန်တော်တို့အားလုံး အတော်ချောင်လည်တဲ့မိသားစုထဲမှာပါတယ်။ ကိုယ့်ဘဝတစ်ခု အလှည့်အပြောင်းဖြစ်မလားဆိုပြီး ဒီအမေရိကားခရီးကို အလဲအထပ်ရိုက်လိုက်တာပဲ။

.

.

တစ်ဆက်တည်း မနားတမ်း ပြောလာလိုက်တဲ့ “ တိုးနီ ” ဟာ လူရိပ်လူကဲကြည့်ပြီး စကားကို ခဏနားလိုက်ပါတယ်။ သူ့ရပ်လိုက်တဲ့စကားနောက်ကွယ်မှာ မေးခွန်းတွေ တစ်သီကြီးထွက်လာတယ်။ ကျွန်တော် သူ့ကိုမေးချင်တာတွေရှိတယ်။ “ တိုးနီ ” ဟာ ဒီဘဝကို ဘယ်လောက်ရင်းလို့ ဘယ်လောက်ပြန်ရလိုက်သလဲဆိုတာ ကျွန်တော် ဥာဏ်မမှီစွာ တွက်ကြည့်နေမိပါတယ်။

.

koko2yeye@gmail.com