တရုတ်ကိုရှောင်း ပြောပြတာ ( တိုးနီ တေရသပိုင်း ) ၁၃။

ဆောင်းပါးရှင် - ကိုညီညီ ( တောင်ကြီး )

.

.

စိတ်ညစ်တယ်။ ကျွန်တော်ဒီနေ့တစ်ကယ် စိတ်ညစ်တယ်။ ဒီနေ့ဆိုတာ အခုဒီနေ့ကိုပြောတာမဟုတ်ဘူး။ အဲဒီတုန်းက ဒီနေ့ကိုပြောတာ။ Kitchen ကနေ အလုပ်ထွက်ပြီး ပေပေတေတေ နေလာတာလည်း ( ၁​) ပတ် ပြည့်နေပြီ။ ဘာမှလုပ်ချင်ကိုင်ချင်စိတ်ကို မရှိဘူး။ စဉ်းစားကြည့်လေ .. ရောက်ခါစ စခန်းမှာ ဘာမသိ ညာမသိက ( ၁ ) လ။ ရှေ့နေငှားပြီးလို့ တရားသူကြီး ဖြူသလား မဲသလား သွားကြည့်ဖို့ စောင့်ရတာ ( ၂ ) လ .. စုစုပေါင်း သောင်တင်နေတာ ( ၃ ) လ ရှိပြီ။ ရုံးချိန်းရှိတယ်ဆိုတော့ ငါတော့ ထွက်ရတော့မယ်ဆိုပြီး အားတင်း မာန်တင်း ခွန်အားအပြည့်နဲ့ ဒုတိယမြောက် ရုံးချိန်းသွားလိုက်ပါတယ် .. စကားပြန်မလာဘူးတဲ့ဗျာ .. ကြည့်ပါဦး .. ဘဝက ဆိုးချက်။

.

.

စကားပြန်က တရားသူကြီးဖက်မှာ ထိုင်ပြီး ကျွန်တေ်ာ နဲ့ တရားသူကြီးပြောတာကို ဘာသာပြန်ပေးတာ။ သူမရှိတော့ တရားသူကြီး နဲ့ ဆက်သွယ်လို့မရတော့ဘူးပေါ့။ ဒါပေမယ့် ပညာရှင်ပီပီ တရားသူကြီးက “ မစ္စတာ တိုးနီ .. ကျွန်တော်စိတ်မကောင်းပါဘူး။ ဒီနေ့မှ စကားပြန်မလာဘူး ဖြစ်နေတယ်။ ဒီအမှုတွဲကို ကျွန်တော်အင်မတန် စိတ်ဝင်စားတာလည်း ခင်များအသိပါပဲ။ ဒါကြောင့် အတတ်နိုင်ဆုံး အနီးကပ်ဆုံး ရက်ချိန်း ကျွန်တေ်ာကြည့်ပေးမယ်။ ခက်တာက ကျွန်တော့် အချိန်ဇယားကလည်း တော်တော်ကြပ်နေတယ်။ နောက် ( ၃ ) လ ထပ်တွေ့မယ် ” တဲ့။ ကဲ .. သွားပြန်ပြီ နောက်ထပ် ( ၃ ) လ။ ဒီအချိန်တွေမှာ ကျွန်တော် ဘာလုပ်နေရမှာလဲ? မှောက်အိပ်ပြီး စောင့်နေရမလား? ကင်းမြီးကောက်ထောင်ပြီး တိုင်နဲ့ခေါင်းနဲ့ရိုက်နေရမှာလား? တရားသူကြီးက ကျွန်တော့ထွက်ချက် မယူရသေးပဲနဲ့ ဘာမှကို ဆက်လုပ်လို့ မရဘူးလေ။

.

ကောင်းတဲ့သူငယ်ချင်းတွေဆိုတာ ခဏလေးဆုံပေမယ့်လည်း အားပေးတတ်ကြတယ်။ ကျွန်တော့ကို အားလုံးက ဝိုင်းနားချကြတယ်။ အခုမင်းကြုံရသလို ငါတို့လည်း ဒီအခက်အခဲကို ဖြတ်ကျော်ရဦးမှာပဲ .. သေချာတယ်။ ငါတို့အလှည့်ကျရင်သာ စကားပြန်လာပါစေလို့ ကြိုဆုတောင်းပါတယ် လို့ အားပေးကြတယ်။ ဖေးမကြတယ်။ စိတ်ဖြေပေးကြပါတယ်။

.

.

ဘဝ ရဲ့ အလှည့်အပြောင်းကောင်းနဲ့တော့ မကြုံရပဲ အခန်း အရွှေ့အပြောင်းနဲ့ ပါသွားသူက တိုးနီ ပါ။ တစ်ခြားအခန်းတစ်ခုကိုရောက်တဲ့အခါ မြန်မာဦးလေးတစ်ယောက် နဲ့ ဆုံရပြန်တယ်။ ကြိုပြောထားတာနော် .. တိုးနီ လျှောက်ပြောတာ မဟုတ်ဘူး။ အဖြစ်အပျက်တွေကသာ ကိုယ့်ရှေ့ ရောက်ရောက်လာတာ။ အမေရိကန်မြေဆိုတာ သိပ်ထူးဆန်းတယ်။ မမြင်ဖူးတာတွေ မြင်ရတယ်။ မတွေ့ဖူးတာတွေ တွေ့ရတယ်။ အခုအဖြစ်အပျက်က တစ်မျိုးတစ်ဘာသာ။

.

သူ့နာမည် ကိုရှောင်း လို့ခေါ်တယ်။ ရန်ကုန်တရုတ်တန်းက တရုတ်-မြန်မာ။ တရုတ်စကားတတ်တယ်။ နှုတ်ဆက်စကားပြောကြရင်း ကျွန်တော့အဖြစ်အပျက်ကိုကြားတော့ သူက ပထမရုံးချိန်းပြီးသွားပြီ။ နောက်တစ်ခေါက်ကျရင် စကားပြန်လာပါစေလို့ ဆုတောင်းရဦးမယ်ဆိုပြီး ရေရွက်နေပါတယ်။ ဒီအခန်းမှာ တရုတ်တွေက အများကြီး။ ကုတင်ဘေးမှာက တရုတ်တွေနဲ့လည်း တရုတ်လိုပြောတယ်။ ရင်းလည်း ရင်းနှီးတယ်။ တရုတ်တွေအကြောင်း ကြားရတော့ ကျွန်တော့အဖြစ်အပျက်က ဘာဟုတ်သေးလို့လဲ။ သူပြောပြတာကိုလည်း နားထောင်ကြည့်ကြပါဦး။

.

.

တရုတ်တွေက သနားဖို့ကောင်းတယ်။ အင်္ဂလိပ်စကားကို နားမလည်ကြဘူး။ ( ၁ဝ ) ယောက်မှာ အင်္ဂလိပ်စာတတ်တာ အလွန်ဆုံးပါရင် ( ၁ ) ယောက်ပေါ့။ ဒါတောင် ထစ်အ ထစ်အ နဲ့ မနည်းကို နားထောင်ယူရတာ။ ငါတို့ထက် အဆပေါင်းများစွာ ဆိုးတာပေါ့။ ငါတို့ကမှ အမေရိကားကို လေယာဉ်နဲ့ အခန့်သား လာရသေးတယ်။ သူတို့က သဘောင်္ နဲ့ လာတာ။

.

သဘောင်္တောင် ရိုးရိုးသဘောင်္မဟုတ်ဘူး ကုန်တင်ကာဂိုကြီးတွေ။ သူတို့လာပုံ လာနည်း မင်းကြားရင် ဖျားသွားမယ်။ ကွန်တိန်နာတွေတင်တဲ့ သဘောင်္မှာ အလယ်ပိုင်းကျတဲ့အလုံးတွေထဲမှာ တရုတ်တွေ စီးလာတာပေါ့ကွာ။ သူတို့က လယ်တွေ၊ ယာတွေ ရောင်းပြီးလာတာ။ ဟိုမှာ ဘာမှကို မကျန်ခဲ့ဘူး .. အပြောင်ပဲ။

.

.

ကွန်တိန်နာတစ်လုံးရဲ့ ထိပ်ပိတ် နောက်ပိတ်ကို ဟန်ပြပစ္စည်းတွေနဲ့ ကာပြီး အလယ်မှာ လူတင်လာတာလေ။ သတင်းတွေထဲမှာ ကြားဖူးတယ်မဟုတ်လား။ အခု ဒီလူတွေ စီးလာတာ ..။ အလုံပိတ်ကွန်တိန်နာထဲမှာ လေပေါက်သေးသေးလေး ( ၄ ) ပေါက်ပဲ ရှိတယ်။ လေစုတ်ပန်ကာဆိုတာ ဝေလာ ဝေးရော။ လေပေါက်ကို ကြီးအောင်ဖေါက်မပေးထားတာ အကြောင်းရှိတယ်။ တရုတ်ရဲတွေက သဘောင်္ပေါ်တက်ရင် အနံ့ခံခွေးတွေ ပါလာတယ်။ ဒီကောင်တွေက နှာခေါင်း အရမ်းကောင်းတာ။ အပေါက်ကျယ်လို့ လူနံ့ရသွားရင် အားလုံး ကိစ္စချောပြီပေါ့ကွာ။

.

တစ်ချို့စစ်ဆေးရေးအဖွဲ့တွေက ကွန်တိန်နာဖွင့်စစ်တဲ့အခါကျရင် အထဲအထိနှိုက်ပြီး မစစ်နိုင်ဘူး။ သေချာစစ်သူတွေ စစ်တယ်ပဲ ထားပါဦး .. ဒီလူအုပ်စုကို ရှာမတွေ့တဲ့နေရာကို သူတို့သိတယ်။ ဆိုလိုတာက လုပ်စားနေကျဆိုတော့ ကျွမ်းတာပေါ့။ ရှာဖို့ပိုခက်အောင် လူပါတဲ့ကွန်တိန်နာကို ရှေ့နောက်ပိတ်ပြီး ကြားညှပ်ထားလိုက်တယ် .. အေးရော။ ရှာလေ မင်းကြိုက်သလောက်ရှာ အထဲမှာလူပါတယ်လို့ ဘယ်သိနိုင်မလဲ?

.

.

လူတွေ မွန်းကြပ်ပြီး မသေကုန်ဘူးလားလို့ မင်းမေးချင်နေတယ်မဟုတ်လား? သေတာပေါ့ ဟကောင်ရ။ သေလည်း ဘာတတ်နိုင်မှာလဲ။ မနက်စောတစ်ခေါက်ပဲ နေမြင်ရတယ်။ ကျန်တဲ့အချိန်အကုန်လုံး အမှောင်အတိပဲ။ တစ်ချို့ မိသားစု အုပ်လိုက်လာတာရှိတယ်။ အဲဒီထဲမှာ အဖေသေတဲ့မိသားစုရှိတယ်။ အမေသေတဲ့မိသားစုရှိတယ်။ သေလည်း ထွက်လို့မှမရတာ လူသေတွေနဲ့ အတူလိုက်ပဲ။ မလိုက်လို့လည်း မရဘူးလေ။ အစားကျွေးတာ အရမ်းမိုက်တယ်။ အဲဒီလေရှူပေါက်ထဲကနေ ပေါက်စီတွေ ပစ်ချပေးတာ။ အကုန်လုံးဆန့်ရင် ကွန်တိန်နာတစ်လုံးကို လူ ( ၄ဝ ) လောက်ဆံ့မယ်။ တစ်ချို့သဘောင်္တွေဆို ကမ်းကပ်လို့ တံခါးလည်းဖွင့်လိုက်ရောက် အသက်ပါပြီးထွက်လာသူ ( ၁ဝ ) ယောက်လောက်ပဲ ရှိတော့တယ်။

.

ဒီကုန်သေတ္တာတွေကို သဘောင်္ပေါ်မှာ စောင့်ပြီးလိုက်တဲ့ အဖွဲ့ရှိတယ်။ တစ်ကယ်တော့ ဒီအလုပ်က သာမန်လူ မလုပ်နိုင်ဘူးကွ။ ဂိုဏ်းဆိုတာတောင် ဂိုဏ်းအကြီးကြီး။ လူတွေ အများကြီး ပါဝင်ပတ်သက်တယ်။ ကွန်တိန်နာထဲကလူတွေက အသံတောင် မထွက်ရဘူး။ တစ်ခုခုဆို အပြင်က စောင့်နေတဲ့သူက သံနံရံကို လာခေါက်တယ် .. တိတ်တိတ်နေကြတဲ့။ စစ်ဆေးရေးအဖွဲ့တွေလာရင် အချက်ပြတယ်။ မင်းတို့အသံထွက်လို့ မိသွားရင် ကိုယ့်ထိုက်နဲ့ ကိုယ့်ကံပဲလို့ ခြိမ်းခြောက်တာလည်း ခံရသေးတယ်။

.

.

သူတို့က ( ၁၅ ) ရက် ဒါမှမဟုတ် အကြာဆုံးဆို ( ၁ ) လလောက် ပင်လယ်ထဲမှာ စီးလာရတာ။ တရုတ်ပြည်ဆိပ်ကမ်းကနေထွက်ပြီး အမေရိကားကို ဒါရိုက်ဝင်တယ်လို့များ မထင်နဲ့။ အမေရိကန်ရေပိုင်နက်က ပန်ကာဝင်ခုတ်လို့မရဘူး .. အရမ်းတင်းကြပ်တာ။ သဘောင်္က မက္ကဆီကို ကို ကပ်တာနဲ့ အသက်ရှင်သေးတဲ့လူတွေ ( ၁ဝ ) ယောက်တစ်သုတ်၊ ( ၁၅ ) ယောက်တစ်သုတ်ကို နယ်စပ် တန်းပို့တာလေ။ လူတွေဆိုတာ အဲဒီအချိန်ကျမှ အသက်ရှုခွင့်ရကြတာပေါ့။

.

ဒါ တစ်ကယ်တန်းပြောရင် လူကုန်ကူးတာပဲ။ ကူးတာမှ တစ်ကယ့်ကို အချီကြီးကြီး ကူးတာ။ ဒီဂိုဏ်းတွေက ငွေရှိတယ်။ ဘာလိုချင်လဲပြော အကုန်ရစေရမယ်။ လူပါ ရမယ်ဆိုမှတော့ ကျန်တာ ဘာလိုသေးလဲကွာ။ ဒီဂိုဏ်းသားတွေ သူဋ္ဌေးဘယ်သူဆိုတာ မမြင်ဖူးကြဘူး။ အမှန် သူတို့ရဲ့ရုံးချုပ်က နယူးယောက်မှာ ရှိတာကွ။

.

ဆင်းရဲပါတယ်ဆိုမှ ဒုက္ခပင်လယ်ဝေတယ် ဆိုတာ အဲဒါကိုပြောတာပေါ့။ နိုင်ငံတကာတိုက်ဖျက်နေတယ်သာဆိုတယ် ဆင်းရဲတော့ အမြစ်မပြတ်နိုင်ဘူး။ တစ်ချို့ဆို လယ်ပဲရှိတယ်။ ဂိုဏ်းက လယ်ကိုသိမ်းလိုက်တယ် .. လူကို အမေရိကန်ပို့ပေးတယ် .. ဘယ်လောက်ကောင်းတဲ့ အပေးအယူလဲ? ယွမ်ငွေရသူတွေကလည်း ထောင်ပိုင်းပဲ။ ဈေးကလည်း နှိမ်သေးတယ်။ နောက်တစ်မျိုးကျတော့ လူကိုယ်တိုင်ကကို သွားချင်လို့ ဂိုဏ်းကို မရှိရှိ ရှာပြီးဆက်သွယ်ပြီးလာတာ။ တစ်ကိုယ်ရေသမားဆို မင်းမိသားစုကိုပေးဖို့ ယွမ် ( ၅ဝဝဝ ) ယူဆိုပြီး တစ်ခွန်းထဲနဲ့တင် အမေရိကန်သွားမယ့် သဘောင်္ပေါ် တင်လွှတ်လိုက်တာ။

.

.

နယူးယောက်က စားသောက်ဆိုင်တွေမှာ လူအင်အားလိုအပ်ချက်ရှိတယ်။ ဒါက ဒီဂိုဏ်းသားတွေအတွက် ဈေးကွက်ပဲ။ ဥပမာ - မင်းက စားသောက်ဆိုင်မှာ လူဘယ်နှစ်ယောက်လိုချင်လဲ တစ်ခွန်းသာပြောလိုက် နောက်နေ့သူတို့ပို့ပေးမယ်။ ရောက်လာတဲ့ တရုတ်တွေကလည်း အူလည်အူလည်နဲ့ ဒါက အရေးမကြီးဘူး။ တစ်ခါဆက်ဆံ ပြန်လို့မရတော့ဘူးသာ မှတ်လိုက်ပေတော့။ တစ်ချို့ လူကုန်ကူးခံရသူတွေက ဒါကို သိသိကြီးနဲ့ အမေရိကားမှာ ဒုက္ခခံရတာက တရုတ်ပြည်ထက်တော်သေးတယ်ဆိုပြီး လာတာ။ မင်းဘယ်လိုတားမလဲ? ဘယ်လို တိုက်ဖျက်မလဲ?

.

တော်တော်များများက ဒီစခန်းထဲရောက်ပြီးသွားရင် အပြင်ထွက်ရဖို့အရေး တာစူနေတော့တာ။ သူတို့က ငွေစကား မပြောဘူး။ ကာယကံရှင်က မင်းတို့ ငါတို့လို ဘာမှလုပ်စရာမလိုဘူးနော်။ အပြင်ကနေ ကြိုးကိုင်နေသူ သပ်သပ်ရှိတယ်။ သူတို့ကျတော့ အမှုကို အထဲမှာ မရင်ဆိုင်ဘူး။ ဘာလို့လည်းဆိုတော့ သူတို့အမှုက မခိုင်တာများတယ်။ ဒါကြောင့် Bond နဲ့ အပြင်ထွက်တယ်။ အပြင်မှာ အချိန်ဆွဲနိုင်သမျှဆွဲပြီး ရင်ဆိုင်တယ်။

.

ဂိုဏ်းချုပ်ကြီးက ဒီကိစ္စအတွက်ကို ငှားပေးထားတဲ့ ရှေ့နေ ( ၃ ) ယောက် ရှိတယ်။ တက္ကဆက်ပြည်နယ် ဒီအနီအနားမှာ အိမ်ဝယ်ပေးထားတယ်။ သွားစားရိတ် လာစားရိတ် အကုန်ငြိမ်း .. အေးအေးဆေးဆေးပဲ။ တစ်ခြားအမှုလည်း လက်မခံဘူး။ အရမ်းတော်တယ်လို့ ပြောကြတယ်။ စစ်ဆင်ရေးရှိတယ်နော် .. ရှောင်တယ် ပြေးတယ်။ မလွတ်ရင် တစ်ယောက်တစ်လေ အဖမ်းခံတယ်။ ပြီးရင် အဲဒီလူကို ငွေနဲ့ ပြန်ထုတ်တယ် .. ဘယ်လောက်ပိုင်တဲ့သူတွေလဲ?

.

.

အထဲက တရုတ် ( ၁ ) ယောက် အပြင်ရောက်ဖို့ တရားသူကြီးရဲ့ ဆုံးဖြတ်ချက်နဲ့ ဆိုင်တယ်။ လာဘ်ထိုးရတာကို ပြောတာမဟုတ်ဘူး။ အမှုရုံးချိန်းကျရင် အပြင်ထွက်ဖို့ Bond တောင်းတဲ့အခါ .. ငါပြောပြမယ် .. တရားသူကြီးကလည်း သိတယ်ကွ .. ဒီကောင်တွေ အဖွဲ့နဲ့ဆိုတာ။ အဲဒီတော့ မပေးနိုင်အောင်ဆိုပြီး ဒေါ်လာ ( ၁၅ဝဝဝ ) တောင်းတယ် ဆိုပါတော့။ တရုတ်တစ်ယောက်ကို ရွေးထုတ်သွားတယ်။ နောက်တစ်ယောက်ကျတော့ တရားသူကြီးက Bond ကို တိုးတောင်းတယ် .. ( ၂ဝဝဝဝ ) ပေါ့ကွာ။ ဟာ … နောက်တစ်ယောက်လည်း ထွက်သွားပြန်ပြီ။

.

သူတို့ပြောတာ ဘယ်လောက်မိုက်လည်းဆိုရင် ဒေါ်လာ ( ၁ ) သိန်း တောင်းလည်း ငွေပေါင်တင်ပြီး ထုတ်မှာပဲတဲ့။ အမှုကျသွားရင်တော့ မင်းတို့ထိုက်နဲ့ မင်းတို့ကံ တဲ့လေ။ ငွေကို လုံးဝကို မနှမြောတာ။ ဒါဆို မင်းစဉ်းစားကြည့်။ တရုတ်တစ်ယောက် နယူးယောက်မှာ ဘယ်လောက်ဈေးပေါက်သလဲဆိုတာ။ သူတို့အတွက် ငွေ သောင်းဂဏန်းက ခဏလေး ရှာလို့ရနေတာလေကွာ။ ဒါကြောင့် ဒီနားက တရုတ်တွေက မကြာခဏပြောတယ်။ တရားသူကြီးပါးစပ်ကသာ ငွေတောင်းပါစေ .. ဈေးမချိန်ဘူး .. ပျော်ဖို့သာပြင်ထား .. သူတို့လွတ်မြောက်ပြီ တဲ့..။

.

.

ဒါနဲ့ ကျွန်တော်လည်း စိတ်ညစ်တွေ ပြေသွားပြီး သိပ်မရှင်းတာ တစ်ခုကျန်နေလို့ မေးလိုက်တယ်။ “ ကိုရှောင်း .. သူတို့က အင်္ဂလိပ်စကားမတတ်ပဲ ဘယ်လိုလုပ်အမေရိကားလာမှာလဲ ” လို့။

.

ကိုရှောင်းက ပြန်ဖြေတယ် “ အေး မင်းသူတို့ကို သွားမေးရင် အရိုက်ခံနေရဦးမယ်။ အင်္ဂလိပ်စာတတ်ဖို့မလိုဘူး .. နယူးယောက်မှာ တရုတ်တန်း ရှိတယ်တဲ့။ ဒါ .. သူတို့ပြောတာ .. ကျေနပ်ပြီလား?”

.

.

ဒါကြောင့် ကျွန်တော်ပြောတာပေါ့။ ကျွန်တော် လျှာရှည်တာမဟုတ်ပါဘူး ကိုရှောင်း ပြောတာပါလို့။

.

ဆက်ပါဦးမယ်

.

koko2yeye@gmail.com