ခရီးဆက်မယ့် ( ၂ ) ဂါလံ

ဆောင်းပါးရှင် - ကိုညီညီ ( တောင်ကြီး )

.

.

ကျွန်တော့အမျိုးသမီးကားကို ဆီထည့်ဖို့ ဆီပန့်ကို ကိုင်ထားနေတုန်း လူတစ်ယောက်အနီးကပ်လာပြီး “ ကျွန်တော့ကားဆီပြတ်သွားလို့ ငွေအကြွေတစ်ချို့ရနိုင်မလား ” လို့ လာပြောလို့ ရုတ်တရက် ကျွန်တော်လန့်သွားတယ်။

.

လာတဲ့လူပုံစံက ကပ္ပလီအကြေကောက် ဆံပင်အပွကြီးနဲ့ ကျွတ်ကျတော့မယ့်ဂျင်းဘောင်းဘီကို လက်နဲ့ကိုင်ပြီးလမ်းလျှောက်တဲ့ Sagging ပုံစံ မက္ကစီကန်လူမျိုးလူငယ်တစ်ယောက်။ သူ့ကားက အရှေ့ဆီပန့်နားမှာရပ်ထားတာ မြန်မာနိုင်ငံက ဆူပါစလွန်းအလုံး ( ၁၉၉ဝ ) မော်ဒယ်လို့ ထင်ရတယ်။ အရှေ့ညာဘက်မီးခွက်မရှိတဲ့ကားဟာ အရောင်အသွေးမွဲခြောက်ပြီး ပိန်တဲ့နေရာကပိန် ချိုင့်တဲ့နေရာကချိုင့် နဲ့ အပေါ်ဆီဆေးတွေလည်း ကွာစပြုနေပါတယ်။

.

.

မတ်တပ်ဆီပန့် ( ၂ ) ခုကြားက ဘွားကနဲထွက်လာတဲ့ လူပုံစံကို မြင်မြင်ချင်း သူဘာပြောတာလဲဆိုတာ ချက်ချင်း နားမလည်ခဲ့ဘူး။ စက္ကန့်ပိုင်းလောက်ကြာမှ သူငွေလာတောင်းတာကို သိလိုက်တယ်။ ဖြစ်ချင်တော့ ထည့်နေကျမဟုတ်တဲ့ ဒီဆီပန့်က ငွေစက္ကူ - Cash ပေးရတာဆိုတော့ ကျွန်တော့ပိုက်ဆံအိတ်ထဲမှာ ဒေါ်လာ ( ၃ဝ ) လောက်တော့ ရှိလိမ့်မယ်။ ကောင်တာမှာငွေရှင်းပြီး ကားဆီထည့်ဖို့ စက်ခလုပ်ကိုနှိပ်လိုက်တဲ့အချိန် ခေါင်းမှာ ဆံပင်အထုတ်လိုက်ကြီးနဲ့ အကျီင်္အမည်းဝတ်ထားတဲ့ လူတစ်ယောက်က ကိုယ့်နားကပ်လာတယ်ဆိုကတည်းက သူဘာပြောပြော ကျွန်တော်ကတော့ နားလည်လည် မလည်လည် “ No ” တစ်လုံးပဲ ပြောလွှတ်လိုက်မိတယ်။

.

သူက ယဉ်ယဉ်ကျေးကျေးပဲ “ ရပါတယ်ဗျာ။ ကျေးဇူးတင်ပါတယ် ” ဆိုပြီး သူ့ကားစုတ်ကလေးပေါ်ပြန်တက်သွားတယ်။ ဒါပေမယ့် ကားတံခါးမပိတ်ပဲ သီချင်းသံအကျယ်ကြီး ဖွင့်ထားတယ်။ ကျွန်တော်က ဆီထည့်ပြီးနေပြီ။ ကားပေါ်ပြန်တက်ရင်း ဘေးခုံမှာတင်ထားတဲ့ ပိုက်ဆံအိတ်လေးကိုမြင်တော့ စဉ်းစားကြည့်တယ်။ သူတစ်ကယ် ငွေပြတ်သွားလို့ ဆီထည့်ဖို့ ဒုက္ခရောက်နေတာများလား?

.

ဒရိုင်ဘာနေရာမှာ ထိုင်လိုက်ရင်း ကျွန်တော့်ကားကို စက်မနှိုးသေးပဲ သူဘာလုပ်နေတယ်ဆိုတာကို ကြည့်နေမိတယ်။ အဲဒီလူက စိတ်ညစ်ညစ်နဲ့ ကားရေဒီယိုကို အသားကုန်ဖွင့်ပြီး စိတ်ထွက်ပေါက်ပေးနေပုံရတယ်။ သူ့ကားက ဒီဆီပန့်က ဓါတ်ဆီကိုမှ မထည့်သွားရင် ခရီးဆက်လို့မရလောက်ဘူးလို့ ကျွန်တော်ခန့်မှန်းမိလိုက်တယ်။ သူ့ကို ငွေမပေးလိုက်ရင် သူဘာဖြစ်သွားမလဲ ကျွန်တော် ထပ်စဉ်းစားကြည့်တယ်။ နောက်ထပ် ဓါတ်ဆီလာထည့်သူတစ်ယောက်ယောက်ထံမှာ ထပ်တောင်းပြီး ရမှသာလျှင် သူခရီးဆက်နိုင်မယ့်ပုံပဲ။ ဟုတ်တယ် သူ ဒီမှာ သောင်တင်နေပြီ။ အဲဒီကားစုတ်လေးနောက်ကျောကိုကြည့်ရင်း လွန်ခဲ့တဲ့ ( ၃ ) နှစ်ကျော်အထိ လွင့်သွားတဲ့စိတ် နောက်ကို ကျွန်တော့အတွေးတွေ လိုက်သွားမိတယ်။

.

.

ကျွန်တော့အမျိုးသမီးရဲ့ အဖေ နဲ့ အမေ တို့ ရန်ကုန်ကနေ အမေရိကား လာလည်တဲ့အခါ အလုပ်ကခွင့်ယူပြီး အလည်အပတ်ခရီးလိုက်ပို့ဖို့ စီစဉ်တုန်းကပေါ့..။ ကျွန်တော်တို့မိသားစုက ( ၄ ) ယောက်၊ သူ့အဖေ နဲ့ အမေ နဲ့ ပေါင်းလိုက်ရင် အားလုံး ( ၆ ) ယောက်ဆိုတော့ ( ၅ ) ယောက်စီး ကင်မရီ နဲ့ သွားလို့ မရတဲ့အခါ ( ၇ ) ယောက်စီး Sienna Wagon ကြီး ငှားသွားတယ်။ ရန်ကုန်က တောင်းအေ့လို ပေါင်မုန့်ကားပုံစံမျိုးလေ။ ကားငှားစဉ်က စက်ရုံကတိုက်ရိုက်ငှားထားတဲ့ကားအသစ်စက်စက်ဆိုတာ မိုင်းလစ် ( ၁၂ဝ ) ကို ကြည့်လိုက်တာနဲ့ သိသာတယ်။ ကားက ဝပ်တယ်။ ကျွန်တော်တို့က ပစ္စည်းများတော့ သယ်ရချရနဲ့ အကုန်လုံး စုပြုံထည့်ပြီး တောင်းတွေ၊ ပလုံးတွေနဲ့ ကားက ဗိုက်ကားနေပါတယ်။ အဓိကက ဝိတ်များတယ်လို့ ပြောရမှာပါပဲ။

.

ဒါနဲ့ ခရီးစထွက်ပြီး L.A ရောက်တယ်။ ဟောလီဝုဒ်ရောက်တယ်။ လပ်ဗေးကပ်စ် ရောက်တယ်။ နောက်တော့ အမေရိကားမလာခင်ကတည်းက ကျွန်တော်သိပ်ရောက်ချင်ခဲ့တဲ့ သဲကန္တာရကျောက်နီကြားကြီးတွေရှိတဲ့ Grand Canyon ကို ဆက်သွားတယ်။ သွားဖို့စီစဉ်တုန်း အင်တာနက်မှာလေ့လာလိုက်တာ နာမည်ကြီး ရှေးလူမျိုးစုတွေနေထိုင်တဲ့ ရွာစုနားမှာ Skywalk ဆိုတာ လုပ်ထားတာ ရှိတယ်။ မြင်းခွာပုံစံ မှန်အထူခင်းတံတားကြီးကို ကျောက်ဆောင်ကမ်းပါးကနေ ထုတ်ပြီး ဟိုးအောက် ချောက်ကြီးထဲကို အထင်းသား အသည်းယားစွာမြင်နိုင်အောင် လုပ်ထားတာ ရှိတယ်။

.

.

လေ့လာကြည့်လိုက်တော့ အဲဒီတုန်းက ကားဝင်ကြေး၊ လူတစ်ဦးချင်းစီဝင်ကြေး၊ သူတို့ရိုက်ပေးတဲ့ဓါတ်ပုံကို အခကြေးငွေပေးပြီး အင်တာနက်ကနေရွေးရဦးမယ်ဆိုတော့ စားရိတ်သက်သာတဲ့ ခရီးစဉ်ကို ရွေးလိုက်ပါတယ်။ မိုင် ( ၂၄ဝ ) ပိုဝေးပြီး အသွားတစ်ကြောတင် ( ၄ ) နာရီပိုမောင်းရမယ့် မူလလက်ဟောင်း Grand Canyon National Park ကို မောင်းသွားခဲ့တယ်။ အရီဇိုးနားလမ်းမကြီးတွေဟာ တောင်တက်တောင်ဆင်းတွေကြားမှာ မြွေလိမ်မြွေကောက် လှေခါးထောင်လမ်းတွေကိုမောင်းရသလို တစ်နေရာနဲ့တစ်နေရာ အလှမ်းဝေးပါတယ်။ လမ်းခရီးမှာ နားနေရာ - Rest Area ခပ်ကျဲကျဲစီ  ရှိနေသလို ဓါတ်ဆီဆိုင်တွေလည်း တစ်ဆိုင်ဆို တော်တော်မောင်းယူရတယ်။

.

အသွားတစ်လမ်းလုံးလည်း အဆင်ချောပြီး သဲကန္တာရကြည့်ရတာလည်း ပျော်ရွှင်ချမ်းမြေ့စရာ ကောင်းလှပါတယ်။ မပျော်နိုင်တာက အပြန်လမ်းမှာပါ။ တောင်ထိပ်ကနေ နေ့လည်ပိုင်းမှဆင်းလာတော့ မြေပြန့်ရောက်ချိန်မှာ နားတာနဲ့ စားတာနဲ့တင် နေကဝင်ချင်နေပါပြီ။ ဆီတိုင်ကီကိုကြည့်လိုက်တဲ့အခါ ( ၃ ) ပုံ ( ၁ ) ပုံလောက်ကျန်သေးတယ်။ ရတယ် .. အေးအေးဆေးဆေးပဲ ဆိုပြီး ရှေ့ကျမှထည့်မယ်လို့ မိသားစုကိုတောင် ပြောလိုက်ပါသေးတယ်။ အဲဒီလိုနဲ့အစောင့်လွန်သွားလို့ ဆီဆိုင်ရှာမတွေ့တဲ့အခါကျမှ မိုင်ခွက်ကိုလှမ်းကြည့်လိုက်တဲ့အချိန် တိုင်ကီခါလီဖြစ်အောင်မောင်းနိုင်ဖို့ ( ၁ဝ ) မိုင်စာ ဓါတ်ဆီပဲ ကျန်ပါတော့တယ်။ အခုတော့ တစ်ကယ်ခက်ပြီ။ ဒီတစ်ပွဲတော့ တစ်ကယ် ဂိုးပြီ .. ဆိုပြီး စိတ်ဓါတ်ကျစွာ မိုင်တိုင် ( ၉၁ ) မှာ ကားကို ထိုးရပ်လိုက်ရပါတယ်။

.

.

ကားငှားလာတဲ့ကုမ္ပဏီကို ဖုန်းဆက်ပြီး ဝယ်ထားတဲ့ အာမခံအရ လမ်းခရီးကားပျက်အကူအညီ - Roadside Assistance ကို လှမ်းတောင်းပါတယ်။ သူတို့က သူတို့အာမခံပြန်ဝယ်ထားတဲ့ ဆွဲကားကုမ္ပဏီဖုန်းနံပါတ်ပေးလို့ ထပ်ဆက်ရပါသေးတယ်။ တိုတိုပြောရရင် တစ်နာရီလောက် ပတ်ချာလည် ဖုန်းဆက်ပြီးတဲ့အခါ သူတို့ကား လွှတ်လိုက်မယ်ဆိုပြီး ဖြစ်လာပါတယ်။

.

( ၁ ) နာရီခွဲ စောင့်ခိုင်းတယ်။ ကျွန်တော်တို့မှာ လူသူမရှိတဲ့ လမ်းဘေးမြက်ခြုံတွေကြားမှာ လေကတိုက်၊ ကားတွေဖြတ်သွားရင် ကားတစ်စီးလုံးလှုပ်ကာတုန်ခါ၊ ဘေးနားက မြက်ပင်ရှည်ကြီးတွေက ကဝေလိုလို တစ္ဆေလိုလို နဲ့ စိတ်ညစ်လို့ကားအောက်ဆင်းလျှောက်တဲ့ ကျွန်တော့ကို ဝိုင်းတားကြပါသေးတယ်။ နောက်ဆုံးမတော့ အကွေ့လမ်းထဲရှောဝင်လာတဲ့ မီးရောင်ပျပျလေးကိုမြင်မှ Tour ကုမ္ပဏီက ဆွဲကားဖြစ်နေတာ သိလိုက်ရတယ်။

.

ကားဆရာက “ ဒီမှာ ခင်များဆီပို့ခိုင်းလိုက်တဲ့ ဓါတ်ဆီ ( ၂ ) ဂါလံ။ အခု ကျွန်တော်ထည့်ပေးလိုက်မယ်။ လက်ခံရရှိကြောင်း ဒီမှာလက်မှတ်ထိုးပါ ” ဆိုပြီး ကလစ်ဘုတ်တစ်ခုပေါ်က ကျွန်တော့်နာမည်နဲ့ စာရွက်ကိုလှမ်းပေးတယ်။ နောက်ထပ်သူက ဆက်ပြီး

“ အခု ဆီ ( ၂ ) ဂါလံက ကျွန်တော်တို့ ကုမ္ပဏီက လုပ်ပေးနိုင်တာ အကုန်ပဲ။ ခင်များ ဆက်မောင်းသွားပြီး ( ၂ ) ဂါလံမကုန်ခင်မှာ ဓါတ်ဆီဆိုင်အမြန်တွေ့အောင်  ရှာပါ ” လို့ ခပ်ပြတ်ပြတ် ပြောသွားရှာတယ်။ ကျွန်တော်လည်း ဆီ ( ၂ ) ဂါလံဖြည့်ပြီးတဲ့ ပေါင်မှုန့်ကားကို ခပ်သွက်သွက်မောင်းပြီး ဆီဆိုင်တွေ့ရေးကိုသာ ဆန္ဒစောနေမိတယ်။ မိနစ် ( ၂ဝ ) လောက်မောင်းအပြီး Sienna တိုင်ကီကို ဓါတ်ဆီအပြည့်ထည့်ပြီး ဆာလောင်နေတဲ့ မိသားစုရဲ့ ဝမ်းဗိုက်တွေကို ဖြည့်ဖို့ သတိရလာပါတယ်။

.

ဒီ ဓါတ်ဆီ ( ၂ ) ဂါလံသာ မကယ်ရင် တွတ်ပီလည်း ဘာမှတတ်နိုင်မှာမဟုတ်ပါဘူး။ မသေးမျှင် အော်လို့ သေပွဲဝင်ရမယ့်ဘေးကနေ သီသီလေး လွတ်လာတယ်လို့ ဆိုရမှာပါ။ အမှန်က Sienna ကားက ( ၆ ) လုံးထိုးအင်ဂျင်ရဲ့ ဆီစားနှုန်း 18 mph ကို ကင်မရီ ရဲ့ 29 mph နဲ့ အတွက်အချက်မှားသွားတာလို့ပဲ အရှက်ပြေ ပြောရမှာဖြစ်ပါတယ်။ ကုန်ချိန်များတဲ့ကားက တောင်တက်ရတာဆိုတော့ ဆီစားနှုန်းကို မချိန်တတ်ခဲ့တာ လူတတ်ကြီးရဲ့မေ့မရတဲ့သင်ခန်းစာ ပါ။

.

.

အော် .. ကျွန်တော်ပြောလာတာကို စိတ်ရှည်လက်ရှည်လိုက်ဖတ်လာတာ ( ၁ဝ ) မိနစ်လောက်တော့ ရှိတော့မှာပေါ့..။ အမှန်က ဓါတ်ဆီဆိုင်မှာ ကျွန်တော့ကားပေါ်ကို ပြန်တက်နေတုန်း ဒီအဖြစ်အပျက်အားလုံးဟာ  ( ၁ဝ ) စက္ကန့်အတွင်း အမြန်ရစ် - Time-Lapse  ရုပ်ရှင်လို မျက်စိထဲပေါ်လာတာတွေပါ။

.

ပိုက်ဆံအိတ်ထဲက ငွေတွေကိုကြည့်လိုက်ပြီး  ချက်ချင်းကျွန်တော် ကားပေါ်ကဆင်းသွားတယ်။ သူ့ကားနောက်ကို လျှောက်လာတာတော့ အဆိုပါပုဂ္ဂိုလ်က ကျွန်တော်လာတာ မသိပါဘူး။ ကားနားကပ်သွားတဲ့အချိန်မှာ သူ့ကားရဲ့အတွင်းခန်းကို စမြင်ရတယ်။

.

အလယ်ဒိုင်ခွက်မပါတော့ စီယာတိုင်က ဟာလာဟင်းလင်းကြီး။ ကားတစ်စီးလုံးမှာလည်း ပြဲပေါက်နေတဲ့ ဆိုဖါတွေနဲ့ သူ့အသုံးအဆောင်တွေကို ရှုတ်ပွနေအောင် တန်ဆာဆင်ထားတယ်။ ကျွန်တော်ကြည့်လိုက်တဲ့အချိန်မှာ ကားထဲမှာ ဓါတ်ဆီပြတ်လို့ဆက်မသွားနိုင်တာကို ဘယ်လိုလုပ်ရမှန်းမသိရလောက်အောင် ဒီလူ စိတ်ညစ်နေတာ ကျွန်တော် ခံစားသိမြင်လိုက်တယ်။

.

.

ကျွန်တော့လက်ထဲက ဒေါ်လာငွေအချို့ကို သူ့ကိုပေးရင်း ..

“ ရော့ .. ဒီမှာ .. ဒီငွေနဲ့ဆိုရင် ခင်များ ဓါတ်ဆီ ( ၂ ) ဂါလံတော့ရမှာပေါ့ ” လို့ ပြောလိုက်တယ်။

.

သူက အသံလာရာကို အံ့သြစွာမော့ကြည့်ရင်း ကြမ်းတမ်းအားငယ်နေတဲ့ မျက်လုံးတစ်စုံဟာ ဝင်းပသွားတယ်။ ပြီးတော့ ထိုင်ရာကနေ ထခုန်လိုက်ပြီး

“ ဘုရားသခင် က ကောင်းချီးပေးမှာပါ -  God Bless You ” လို့ လှိုက်လှိုက်လှဲလှဲကြီး အော်ပြောပါတော့တယ်။

.

.

ဒါနဲ့ ကျွန်တော်ကားဆီထည့်ပြီးပြီးမို့ ဆီပန့်ကနေ မောင်းထွက်ခဲ့တယ်။ မီးပွိုင့်မှာ ဂငယ်ကွေ့ ကွေ့ရင်း ဓါတ်ဆီဆိုင်ဖက်ကို လှမ်းကြည့်လိုက်တော့ အဲဒီလူဟာ သူ့ကားထဲကို အမှန်တကယ် ဓါတ်ဆီဝယ်ထည့်နေတာတွေ့ရလို့ ကျွန်တော်လေ ဝမ်းသာလိုက်တာ..။ ဒါပေမယ့်သူ့ကို “ ဒီ ( ၂ ) ဂါလံ နဲ့ နောက်ထပ် ဓါတ်ဆီဆိုင်တွေ့အောင်ရှာပါ  ” လို့ ကျွန်တော် မပြောခဲ့လိုက်နိုင်ပါဘူး။

.

koko2yeye@gmail.com