 |
| ဆောင်းပါးရှင် - ကိုညီညီ (တောင်ကြီး) |
မိသားစုဝင်တွေ အတူတကွရှိနေတဲ့ အိမ်ဂေဟာလေးတစ်ခုဟာ ဘယ်လောက်အထိသာယာမလဲဆိုတာ ၂ဝ၂ဝ ခုနှစ်မှာ အိမ်တွင်းအောင်းနေရတဲ့မိတ်ဆွေတွေအသိဆုံးပါ။ အပြင်လောကမှာ ဘာရောဂါဖြစ်နေနေ အိမ်ထဲမှာ အတူချက်စား၊ အတူတီဗီထိုင်ကြည့်၊ စကားတွေဖြတ်ပြော လုပြောကြ၊ ရှေးဟောင်းနှောင်းဖြစ်တွေ၊ အမှတ်ရစရာကာလတွေကို အတူတူကျော်ဖြတ်ခဲ့ကြတဲ့အထဲမှာ ကျွန်တော်တို့မိသားစုလည်း အပါအဝင်ဖြစ်ခဲ့ပါတယ်။
ကျွန်တော့စိတ်ဘဝင်ထဲမှာ ဒီတစ်နှစ် သမီးနဲ့အချိန်ကြာကြာနေထိုင်ခဲ့ရတာကြောင့် ပိုအမှတ်ရနေမိတယ်။ သူက အဝေးရောက်နေတာလား ကျွန်တော်တို့မိသားစုက အဝေးရောက်နေတာလား။ တစ်ခုခုတော့ တစ်ခုခုပဲ။ မိသားစုဆုံဖို့ခက်နေတာ ကာလရှည်ကြာခဲ့တယ်။
ကျွန်တော်တို့သားအဖ ဆုံတုန်းဆုံခိုက် တစ်ယောက်နဲ့တစ်ယောက် သံယောဇဉ်ချည်နှောင်တဲ့စကားတွေ အပြန်အလှန်ပြောကြတယ်။ ကျန်းမာရေးဂရုမစိုက်ရကောင်းလားဆိုပြီး တစ်ယောက်ကိုတစ်ယောက်အပြစ်တင်ကြတယ်။
ကျွန်တော်ကလည်း ကျွန်တော်။ အနာရောဂါဆိုရင် တူပေဒဏ်ပေကြိတ်မှိတ်ခံလိုက်တာကို သမီးက မကြိုက်ဘူး။ ညအချိန်မှန်မှန်မအိပ်ရင် သမီးက ဆူတယ်။ အိပ်ချိန်ဆက်တိုက်မအိပ်ရင် ကျန်းမာရေးထိခိုက်မယ်လို့ ရာဇသံပေးတယ်။ ဒီလို ဂရုစိုက်တာကိုကြားချင်တော့ သိတယ် မဟုတ်လား ကျွန်တော်ကခပ်ပေပေလုပ်တယ်။
အခု သူ့မွေးနေ့မှာ ကျွန်တော်ကပြန်ပြောချင်တယ်။ သမီးလေး အချိန်မှန်မှန်စား အချိန်မှန်မှန်အိပ်။ အားဖြစ်စေမယ့်အစားတွေကို ပိုအလေးထား။ အားဆေးမှန်မှန်သောက်။ အလုပ်ချည်းချည်း ဖိလုပ်တာမျိုးမဟုတ်ဘဲ အလုပ်နဲ့ဘဝမျှခြေ-Work-Life Balance ကို အမြဲရှာ။ စိတ်ဖိစီးရာကို အဝင်မခံနဲ့။ အပြုသဘောကိုမြင်၊ ပွဲမဝင်ခင်အပြင်ကကျင်းပ၊ လိုတိုင်းရ၊ ကြံတိုင်းအောင်လို့ ဆောင်တိုင်းမြောက်တဲ့ အောင်မြင်မှုပန်းတိုင်ကို ကျန်းကျန်းမာမာခရီးပေါက်ပါစေ သမီးလေး။
ချစ်တဲ့
ပါပါး
01-21-2021
No comments:
Post a Comment