နေရာသစ်မှသင်ယူခြင်း ၅

 အမေရိကားကိုပြောင်းရွှေ့နေထိုင်သူတစ်ယောက်ရဲ့ရုန်းကန်ရပ်တည်မှုနဲ့ကုန်ကျစားရိတ်တွေကို ခံစားမျှဝေချင်ပါတယ်

ဆောင်းပါးရှင် - ကိုညီညီ (တောင်ကြီး)

                    
           နေရာသစ်တစ်ခုကိုရောက်ပြီဆိုတာနဲ့ထိပ်ဆုံးရင်ဆိုင်ရမယ့်စိမ်ခေါ်မှုတွေကတော့ မတူညီတဲ့ဘာသာစကားအခက်အခဲ နဲ့ စားဝတ်နေရေးရပ်တည်မှုတွေပါပဲ။ 

            ကိုယ်နေ့စဉ်ပြောနေကျစကားကိုသူများနားမလည်တာ၊ တစ်ပါးသူပြောတာကိုကိုယ်ကနားလည်ပေမယ့်ချက်ချင်းမတုံ့ပြန်နိုင်တာတွေဟာကြည့်တော့လွယ်မလိုနဲ့တော်တော်ခံစားရခက်ပါတယ်။ အမေရိကားကိုမလာခင်အင်္ဂလိပ်စကားပြောသင်တန်းတွေတက်ခဲ့တုန်းက ဆရာအများစုက  “အင်္ဂလိပ်စာကိုမြန်မာလိုမတွေးနဲ့၊ အင်္ဂလိပ်လိုတွေး” လို့ သင်ပေးတာကိုသတိရမိပါတယ်။ တကယ်ရင်ဆိုင်ရတဲ့အခါ ဘယ်စိတ်ကူးကို မြန်မာလိုတွေး၊ ဘယ်အကြောင်းအရာကိုတော့ အင်္ဂလိပ်လိုစဉ်းစားဖို့အချိန်ဆိုတာက မရနိုင်ခဲ့ဘူး။ ကိုယ်ပြောချင်တာကိုသာ စိတ်ထဲကမြန်မာလိုကြိတ်ပြီးဘာသာပြန်နေမိတာလည်းအကြိမ်ကြိမ်ပါ။ 

          ဒီလိုဘာသာစကားအခက်အခဲတွေကို ဖြေရှင်းဖို့လူမျိုးအထွေထွေပေါင်းစည်းနေထိုင်တဲ့အမေရိကားမှာ ဒုတိယဘာသာစကားပြောသူ (Second Language Speaker) တွေအတွက် လူကြီးကျောင်း (Adult School) ဖွင့်လှစ်သင်ကြားပေးတဲ့အစီအစဉ်တွေရှိပါတယ်။ ကျောင်းချိန်က မနက်ရော၊ ညပိုင်းရော ရှိကြတယ်။ ကျောင်းဝင်ကြေးက ဆန်ဖရန်စစ္စကိုပင်လယ်အော်ဒေသဘက်မှာ (၂၅) ဒေါ်လာပါ။
      
           ဖေါင်ဖြည့်ပြီးငွေသွင်းတဲ့အချိန်ရှင်းပြတာက ဒီငွေကိုကျောင်းစအပ်ပြီးနောက်မတက်ဖြစ်ရင် (Non-refundable) ငွေပြန်မအမ်းပါဘူး။ အတန်းတွေမှာလည်းကိုယ့်လိုပဲဘဝတူစကားလာသင်သူတွေကို တွေ့ရမှာပါ။ နောက်တော့ပြောရဲဆိုရဲဖြစ်လာကြပြီး လုပ်ငန်းခွင်ဆက်သွယ်ရေး (Communication) ကောင်းလာဖို့ဆိုတာထက် လွယ်လွယ်ပြောရရင်လူတောတိုးရဲလာတာပေါ့ဗျာ။ စတွေ့ခဲ့တဲ့ လူကြီးကျောင်း (လူငယ်တွေလည်းတက်လို့ရပါတယ်) က ဆရာမတစ်ယောက်ရဲ့အားပေးစကားကို အခုထိမမေ့နိုင်ပါဘူး။ သူမပြောခဲ့တာက “သူတစ်ပါးနားလည်အောင်ပြောဆိုဆက်သွယ်တတ်မယ်ဆိုရင် သင် အမေရိကားမှာ နေလို့ရပြီ” (If you can communicate, you can live in the United States) ပါတဲ့ခင်ဗျား။

          မလွဲမသွေကြုံရမယ့်အစားအသောက်အပြောင်းအလဲက နောက်အခက်အခဲတစ်ခုပါ။ အမေရိကားရောက်ရင် အစားအသောက်ကို မြန်မာနိုင်ငံလိုပူပူနွေးနွေး စားလေ့စားထ မရှိကြတာကိုသိလာပါလိမ့်မယ်။ ထစ်ကနဲဆို မိုက်ခရိုဝေ့ထဲ (၁) မိနစ်နွှေးပြီး စားလိုက်ကြတာပါ။ အလုပ်တွေမှာလည်း မိုက်ခရိုဝေ့အမြဲထားပေးကြတယ်။  အစားအသောက်အားလုံးကို ရေခဲသေတ္တာထဲသိမ်းတာ ဒီနိုင်ငံကအလေ့အကျင့်ပါ။ မြန်မာစိတ်နဲ့ဆို မလတ်ဆတ်တာမစားချင်ဘူး။ ဟုတ်တယ်လေ၊ ရန်ကုန်မှာ ဘာစားချင်စားချင်လမ်းထိပ်ထွက်စားလိုက်ရုံပဲ . . မဟုတ်ဘူးလား။

          တစ်ကိုယ်ရည်သမားတစ်ယောက်အိမ်ငှားသွားနေရင် မျှနေတစ်ခန်း - Room Sharing ကို (၁) လ ဒေါ်လာ (၄၅ဝ) ပါ။  သူများအိမ်မှာ ဧည့်ခန်း၊ အိမ်သာ၊ ရေချိုးခန်း၊ မီးဖိုချောင်၊ ရေခဲသေတ္တာ မျှသုံးရပါမယ်။ မီးဖိုချောင်ကိုအလှည့်ကျသုံးကြရပါမယ်။ ကိုယ့်အစားအသောက်ကိုကိုယ် ရေခဲသေတ္တာထဲမှာ အမှတ်အသားနဲ့ထားထားကြပါတယ်။  အိမ်ရှင်ကမြန်မာလူမျိုးဆိုရင်အဖော်ရတာလည်းရှိပါတယ်။ ကားအတွက် ပါကင်ရမရ မသေချာပါဘူး၊ လမ်းပေါ်မှာ  ညသိပ်ရပ်ဖို့လိုရင် ရပ်ရပါမယ်။

           ကားရှာရင်  (၂ဝဝ၆) မော်ဒယ် Toyota Camry ၊ မိုင်းလစ် (၁၄ဝဝဝဝ) လောက်၊ တိုင်ပင်ခါးပတ်ကြိုး (Trimming Belt) တစ်ခေါက်လဲပြီးသား (မိုင် ၈ဝဝဝဝ တိုင်း ခါးပတ်ကြိုးတစ်ကြိမ်လဲရပါသည်)  မျိုးကို ဒေါ်လာ (၄ဝဝဝ) လောက်ဆိုရလောက်ပြီ။          

• ထမင်းစားစရိတ်က (၁) ယောက်တည်း (၁) လကို ဒေါ်လာ (၁၂ဝ) 
• ကားဆီဖိုး (၁) လ (၁၂၅) ဒေါ်လာ
• ကားအာမခံတစ်ခြမ်းပဲဝယ်ရင် (၁) လ ဒေါ်လာ (၆ဝ)
• လက်ကိုင်ဖုံး ကန်ထရိုက်မပါ - ငွေကုန်ရင်ရပ် (Prepaid Phone) (၁) လ ဒေါ်လာ (၄ဝ) အိမ်ရှင်က အင်တာနက်မျှပေးသုံးရင်အရေးမကြီးဘူး . . ကိုယ့်ဟာကိုယ်ဝယ်ရရင် အနှေးဆုံး 3 Mbps (၁) လကို ဒေါ်လာ (၃ဝ)
• အပြင်ထွက်စားတာနဲ့ ရုံးပိတ်ရက်လျှောက်လည်ဖို့ကိုပါ အကြမ်းဖျဉ်း (၁) လ ဒေါ်လာ (၁၁ဝ) လောက်တွက်လိုက်ရင် (တစ်လလုံးလုံးမဖျားနာဘူးဆိုရင်) ဘာမှအပိုသုံးမပါသေးဘူး (၉၃၅) ဒေါ်လာ မဖြစ်မနေကုန်နေပြီလေ။ 
• ကားလိုင်စင်ရေးဖြေ ဖြေတာ၊ မောင်းဖြေ ဖြေတာ (ရေးဖြေရော၊ မောင်းဖြေရောမကျဘူးဆိုရင်) (၃၂) ဒေါ်လာ
• ကားမောင်းသင်တာ အသိရှိလို့သူ့ကားနဲ့သင်ပေးတာမျိုးကံကောင်းရင်တော့မပြောတတ်ဘူး . . အမောင်းသင်ဆရာနဲ့သင်ခပေးရမှာက (၁) ရက်မောင်းရင် (၂) နာရီစာ ဒေါ်လာ (၈ဝ) (၁) လ အတွင်းမတတ်တတ်အောင်သင်လို့ (၅) ခေါက်သင်ရတယ်ဆိုရင် ဒေါ်လာ (၄ဝဝ)
• ကားတန်ဖိုး ဒေါ်လာ (၄ဝဝဝ) နဲ့ အမှန်အကန်စာချုပ်ချုပ်နာမည်ပြောင်းမယ်ဆိုရင် အခွန် ဒေါ်လာ (၄ဝဝ)
• က.ည.န - DMV ကိုပေးရမှာ ဒေါ်လာ (၁၅ဝ) 

ဒါတွေအားလုံးကိုပေါင်းလိုက်တော့ တစ်ကြိမ်တစ်ခါထဲကုန်ရတဲ့ ငွေစုစုပေါင်းက (၅၉၁၇)  ဒေါ်လာလောက် မြန်မာနိုင်ငံကနေကြိုတင်ပါလာမှအဆင်ပြေမှာပါ။

          ဆက်ပြီးတွက်ကြည့်မယ်ဆိုရင်ရတဲ့ အလုပ်က (၁) နာရီ (၁၂) ဒေါ်လာနဲ့ နာရီ (၄ဝ) ၊ (၄) ပါတ်စာရငွေ ဒေါ်လာ (၁၉၂ဝ) ဆိုပါစို့ . . အမေရိကန်အစိုးရ ကို (၂ဝ%) အခွန်ဆောင်တာနှုတ်ပြီး (၁၅၃၆) ဒေါ်လာရရင် (အလုပ်လည်းမပျက်ဘူးဆိုပါရင်) လောက်ငရုံပါပဲ။ (၃) လလောက်အလုပ်မရပဲ သောင်တင်နေပြီဆိုရင်ထောင်ဂဏန်းအကြွေးတင်နေပါပြီ။ 

          ထပ်ပြီးတိုးတွက်လို့ရတာတစ်ခုက သူများနဲ့ပေါင်းမနေဘဲ အခန်းသီးသန့် (Apartment) ငှားနေမယ်ဆိုရင် (1 Bed, 1 Bath) အိပ်ခန်း (၁) ခန်း၊ အိမ်သာရေချိုးခန်း (၁) ခန်း (၁) လ (၁၈၅ဝ) ဒေါ်လာ၊ စရံငွေတင်ရတာ (၁) လစာကိုပါထည့်ပေါင်းလိုက်ရင် ပထမလနဲ့တင် ဒေါ်လာ (၃၇ဝဝ) ကုန်ကျမှာအမှန်ပါ။

          ပြီးတော့တစ်ကြိမ်တစ်ခါတည်းကုန်ရတဲ့ ငွေက (၉၇ဝဝ) ဒေါ်လာ လောက်ဖြစ်သွားရော ပိုဆိုးသွားပါပြီ။ ဆိုလိုရင်းက အမေရိကားမှာတစ်ယောက်တည်းရုန်းကန်ရမယ့်သူတစ်ယောက်ဟာ (၁) နာရီ (၁၂) ဒေါ်လာလုပ်ခနဲ့ တော်တော်ကံကောင်းမှ လောက်ရုံပါ။ ဟန်ကြီးပန်ကြီးနဲ့တော့ တစ်ကယ်မလွယ်ပါဘူး။ သီးသန့်တစ်ယောက်တည်းလဲ အခန်းကောင်းကောင်း (Single Apartment) ငှားပြီးမနေနိုင်ပါဘူး။ 

          အခုကရပ်တည်နေနိုင်တယ်ဆိုရုံလေးနဲ့ ဒီနိုင်ငံရောက်မြန်မာတွေ ဘယ်လိုစခန်းသွားနေကြရတာကိုသိစေချင်လို့ ဒီလောက်အသေးစိတ်တွက်ချက်ပြနေရခြင်းဖြစ်ပါတယ်။ အမေရိကားမှာရှာ - မြန်မာပြည်မှာသုံး - တန်လှချည်ရဲ့ - ဆိုတဲ့ စကားလည်းဝေးသွားပါပြီ။ လက်တွေ့ဘဝမှာ မလောက်မငနဲ့ မြန်မာပြည်ကိုငွေပြန်မပို့နိုင်ကြပါဘူး။ ငွေပိုငွေလျှံရှိဖို့မပြောနဲ့ . . မလောက်လို့ မြန်မာပြည်ကငွေကိုပြန်မှာသုံးနေရတဲ့သူတွေ ဒုနဲ့ဒေး ပါ။

          အမေရိကားက တကယ်တမ်းတော့အထင်ကြီးစရာပါ။ နေတတ်ရင်လည်းတစ်ကယ်ပျော်ဖို့ကောင်းပါတယ်။ လည်စရာနေရာ နဲ့ အလှအပခံစားစရာနေရာ အများကြီးရှိပါတယ်။ မြန်မာနိုင်ငံမှာကျန်ခဲ့တဲ့ မိတ်ဆွေတစ်ချို့က အမေရိကားလည်းရောက်ရော သူဋ္ဌေးဖြစ်သွားပြီပေါ့လို့ပြောကြတယ်။ ဒါက မသိလို့ပြောတဲ့စကားပါ။ လက်တွေ့အမှန်ရင်ဆိုင်ရတာက ဘာမဆို အသေးအဖွဲကအစ ကိုယ်တိုင်လုပ်ရတာချည်းပါပဲ။

          မြန်မာပြည်မှာသူတကာကိုခိုင်းခဲ့သမျှ ကိုယ်ကဒီမှာအခိုင်းအစေပြန်ဖြစ်နေကြပါပြီ။ မြန်မာပြည်မှာနေတာက ပိုသက်သာပါတယ်။ လက်ဘက်ရည်ဆိုင်ထိုင်ဖို့ အချိန်အားပါတယ်။ တစ်ချို့က အမေရိကားကို နတ်ပြည်ရောက်သလိုတောင်တင်စားကြတယ်။ အမှန်တကယ် "အမေရိကားက အလုပ်သမားဝန်ထမ်းနဲ့တည်ဆောက်ထားတဲ့ နည်းပညာတိုင်းပြည်တစ်ခုသာပါ" ။ မြန်မာတွေဒီကိုရောက်ပြီးမှ  “မြန်မာပြည်ကိုပြန်ချင်တယ်” ဆိုတဲ့စကားကိုကြားမိတဲ့သူတိုင်းမအံ့သြရလေအောင် ရေးပြရခြင်းသာဖြစ်ပါကြောင်း။


ခင်လျက်
ကိုညီညီ (တောင်ကြီး)
06-27-2013