လာပြန်ပြီ ( ၄ ) နာရီ ( တိုးနီ သတ္တမပိုင်း )

ဆောင်းပါးရှင် - ကိုညီညီ ( တောင်ကြီး )

.

.

ဒီဇင်ဘာလရဲ့ ရာသီဥတုက ဒီဒေသမှာ ကြမ်းတယ်။ ပူရင်အရမ်းပူပြီး ချမ်းတဲ့အခါ ရေခဲရေနဲ့ပက်လိုက်သလို မခံမရပ်နိုင်အောင် ချမ်းတယ်။ မကြာသေးခင်ကမှ ရေချိုးထားရုံမက အကျီတွေက ကိုယ်ဝတ်နေကျမဟုတ်ပြန်။ အပြောင်းအလဲကို ဒေါင်ကျပြားကျ ရင်ဆိုင်နေရတဲ့ ကျွန်တော်ဟာ မဟာရွှေမန္တလေးရာသီဥတုကို သတိရနေမိတယ်။ အခုဒီနေရာကတော့ ကျွန်တော်အပါအဝင် ခရီးသွား ( ၅ ) ယောက် တရားဝင်ဒုက္ခသည်အဖြစ်ကြေငြာခဲ့ကြတဲ့ မက္ကဆီကို-အမေရိကန်နယ်စပ်ဒေသ က တက္ကဆက်ပြည်နယ် ဖြစ်ပါတယ်။

.

.

အစောင့်ရဲ ( Officer ) က ကျွန်တော်အိပ်ရမယ့်ကုတင်နံပါတ် ( ၁၃ ) ကို လိုက်ပို့တယ်။ နှစ်ထပ်ကုတင်တွေမှာ အပေါ်က စုံ,နံပါတ်ဖြစ်ပြီး အောက်ကတော့ မ,နံပါတ် မို့လို့ ကျွန်တော်က အောက်မှာ အိပ်ရမယ်ထင်တယ်။ ဘယ် နဲ့ ညာ နှစ်ခြမ်းစလုံး ကုတင်တွေ တန်းစီထားပြီး အလယ်လျှောက်လမ်းမှာ သံထိုင်ခုံ နဲ့ သံထမင်းစားပွဲခုံကို ကြမ်းပြင်မှာ အသေစိုက်ထားတယ်။ အမြဲမခွဲဘူးဆိုတဲ့ သူငယ်ချင်းတွေ ( ၂ ) ယောက်တစ်သုတ် နဲ့ ( ၃ ) ယောက်တစ်သုတ် ကွဲသွားပါတယ်။ ကုတင်ပေါ်မှာ မွှေ့ရာနဲ့တူတဲ့ ဖော့ကို ပလပ်စတစ်နဲ့အုပ်ထားတဲ့ အခင်းလေးတစ်ခုခင်းထားတယ်။ ကျွန်တော့်အပေါ်အထပ်မှာအိပ်မယ့်သူက မက္ကဆီကန်ပုပုလေး တစ်ယောက်ပါ။

.

ကျွန်တော်တော့ တော်တော်လေး စိတ်ဓါတ်ကျနေမိတယ်။ ဘယ်နားရောက်လာလို့ ဘာတွေဆက်ဖြစ်မလဲဆိုတဲ့အတွေးရဲ့အဖြေကို အခုအချိန်ထိ နီးစပ်လောက်အောင် ရှာမတွေ့သေးဘူးလေ။ ကုတင်နားမှာ ပစ္စည်းတွေ စီမယ်လို့လုပ်တုန်း ကျွှန်တော့်နားကို လူတွေဝိုင်းအုံလာတယ်။ သူတို့ဘာသာစကားနဲ့ အပီအပြင် လာပြောနေတဲ့ပုံပဲ။ ဒါပေမယ့် ကျွန်တော်တစ်လုံးမှနားမလည်ဘူး “ I’m no Mexican ” လို့ တွေ့ကရာ ကျိုးပဲ့အင်္ဂလိပ်နဲ့ ပြန်ပြောလိုက်မိတယ်။ အခုနောက်ပိုင်းမှ ပြန်စဉ်းစားမိတယ်။ မြန်မာနိုင်ငံကထွက်လာကတည်းက တစ်ရက်မှ စိတ်မချမ်းသာရသေးဘူး။ နေ့တိုင်း စိတ်ပိန်ချုံးရုံမက ခန္ဓာကိုယ်ကလည်း ပါးပါးလေးပဲ ကျန်တယ်။ ဒါကြောင့် သူတို့လူမျိုးနဲ့ ခပ်ဆင်ဆင်တူနေတာနေမှာ။

.

ထားလိုက်ပါ။ ကျွန်တော်က ဆက်ပြီး “ I’m from Asia ” လို့ ပြောလိုက်တော့ “ သိပြီ ဒါဆို ချီးနို လား? ” တဲ့။ ဘာ ချီးနို မှ ကျွန်တော်မသိဘူး။ ခန့်မှန်းကြည့်တာ တရုတ်လို့ ထင်နေတာဖြစ်မယ်။ ဒါနဲ့ “ Myanmar ” လို့ပြောတော့ မသိဘူး ဖြစ်နေပြန်တယ်။ ဆက်ပြီး ဘားမား -  Burma လို့ပြောတော့ သိတယ်သိတယ်ဆိုပြီး အော်ကြတယ်။ ကျွန်တော် အားရဝမ်းသာဖြစ်ရတဲ့အချိန်ဟာ သိပ်မခံလိုက်ပါဘူး။ “ မင်းက ပနားမား က လာတယ်ဆိုရင် ငါတို့လို စပိန်စကား တတ်ရမှာပေါ့ ” တဲ့လေ။ ဖြစ်မှဖြစ်ရလေ .. မှားစရာရှားလို့ ဘားမား နဲ့ ပနားမား များ မှားရတယ်လို့။ ထင်သလိုမဟုတ်မှန်း နည်းနည်းဇာတ်ရည်လည်သွားတော့မှ “  ချီးနို ”  တွေ ဟိုဘက်မှာရှိတယ် အများကြီးဆိုပြီး တရုတ်တွေ စုထိုင်နေတာကို လက်ညှိုးထိုးပြတယ်။ တော်ပါပြီ ကျွန်တော်က ကျွန်တော့်သူငယ်ချင်းတွေနားပဲ သွားချင်တာ။

.

.

စူးစူးရှရှ ဝီစီသံမှုတ်လိုက်တဲ့အချိန်မှာ အားလုံးကုတင်ပေါ်အမြန် ပြေးတက်ကြတယ်။ အထူးအဆန်း အလန့်အကြားမို့လို့ ကျွန်တော် ခြေမကိုင်မိ လက်မကိုင်မိဖြစ်သွားတယ်။ အဲဒါ လူရေတာ တဲ့လေ။ သူတို့က ( ၂ ) နာရီတစ်ခါ လူစစ်တယ်။ ကုတင်တစ်ခုမှာ လူတစ်ယောက်ပဲရှိရမယ်။ နှစ်ယောက်ရှိနေရင် ပိုနေသူကို အခန်း ( ရုံ ) ရွှေ့ပစ်တယ်။ ဒီဘက်က Officer တစ်ယောက်က လမ်းကြောင်းရှင်းတဲ့အချိန် အရာရှိဖြစ်ပုံရသူက ဟိုဘက်ထိပ်မှာ ထိုင်ခုံနဲ့ထိုင်နေတယ်။ ကုတင်မှာမရှိတဲ့သူတွေကို ဘယ်လိုလုပ် ရေတွက်မလဲလို့ စဉ်းစားကြည့်တယ်။ အခန်းလွန်နေရင် အိမ်သာတက်နေသူ အိမ်သာထဲမှာနေ ထွက်မလာနဲ့။ ရေချိုးနေသူ ရေချိုးခန်းထဲမှာနေ သူလည်းထွက်မလာနဲ့။ စာရင်းပျောက်နေသူတွေကို အဲဒီလို ပြန်ရှာ ရေတာလေ။

.

တစ်ခုထူးခြားတာက ရဲဖြစ်ပြီး ကိုယ်ခန္ဓာမှာ ဘာလက်နက်မှမရှိဘူး။ ပါတာဆိုလို့ လက်ထိပ်၊ ဝီစီ နဲ့ စကားပြောစက် ဒါတွေပဲ။ အများနဲ့တစ်ယောက် လက်နက်အလုခံရမှာစိုးလို့ သူတို့ကိုယ်တိုင်ပါ လက်နက်မကိုင်ဘူး။ ခန့်ထားတဲ့လူတွေက အသံသြဇာပါဝါရှိသူလည်းဖြစ်ရမယ် ဒါမှမဟုတ် အားကောင်းမောင်းသန် ဗလကောင်းကောင်းနဲ့ တစ်ခုခုဖြစ်ရင် ပြန်ပြီး လုံးထွေးသတ်ပုတ်နိုင်မယ့် အကောင်ကြီးကြီးတွေပါ။ လိုက်စစ်တဲ့ Officer က လူစစ်ပြီးလို့ ပြည့်ပြီ ဆိုတာနဲ့ ဝီစီပြန်မှုတ်လိုက်ရင် အားလုံး သက်သာ-အေးစေ ဖြစ်သွားပါပြီ။ သွားချင်ရာ သွားလို့ရပြီ။

.

.

ခဏလေးကြာတော့ ဂိုဒေါင်တံခါးပွင့်လာပြီး တွန်းလှည်းကြီးတစ်စီး ဝင်ချလာတယ်။ ရန်ကုန်ထရိတ်ဒါးဟော်တယ်က အစားအသောက်တွေတင်တွန်းတဲ့လှည်းထက် အများကြီး ကြီးတယ်။ ဇွန်းတွေ ပန်းကန်တွေ နဲ့ ရန်ကုန်မှာ တိုရှည်စားတဲ့ စတီးပုံစံခွက်တွေ တစ်သီကြီးထပ်ထားတယ်။ လှည်းအောက်ခြမ်းမှာ အချိုရည်အပြည့်တင်ပြီးတွန်းလာပါပြီ။ အဲဒီအချိန်ကျတော့လူတွေက အလုအယက်တန်းစီကြတယ်။ အထာနှပ်နေသူများက ထိပ်ဆုံးကနေရာယူထားကြတာပေါ့။ ကျွန်တော်တို့ ငါးမြောက်ငါးခြောက် သူငယ်ချင်း ( ၃ ) ယောက် ရဲ့ အရှေ့က ဖြတ်တဲ့သူကဖြတ်သလို လုစီတဲ့လူတွေ ဝင်တိုးလိုက်ကြတာ စီရင်းစီရင်းနဲ့ နောက်ဆုံးကိုရောက်သွားတယ်။

.

ကျွေးတာက ထမင်းဝါဝါ၊ ဝက်ကြိတ်သား နဲ့ အအေးတစ်ခွက် ဒါပဲ။ ကျွန်တော်တို့ကြည့်ပြီး မစားတတ်ဘူး။ စိတ်ညစ်နေကြတယ်။ အဲဒီမှာ ကျွန်တော်တို့အခြေအနေကို အကဲခတ်နေတဲ့ ဘေးနားက ပဲစားက “ မင်းတို့စားမှာလား? မစားရင် ငါ့ကိုပေး ” ဆိုတော့ ကျွန်တော်က ဗန်းထိုးပေးတဲ့အချိန် ဝိုင်းလုကြတယ်။ ရသွားတဲ့သူနဲ့ ကုတင်အပေါ်ထပ်ကလူနဲ့ အငြင်းပွားနေလို့ အဲဒီပုပုနဲ့လူကိုပဲ ပေးလိုက်တဲ့အခါ ကျွန်တော့်ကို နှစ်နှစ်ကာကာပြောတဲ့ စပိန်စကား တစ်ခွန်းတတ်လာပါတယ် “ ဂရားစီးယပ်စ် - Gracias ” ကျေးဇူးတင်ပါတယ် ..။

.

.

မနက် ( ၆ ) နာရီမှာ မနက်စာတွန်းလှည်း လာပြန်ပါပကော။ ဒီတစ်ခါတော့ ဘယ်ရမလဲ အရင်ဦးထားပြီး ပါတဲ့ Pan Cake ၊ နွားနို့ဗူး နဲ့ သစ်သီးတို့နဲ့ တစ်ဝမ်းစာ ဖြေရှင်းလိုက်နိုင်ပါတယ်။ မစားလို့လည်းမရဘူးလေ။ မနေ့က မကြိုက်ဘူးဆိုပြီး မစားခဲ့တာ တစ်ညလုံး လူက ခွေခေါက်နေတာ အိပ်မှမရတာ။ နောက်ဆို ကြိုက်ကြိုက်မကြိုက်ကြိုက် စားထားမှဖြစ်မယ်လို့ ဘဝပေးသင်ခန်းစာတစ်ခုကို သင်ယူလိုက်ရပြန်ပါတယ်။

.

မျက်နှာသစ်ဖို့ ရေဘုံပိုင်နားသွားတော့ တစ်ယောက်မှမရှိဘူး။ မနက်စာယူပြီး အားလုံး ပြန်အိပ်နေကြတာကိုး။ တက္ကဆက်မှာ ဆောင်းတွင်းကြီး နေက မနက် ( ၈ ) နာရီမှထွက်တာ။ ဒါပေမယ့် ကျွန်တော်တို့က ဂိုဒေါင်ကြီးထဲနေရတာ နေကိုမတွေ့နိုင်ပြန်ဘူး။ အဆောင်အပြင်ထွက်တံခါးဖွင့်ပေးတဲ့အခါ အားကစားကွင်းပုံစံ ပေ ( ၂ဝ ) ပတ်လည်ကွင်းငယ်လေးကို ကျွန်တော်တို့ လမ်းလျှောက်ထွက်လိုက်တယ်။ တစ်ဆောင် နဲ့တစ်ဆောင် လှမ်းမြင်နေရပေမယ့် သံဇကာ ကာထားတယ်။ ကစားကွင်းတွေကြားထဲမှာ ကားဝင်မောင်းလို့ရအောင် အကျယ်အဝန်းလေးရှိတယ်။

.

.

လေကောင်းလေသန့်ရှူရင်း မျက်စိထဲမှာတွေ့လိုက်တဲ့ ဝမ်းသာစရာကတော့ ကျန်တဲ့သူငယ်ချင်း ( ၂ ) ယောက်က ကျွန်တော်တို့တစ်တွေကို ခုန်ပေါက်ပြီး လက်ယပ်လှမ်းခေါ်နေတာပါပဲ။

.

ဝမ်းနည်းစရာသတင်းကတော့ အကြောင်းကြားစာတစ်စောင်ပါ။ နောက်တစ်ရက်မနက်စော ( ၄ ) နာရီ ကျွန်တော်တို့ကို လာခေါ်မယ်တဲ့။ ဘယ်ကိုထပ်ခေါ်သွားပြန်ဦးမလဲ မသိဘူး။ လာပြန်ပြီ ( ၄ ) နာရီ။

.

koko2yeye@gmail.com