ဆောင်းပါးရှင် - ကိုညီညီ ( တောင်ကြီး )
ဖြတ်သန်းရတဲ့နေ့ရက်တွေရှည်ကြာလာပြီး
ငြီးငွေ့တဲ့အခါ ကိုယ့်ဘဝကိုကိုယ် အပြစ်တင်ဖူးပါသလား ၊ မနက်အိပ်ယာထ အလုပ်လာ နေ့လည်စာစား
အလုပ်ဆင်း ညနေအိမ်ပြန် ဒီလိုနဲ့ ကုန်ဆုံးခဲ့ရတဲ့အချိန်တွေ တဖြုတ်ဖြုတ် နဲ့ နွေသစ်ရွက်လို
ကြွေလွင့်ပျောက်ပျယ်သွားတာ သတိမထားလိုက်ဘူး မဟုတ်လား ၊ ငါဒီအလုပ်ကို ဒီလောက်အကြာကြီးလုပ်လာတာ
ဘာမှလဲမထူးခြားလာဘူး ဆိုတဲ့ ညည်းတွားသံ ကို တစ်ခါက ဆရာတော်ကြီး တစ်ပါးအမိန့်ရှိဖူးတဲ့
“ ဒီအလုပ်ဟာ သင့်ဘဝထဲ မရောက်သေးလို့ပါ ” ဆိုတဲ့ ဆုံးမစကားနဲ့ နှစ်သိမ့်ပေးပါရစေ ၊ သင့်ဘဝတွင်းကို
ထဲထဲဝင်ဝင် နေရာယူမယ့်အလုပ်မျိုး ရှိပါတယ် ၊ ဒါကတော့ ကိုယ်ဝါသနာပါတဲ့လမ်းကြောင်းပေါ်မှာလုပ်ရတဲ့
ပျော်ရွှင်စရာလုပ်ငန်းမျိုးပါ ၊ လူသားအားလုံးနေရာတိုင်းစိတ်တိုင်းကျဖို့မဖြစ်နိုင်ပေမယ့်
ကိုယ့်စိတ်ရွှင်ရာမှာ အလုပ်ဝင်ဖို့ လေကျင့်ကွင်းကတော့ ပညာသင်တဲ့ ကျောင်းသားအရွယ်မှာကတည်းက
မိမိကိုယ်ရည်ကိုယ်သွေးကို ကိုယ်တိုင်သတိထားမိပြီး နည်းနည်းဖိကြိုးစားလိုက်ရင် ရပါပြီ
။
တခြားဝေးဝေးမကြည့်ပါနဲ့ ၊ မလုပ်မနေရ နေ့စဉ်စကားပြောခြင်း
တာဝန်ကိုပဲ ဆန်းစစ်ကြည့်ရအောင် ၊ ငယ်စဉ်ကလေးသဘာဝ ရိုးသားခြင်းတွေ သင့်အလုပ်ထဲမှာ ဘယ်လောက်ထည့်သွင်းတည်ဆောက်ထားမိပါသလဲ
ပြန်ကြည့်ကြည့်ပါ ပြန်ရှာကြည့်ပါ ရှိသေးပါရဲ့လား
အမှန်ကိုအမှန်အတိုင်း ထုတ်ဖော်ပြောဆိုခြင်းတွေ ၊ လိုသေးလို့လား မုသားမပါလင်္ကာမချော ခေတ်ကြီးရောက်နေပြီလို့
စောဒကမတက်နဲ့ဦး ၊ လုပ်ငန်းခွင်မှာ လုပ်ဖော်ကိုင်ဘက်အချင်းချင်း ပွင့်လင်းရိုးသားစွာဆက်ဆံကြရင်
အကြိတ်အခဲတွေ မပြေလည်မှုတွေ ကိန်းခိုဖို့ စိတ်အာရုံမှာ နေရာပိုမရှိပါဘူး ၊ နည်းနည်းလေး
အမှန်မပြောမိတာ နဲ့ နားလည်မှုအကြီးကြီး လွဲသွားပါတယ် ၊ လုပ်ငန်းကြီးလေ ပိုဂရုစိုက်ရလေပါ
၊ အကွက်စိတ်စိတ်လေး အာရုံစိုက် သတိထားလိုက်ရင် ဘဝတူအချင်းချင်းဆက်ဆံရေးချောမွတ် ပြေလည်သွားနိုင်ပါတယ်
၊ ဒီနည်းနဲ့ အလုပ်ခွင်ပျော်ရွှင်ရေး နေ့သစ်ကို မနက်ဖြန်ပဲ စလိုက်ကြပါစို့ ။
စိတ်ကိုလွတ်လပ်စွာထားရဲ့လား ၊ အိမ်ကမပြေလည်မှုကို
အလုပ်မှာရှင်းလို့မရသလို အလုပ်ဝန်ပိတဲ့ဖိစီးမှုကိုလဲ အိမ်သူအိမ်သားတွေ မဖြေရှင်းပေးနိုင်ပါဘူး
၊ အိပ်ရာနိုးထလူ့ဘဝ တစ်ရက် စလိုက်ပြီဆိုတာနဲ့ လူသားတန်းတူညီမျှ ( ၂၄ ) နာရီရပါတယ် ၊
အားလုံး ကိုယ့်ဒုက္ခနဲ့ကိုယ်ချည်းပါ ၊ တစ်ရက်လုံးမပျော်ဘူး / ပင်ပန်းလိုက်တာ / ဘယ်သွားရမှန်းမသိဘူး
/ အချိန်တွေက အကုန်မြန်လိုက်တာ ဆိုသူတွေအားလုံးဘယ်သူမှ မိနစ်အပိုမရပါဘူး ၊ ကိုယ်အသုံးချသလို
အချိန်အသုံးဝင်ခြင်း မဝင်ခြင်း က ရေရှည်မှာ စကားပြောသွားပါတယ် ၊ အလုပ်များတဲ့စိတ်ကို
အစိတ်စိတ်ခွဲခြားစိတ်ဖြာလိုက်ပါ ၊ အစောဆုံးကိစ္စကို ဦးစွာဖြေရှင်းပါ ၊ နောက်တစ်ခုအကြောင်း
ကြိုတင်မတွေးပါနဲ့ ၊ တွေးချင်ရင် ဒီနေ့အကြောင်းကို မနေ့ကတည်းက ကြိုတွေးသင့်ပါတယ် ၊
ကျော်ဖြတ်ရမယ့်အခက်အခဲဟာ အမြဲတမ်းကြီးမားတယ်လို့ တရားသေမမှတ်ပါနဲ့ ၊ လာမယ့်ဘေး ပြေးတွေ့ဖို့လောက်အထိ
ပြောစရာမလိုပေမယ့် မဖြေရှင်းရဲလို့ဖြစ်ဖြစ် ရှောင်ကွင်းနေလို့ဖြစ်ဖြစ် မသိစိတ် ဖိစီးတဲ့စိတ်က
ဒီအလုပ်သာငါလုပ်ရရင်တော်တော်ခက်မှာပဲလို့ အသားလွတ်ကြောက်နေတာဖြစ်ပါတယ် ၊ ကြိုတင်အစီအစဉ်ချ
ဆောင်ရွက်တတ်တဲ့ သင့်ဝိရိယ သာ အားထားစရာရှိပါတယ် ။
ဒီအပိုင်းလေးကို ချုပ်ပြီးပြောရရင် အပ်နဖားပေါက်လေးထဲ
အပ်ချည်ကြိုးထိုးသွင်းရသလို ကြည့်လိုက်ရင်တော့ အပ်ချည်ထိပ်ကလေးကအပ်ပေါက်ထက်ကြီးနေသယောင်ယောင်
ကြိုးစားလိုက်တော့လဲ ရသွားတာချည်းပါပဲ ၊ တစ်ခါတစ်ခါ အပ်ကြိုး နဲ့ အပ်ချည်ဝယ်တဲ့အခါ
အပိုပါလာတဲ့ “ ချည်ထိုးကူကိရိယာ “ ကို မမြင်ပဲ ကိုယ့်နည်းကိုယ့်ဟန်နဲ့ ကိုယ့်မှတ်ဥာဏ်နဲ့
မှတ်မိသလောက်ဖြေရှင်းတဲ့အခါ ကိစ္စဝိစ္စတွေဟာ အဆင်ပြေပြေသိပ်မဖြစ်လာပါဘူး ၊ ဒါကြောင့်
လက်လှမ်းမှီတဲ့ အချက်အလက် အကူအညီတွေရယူပြီး ရှင်းတဲ့အခါ ပိုအဆင်ချောပြီး အကျိူးရှိစေတာ
သတိချပ်သင့်ပါတယ် ။
ကိုယ်ထားတဲ့စေတနာဟာ ကိုယ့်အလုပ်ခွင်ကို
သာယာချော့မွေ့စေတယ်ဆိုတာ မယုံမရှိပါနဲ့ ၊ အပေါ်ယံလေးတင် လျှပ်ကြည့်ရင် လွယ်မယောင်နဲ့ခက်တဲ့အလုပ်တစ်ခုပါ
၊ နောက်ပိုင်းခေတ်စကားပုံတွေထဲက “ စေတနာသည် လူတိုင်းနှင့်မထိုက်တန် ” ဆိုတာမျိုးကို
နားကြားမယောင်လိုက်ပါနဲ့ ၊ ဗုဒ္ဒဘာသာယုံကြည်သူသာမက ကမ္ဘာမှာ ဘယ်ဘာသာဝင်မဆို တူညီတဲ့အမြင်တစ်ခုရှိနေပါတယ်
၊ ဒါကတော့ ဘာလုပ်လုပ် စေတနာ မေတ္တာထားရမယ်ဆိုတာပါပဲ ၊ ကုန်ကြမ်းကို ပြုပြင်ထုတ်ပိုးပြီး
ကုန်ချောအနေနဲ့ ရောင်းရင် ကုန်ကြမ်းသီးသန့်ထုတ်ရောင်းတာထက် ဈေးပိုရမြဲပါ ၊ ထပ်ပေါင်းလိုက်တဲ့
ဝန်ဆောင်မှု အားထုတ်မှုသာမက မြုပ်ကွယ်နေတဲ့အမြင်သစ်တွေရဲ့ အင်အားကြောင့် အကျိုးကောင်းရသလို
စေတနာထည့်ပေါင်းလိုက်တဲ့အလုပ်ကို ဖျက်လိုဖျက်ဆီးလုပ်လို့ မအောင်မြင်နိုင်ပါဘူး ၊ စိတ်ချပါ
၊ ရင်းနှီးလိုက်ရသလောက်ပြန်ရတဲ့ မြှုပ်နှံမှုကတော့ သူတစ်ပါးအကျိုးရှိပါစေ သူတစ်ပါးအလုပ်မြန်မြန်ပြီးပါစေ
သူတစ်ပါးအကျိုးအမြတ်ရပါစေ စတဲ့ စေတနာ ပံပိုးဝန်းရံလိုက်တဲ့အလုပ်ဖြစ်ပြီး အမွန်မြတ်ဆုံးရလဒ်ပါ
။
နောက်ထပ်ဆရာတော်ကြီးတစ်ပါးက “ လူတွေဟာ
မွေးကတည်းက သေသည်အထိ ကောင်းမှုကုသိုလ်ရော မကောင်းမှု အကုသိုလ်ရော ( ၂ ) မျိုးလုံးလုပ်ကြတယ်
၊ ” လို့ တရားမြွက်ချွေပါတယ် ၊ မှန်ပါတယ် ၊ ငယ်စဉ်လူမမယ်တုန်းက မကောင်းတာကို မကောင်းမှန်းမသိလို့လုပ်မိပေမယ့်
လူကြီးဖြစ်လာတဲ့အခါ မကောင်းမှုကို သိသိကြီးနဲ့ လုပ်တာကို သတိထားရပါမယ် ၊ ဥပမာ လေးဘက်ကုန်းသွားခါစ
ကြမ်းပြင်ပေါ်မှာတွေ့ကရာ ပါးစပ်ထဲထည့်တာ မသိလို့လုပ်မိပေမယ့် အစိုးရလုပ်ငန်းခွင်မှာ
လက်ဘက်ရည်ဖိုး တွေ့ကရာလူနားက တောင်းနေတာ လာဘ်လာဘဓါးပြတိုက်တာဟာ သိသိနဲ့ကျူးလွန်နေတဲ့
မိစ္ဆာမကောင်းမှု အကုသိုလ်ဖြစ်ပါတယ် ၊ ကိုယ်စားနေတဲ့မှုံ့ကုန်တဲ့အခါ တစ်ခြားကလေးနားက မှုံ့ကိုလုယူတတ်တဲ့အကျင့်ကို
ဘယ်အသက်အရွယ်အထိလုပ်ခဲ့ပါသလဲ ၊ အကျိုးဆက်အနေနဲ့ မြေဈေးကောင်းလို့ လယ်စိုက်သူနားက မြေသိမ်းပိုက်တဲ့
လုပ်ရပ်ဟာ ဆုံးမရခက်တဲ့ ကလေးဆိုးကြီးတွေဖြစ်နေပါတော့တယ် ၊ ဒါတင်မကသေးပါ ကိုယ့်ဆီက သိပ်မကောင်းတဲ့အရုပ်ကို
သူများနားကပိုကောင်းတဲ့အရုပ်နဲ့အလဲအထပ်ရိုက်တဲ့အကျင့်ကို မဖျောက်တဲ့ ကလေးကျတော့ ခေတ်သစ်ခရိုနီကြီးတွေ
ဖြစ်လာကြပါတယ် ။
မိမိကြောင့်သူတစ်ပါး အနှောင့်အယှက်မဖြစ်စေနဲ့
ဆိုပြီး အလယ်တန်းမှာသင်ပေးလိုက်တဲ့ လောကနီတိဟာ လူငယ်ကျောင်းသားတွေချည်း လိုက်နာဖို့သက်သက်မဟုတ်ပါ
၊ ကျရာတာဝန်ကိုထမ်းဆောင်နေတဲ့ နိုင်ငံ့ဝန်ထမ်းပဲဖြစ်ဖြစ် ကုမ္ပဏီဝန်ထမ်းပဲဖြစ်ဖြစ် မိမိအကျိုးပြုလို့
ကုမ္ပဏီတိုးတက်စေရုံမက ဒီကနေတစ်ဆင့် ကုမ္ပဏီက မိမိကိုပြန်မြှောက်စားတဲ့ နှစ်ဘက်ကောင်းတဲ့
ဥပမာကဲ့သို့ဖြစ်သင့်တာပါ ၊ ဒီလိုမဟုတ်ပဲ ကြားခုလတ်မှာ သံလျပ်ရေထင် အတုယောင်လာဘ်လာဘမှိုင်းတွေကြောင့်
လိုရင်းမရောက်ပဲ လူငယ်တွေရဲ့ နိုင်ငံအကျိုးပြုစိတ်ဓါတ်တွေ ဆုံးရှူံးမှုကြီးမားခြင်းမက
ဆုံးရှူံးရပါတယ် ။
လုပ်သားလူငယ်များ လုပ်ငန်းခွင်မှာမပျော်ပိုက်ခြင်း
နဲ့ အလုပ်လက်မဲ့ပေါများခြင်း တို့ဟာ နိုင်ငံတစ်ခုရဲ့ လူသားအရင်းအမြစ်ပြုန်းတီးခြင်းပါ
၊ မြစ်ကမ်းပါးပြိုတာမြင်ရတယ် မြေပြိုတာ မြင်ရတယ်
လူမျိုးပြိုတာ မမြင်စွမ်းနိုင်ပါဘူး ၊ အပျော်သဘောနဲ့ အိမ်ထောင်ပြုဖို့မသင့်တော်သလို
နိုင်ငံတည်ဆောက်ရာမှာလဲ ထိုနည်းနှင်နှင် တော်ရုံတန်ရုံ ဦးနှောက်နဲ့ မဖွံ့ဖြိုးနိုင်ပါဘူး
၊ အပေးအယူဆိုတာရှိတယ် ငွေကိုမဆိုလိုပါ ၊ အခွင့်အရေးကိုပြောလိုရင်းမဟုတ်ပါ ၊ ကိုယ်က
မေတ္တာ ကိုပေးမှ အေးချမ်းမှုပြန်ရမယ် ၊ စေတနာကိုပေးမှ ပီတိပြန်စားရမယ် ၊ ဝေဒနာပေးရင်တော့
ဒဏ်ရာပြန်ရဖို့သာအကြောင်းရှိနေပါတယ် ၊ ကဲ မိတ်ဆွေများ ယခုဘဲ ငယ်စဉ်ကလေးဘဝကစ ဖေဖေ မေမေ ဆရာသမားတွေပေးခဲ့တဲ့
လူ့အကျိုးပြုစည်းကမ်းတွေ အခု ကိုယ့်လက်ရှိဘဝထဲမှာ ဘယ်နှစ်ရာခိုင်နှုန်း ကျန်သေးလဲ တွက်ကြည့်ကြပါလို့သာ
တိုက်တွန်းလိုက်ရပါတယ် ။
( ဝန်ခံချက် ။ ။ “ ရင်ဆိုင်ရန်အင်အားလိုသောအခါ “ နှင့်
“ ရင်ဆိုင်ရန်ခွန်အားလိုသောအခါ “ ဟူ၍ ခေါင်းစဉ် ( ၂ ) ခုထဲမှ ရွေးချယ်ရန်ဝေခွဲရခက်နေသောကြောင့်
အလုပ်အတူတူလုပ်သော မြန်မာလုပ်ဖော်ကိုင်ဖက် ( ၃ ) ဦးကှိုရှင်းပြကာ ရွေးချယ်ခိုင်းရန်အကြံရခဲ့ပါသည်
၊ ဒုတိယတစ်ဦးကိုမေးပြီးသောအခါ မဆိုင်းမတွ ပထမတစ်ဦးနှင့် အဖြေအတူတူပေးသောကြောင့် တတိယတစ်ဦးကိုမေးရန်မလိုတော့ပဲ
( ၂ ) ဦး ဒိုင်ပြတ်အနိုင်အဖြစ် အထက်ပါခေါင်းစဉ်ကို ပေးဖြစ်ပါသည် ။ )
koko2yeye@gmail.com
" ရင်ဆိုင်ရန်ခွန်အားများ လိုတဲ့အခါ " စာမူသည် ၂ဝ၁၄ ဂျွန်လ ( ၂၈ ) ရက် ၊ စနေနေ့ထုတ် NetGuidE နည်းပညာဂျာနယ် အတွဲ ( ၃ ) ၊ အမှတ် ( ၄ဝ ) ၊ စာမျက်နှာ ( ၂၂ ) တွင် ဖော်ပြပါရှိသည် ။
Download Link : http://www.mediafire.com/download/nw909em0ygplq0n/Vol._3,_No._40.pdf
" ရင်ဆိုင်ရန်ခွန်အားများ လိုတဲ့အခါ " စာမူသည် ၂ဝ၁၄ ဂျွန်လ ( ၂၈ ) ရက် ၊ စနေနေ့ထုတ် NetGuidE နည်းပညာဂျာနယ် အတွဲ ( ၃ ) ၊ အမှတ် ( ၄ဝ ) ၊ စာမျက်နှာ ( ၂၂ ) တွင် ဖော်ပြပါရှိသည် ။
Download Link : http://www.mediafire.com/download/nw909em0ygplq0n/Vol._3,_No._40.pdf
No comments:
Post a Comment