A.L

ဆောင်းပါးရှင် - ကိုညီညီ ( တောင်ကြီး )

.
.
---- ၂ဝ၁ဝ ကုန်ခါနီးမှာ အလုပ်ကို မြန်မာကောင်လေးတစ်ယောက် ဝင်လာလို့ သင်ပေးဖူးတယ်။ သူက ဒီနိုင်ငံကို ( ၁၁ ) နှစ်သားအရွယ်မှာ မိဘတွေနဲ့လိုက်လာခဲ့ပြီး အလယ်တန်း၊ အထက်တန်းကျောင်းတွေပါ စုံအောင်တက်ခဲ့ရတယ်။ အင်္ဂလိပ် နဲ့ စပိန် စကားကျွမ်းကျင်တဲ့ မြန်မာလူမျိုးပြပါဆိုရင် သူ့ကိုပဲ ပြစရာတွေ့ဖူးတယ်။ အလုပ်အစုံလုပ်ဖူးတဲ့အထဲမှာ CNC မောင်းတာ၊ ဆူရှီလိပ်တာ၊ In & Out ဆန်းဝှစ် ဆိုင်မှာ မန်နေဂျာဖြစ်ခါနီးအထိလုပ်ခဲ့တာ၊ Casino မှာ လုပ်ဖူးတာ စတာတွေ သူပြောပြတယ်။ ရောက်တာမကြာသေးတဲ့ တောင်ကြီးသားအဖို့ ယောင်ပြီးမမှားရအောင် သူ့နားက ပညာပြန်ယူရတာတွေ အများကြီးပါ။

.
.
---- သူ့မြန်မာနာမည် ကျော် --, --, ကို “ ဘို ”  တွေ အသံထွက်ရတာခက်တော့ A.L ( အမည်လွှဲ ) ဆိုတဲ့ ဘို နာမည်နဲ့ကျောင်းတက်ခဲ့တယ်။ သူ့မှာ ကောင်းကွက်တွေအများကြီးပါ။ A.L က အထက်တန်းကျောင်းစ, တက်တဲ့အထိ စာတွေလိုက်နိုင်တယ်။ ( ၉ ) တန်း ရောက်တော့ ဘာသာစကားတစ်မျိုးရွေးရတဲ့အခါ စပိန်စကား - Spanish ကို ရွေးခဲ့တယ်။ ( ၁ဝ ) တန်းအောင်တော့ အချိန်ပိုင်းအလုပ် စ, ဝင်ခဲ့ပြီး အိမ်စားရိတ်ဝိုင်းရှာပေးကာ မိသားစုအားကိုးရတဲ့ သားငယ်ဖြစ်လာတယ်။ အစ်ကိုကျောင်းပြီးတော့ ကောလိပ်ဆက်တက်တုန်း A.L အချိန်ပိုင်းအလုပ်ကို ဖိလုပ်ရင်း မီးဖိုချောင်စားရိတ် ဖြည့်တင်းပေးခဲ့တယ်။ အလုပ်တွေပြောင်းရင်း ဘာသာစကား ပိုကျွမ်းကျင်လာသလို လူမှုဆက်ဆံရေးကောင်းလွန်းလို့ တခြားဘာသာ ဆန်းဒေးစကူး သီချင်းဆိုပွဲတွေ တက်ဆိုတဲ့ အထိ A.L ရဲ့ သူငယ်ချင်းလို့ပြောလိုက်ရင် အချင်းချင်း ခင်သွားကြတဲ့အထိပဲ။ စနေ၊ တနင်္ဂနွေ အလုပ်ပိတ်ရက်တွေမှာ ဗုဒ္ဓဘာသာဘုန်းကြီးကျောင်းက ဘာသာရေးပွဲ၊ ဈေးရောင်းပွဲ၊ အထိမ်းအမှတ်ပွဲတွေမှာ မြန်မာတွေ စုကြတဲ့အခါ A.L အမြဲတက်တက်ကြွကြွ ပါဝင်ခဲ့တယ်။
.
.
---- တစ်ခြားဆယ်ကျော်သက်တွေလို ချစ်သူရည်းစားရတော့  A.L မှာ ကောင်းတဲ့အချက်တွေ ရှိနေပြန်တယ်။ သူချစ်တဲ့သူကို ပွင့်ပွင့်လင်းလင်းဆက်ဆံပေမယ့် အတွေ့အထိမှာ စည်းကမ်းရှိတယ်။ ဘယ်လို ရေလာမြောင်းပေးလုပ်ပေသော်ငြားလည်း ဒါမျိုးကိစ္စမှာ သူမလွန်ခဲ့ဘူး။ တစ်ခါက ကျောင်းနေဖက် စပိန်နွယ်ဖွားမိန်းကလေး နဲ့ ချစ်ကြိုက်မိတဲ့အခါ ပဲစားကောင်မလေး ( မြန်မာတွေကြားမှာ Spanish စကားပြောလူမျိုးကို " ပဲစား " လို့ စကားဝှက် သုံးနှုန်းကြပါတယ် ) က A.L ကို အိမ်အလည် ခေါ်ပါတယ်။ ဒါနဲ့ A.L လိုက်သွားတဲ့အခါ ကောင်မလေးက သူမ အခန်းထဲဝင်ပြီး အကျီလဲဦးမယ်ဆိုတော့ A.L က ဧည့်ခန်းက စောင့်နေတယ်။ ခနကြာတော့ အခန်းထဲလိုက်ဝင်လာဖို့ A.L လက်ကိုလာဆွဲခေါ်တယ်၊ A.L လိုက်ဝင်သွားတယ်၊ ကုတင်ပေါ်မှာထိုင်လိုက်ကြတယ်။

.

.

---- ကောင်မလေးက သူမ ဘဝ ရဲ့ ရည်းစားဦးဇာတ်လမ်း အခန်းကို A.L နဲ့ စ, ချင်တယ်လို့ ပြောတဲ့အခါ A.L အရမ်းလန့်သွားပါတော့တယ်။ ကောင်မလေး ဘာတွေထပ်ပြောလည်းဆိုတာ A.L မကြားတော့ပါဘူး။ သူ့ခန္ဓာကိုယ်ကို သိုင်းဖက်ထားတာလည်း A.L မသိတော့ပါဘူး။ တဖြည်းဖြည်းနဲ့ A.L ကို ခုတင်ပေါ်ကိုဆွဲလှဲလိုက်တဲ့အချိန် " အိမ်မှာ ဘယ်သူမှမရှိဘူး၊ နင် ငါ့ကို ဘာမှ တာဝန်ယူစရာမလိုပါဘူး၊ ငါတို့ကြားမှာ ဘာနှောင်ကြိုးမှ ချည်မထားပါဘူးနော် " ဆိုပြီး " You're not responsible for anything. There is no string attached. " လို့ ကောင်မလေး ပါးစပ်က ချော့မော့ပြောနေတုန်းပါတဲ့။ သတိက လွတ်နေပါပြီ၊ A.L သူတစ်ခါမှမရောက်ဖူးတဲ့ ကမ္ဘာကို သွားတော့မယ်၊ ဟုတ်တယ် - သူတစ်ကယ်ရောက်တော့မယ်။

.

.

.

.

---- ကံကောင်းချင်တော့ " ဒီမှာ ... သား ... ကိုယ် တာဝန်မယူနိုင်ပဲနဲ့ မင်း ... ဘယ်မိန်းကလေးကိုမှ မကြံလေနဲ့ " ဆိုတဲ့ ကျေးဇူးရှင်ပါပါး ရဲ့ စကားကို သတိရပြီး ကုတင်ပေါ်ကနေ ဝုန်းကနဲ A.L ရုန်းထွက်လိုက်တယ်။ အခန်းဝကိုရောက်ဖိ်ု့ နာရီပေါင်းများစွာကြာတယ်လို့ ခံစားလိုက်ရတဲ့အချိန် နောက်မှာ ကောင်မလေးက လက်ကို ဆွဲထားပါသေးတယ်။ ဖြစ်ချင်တော့ ကောင်မလေးရဲ့အစ်ကို နဲ့ မောင် က အပြင်ကနေပြန်အလာ အိမ်ရှေ့ဖိနပ်ချွတ်မှာ ယောက်ျားစီး ရှူးဖိနပ် အပိုတစ်ရံတွေ့လိုက်တဲ့အခါ တစ်ယောက်က ကားဂိုဒေါင်ထဲကို အသံတိတ်ဝင်သွားပြီး နောက်တစ်ယောက် က ခြံနောက်ဖေး ကို ခြေဖော့ပြီး ဝင်ရောက်သွားပါတယ်။ အိမ်ထဲရောက်လို့ ဧည့်ခန်းမှာ ဘာမှမတွေ့တဲ့ ညီအစ်ကို ( ၂ ) ယောက်ဟာ တစ်ခန်းဝင် တစ်ခန်းထွက် စိတ်ထင်တဲ့ တစ်စုံတစ်ယောက်ကို ရှာပုံတော်ဖွင့်နေတာပေါ့။

.

.

---- ချိန်းထားရင်တောင် လွဲဦးမယ်၊ လက်ထဲမှာ ဘေ့စ်ဘောလ်ရိုက်တုတ် ကိုယ်စီကိုင်ထားတဲ့ ညီအစ်ကိုဟာ သူ့တို့ညီမ အခန်းတံခါးကနေ ပြေးထွက်လာတဲ့ A.L ရဲ့ ပုခုံးနဲ့တိုက်မိပါတော့တယ်။ တစ်ယောက်က ရမ်းသမ်းရိုက်လိုက်တာကို လက်ဖျံနဲ့တားလိုက်ရင်း အားကုန်ပြေးထွက်ရုန်းကန်ပြီး အိမ်အပြင်ကို ရောက်မှန်းမသိ A.L ရောက်လာတယ်။ လိုက်သူက နှစ်ယောက် ရှေ့ကပြေးတာ မာရသွန်မြန်မာ ဆိုတာကို မျက်စိထဲ မြင်ကြည့်လိုက်ကြပါ။ ကျောင်းရဲ့ P.E မှာ ပြေးရတာ အလကားမဟုတ်ဘူးလေ၊ သူကောင်းကောင်းအသုံးချလိုက်တယ်။ ကိုးရီးယားအချစ်ဇာတ်လမ်းတွဲရိုက်ဖို့ အဖိတ်ကြားခဲ့ရတဲ့ မြန်မာ ( ၁၁ ) တန်းကျောင်းသားလေး ရှောင်လင်ကွန်ဖူးရိုက်ကွင်းကနေ အပြီးအပြတ် ထွက်ပြေးလွတ်မြောက်လာခဲ့ပါတော့တယ်။ အဲဒီအချိန်ကစ, ပြီး ဘယ်မိန်းကလေး ဆီကိုမှ အိမ်ထဲ ဝင်မလည်တော့ပါဘူးတဲ့ဗျား။
.
.
---- ငွေရှာတတ်လာတဲ့ A.L ဟာ အချိန်ပိုင်းကနေ အချိန်ပြည့်၊ တစ်ပတ် နာရီ ( ၄ဝ ) ကျော် အလုပ်လုပ်လာတဲ့အခါ ကျောင်းစ, ပျက်လာတယ်။ မိဘတွေကတော့မသိပဲ သူ့ကို ကျောင်းသွားနေတယ်ပဲ ထင်ခဲ့တယ်။ တစ်ခုပြီးတစ်ခု ပြောင်းလိုက်လုပ်လိုက် ဖြစ်နေတုန်း ဆူရှီလိပ်သင်တန်းတက်ရင်း ကံမကောင်းစွာ ကျောင်းစာဟာ ဟိုးအဝေးကြီးမှာ ကျန်နေခဲ့ပါပြီ။ အစ်ကိုက ကျောင်းတက်ပြီးလို့ ဘဏ်မှာ ဝင်လုပ်ပေမယ့်  နောက်ဆုံးမှာ ဝယ်ထားတဲ့အိမ်ကြွေးက ရှိတာကကြောင့်  A.L အထက်တန်းမပြီးတော့ပါဘူး။ သူတို့ရဲ့အတွေးက ညီအစ်ကို နှစ်ယောက်ပေါင်းရှာပြီး အိမ်ဖိုးပေးမယ်၊ နောက် နှစ်အနည်းငယ်ဆိုရင် အိမ်ဖိုးလဲကျေ အားလုံးလဲအခြေကျ အိုကေမှာစိုပြေပေါ့။ မိဘတွေကို ကျေးဇူးဆပ်ရင်း အလုပ်လုပ်ကြတာ A.L တစ်ယောက် ဆူရှီဘက်မှာ ကျွမ်းကျင်လာတယ်။ ဆူရှီဆိုင်ရှင် က A.L ကို Las Vegas မြို့က ဆိုင်ကို ဦးစီးဖို့လွှတ်လိုက်ပါတယ်။ A.L က လပ်ဗေးဂက်စ် ရောက်လဲ ကြိုးစားတာပါပဲ။

.

.

.

.

---- လူငယ်သဘာဝ လွတ်လပ်ပြီဆိုတော့ အစုံရတဲ့ " မှော်မြို့တော် - Sin City " မှာ ငွေယားလေးရဖို့ A.L လောင်းကစား စ, လုပ်တတ်လာတယ်။ ပထမတော့နိုင်နေပေမယ့် လောင်းကစားသမားတို့ရဲ့ သွားရာလမ်းအတိုင်း အရှူံးကို ဆပြန်တိုး - Compound  " လိုက် " ရင်း လက်ထဲရှိတဲ့ငွေကုန်ပြီး စီးနေတဲ့ကားပါ ပေးလိုက်ရတဲ့အဆင့်အထိ အချိန်တိုအတွင်း ကျရောက်လာတယ်။ ခရက်ဒစ်ကဒ် ကနေ ငွေချေးရင်း ပထမပိုင်း ဒေါ်လာ ( ၁၈ဝဝဝ ) လောက်အထိ အကြွေးတင်တဲ့အထိ A.L မတုန်လှုပ်သေးပါဘူး။ " ငွေမျှော ငွေလိုက်လိုက် " နေပေမယ့် အသာစီးယူထားတဲ့ Casino ဒိုင်တွေရဲ့ လူလုပ်ကံ တွေကို ဘယ်လိုမှ မယှဉ်နိုင်ပါဘူး။ ဇွဲကြီး မဲကြီး နဲ့ လိုက်ကစားရင်း နောက်ဆုံး ဒေါ်လာ ( ၆ဝဝဝဝ ) အကြွေးတင်တဲ့အချိန် A.L ဟာ လောင်းကစားဝိုင်းတွေကနေ ထွက်လာခဲ့တယ်။ အိပ်ကပ်ထဲနှိုက်ကြည့်လိုက်တော့ တစ်မတ်စေ့ နှစ်စေ့ က အဖော်ပြုလို့ရယ်။ ဆိုင်ပြန်စရာ ကားလည်း မရှိတော့ဘူး။ ဆိုင်ပြန်ဖို့ တက္ကစီးငှားခလည်းမကျန်တော့တဲ့အတူ လက်ကျန်ငွေ ငါးမူး နဲ့ ရေသန့်တစ်ဗူးဝယ်သောက်ရင်း လမ်းလျှောက်ပြန်ခဲ့တယ်။ တစ်ချက်တစ်ချက် မ, ရွှေ့လိုက်တဲ့ ခြေလှမ်းများဟာ ဆူရှီလိပ် လို့ ညောင်းတဲ့ ပခုံးထက် ပို၍ လေးလံနေတာ A.L တစ်ယောက် ကောင်းကောင်းကြီး သဘောပေါက်သွားပါပြီ။
.
.
---- ဒိလို နဲ့ A.L ဟာ အိမ်တွင်းအောင်းနေပြီး မိဘတွေနေတဲ့အိမ်ကို မပြန်ရဲပဲ ဖြစ်နေတာ မကြာပါဘူး၊ ဘဏ်တွေက အကြွေးတောင်းတဲ့စာ တွေ့သွားတော့ အဖြစ်မှန်တွေသိသွားတဲ့ A.L အမေက မူလအိမ်ပြန်ခေါ်ပါတယ်။ မိဘတွေကလည်း အကြွေးဆပ်ဖို့မရှိတဲ့အခါ ဘဏ်ကို ဖုန်းဆက်ပြီင်္း လူမွဲစာရင်းကြေငြာရပါတော့တယ်။ အဲဒီအချိန်ကစ အလုပ်အမျိုးမျိုးပြောင်းပြီး ကျွန်တော့အလုပ်ကို သူပြောင်းလာခဲ့တဲ့အထိပါ။ အခုလက်ရှိသူ ကျောင်းဆက်မတက်နိုင်ပါဘူး။ အင်္ဂလိပ်စကားကို ဘို ရှူံးအောင်ပြောနိုင်ပေမယ့် မြန်မာနိုင်ငံ ( ၈ ) တန်း Grammar ကိုတောင် သူမယှဉ်နိုင်တော့ဘူး။ စာလုံးပေါင်းတွေ အမျိုးမျိုးမှားပြီး ဘယ်အရာမဆို တွေးတောဆင်ခြင်တတ်တဲ့ဥာဏ် တစ်နည်းအားဖြင့် အမေရိကန် ပညာရေးစံနစ်ကျောရိုး- Critical Thinking သူ့မှာ မကျန်ရှိပါဘူး။ လူလည်တော့လူလည် ဒါပေမယ့် စာမတတ်တဲ့လူလည် ဖြစ်လာတယ်။ သူဋ္ဌေးတော့ သူဋ္ဌေး ဒါပေမယ့် လူမွဲစာရင်းခံသူဋ္ဌေး တစ်ဖြစ်လဲ A.L ဟာ သူရဲ့ အကြွေးဝယ်နိုင်မှုစွမ်းအား - Credit Score ကို စစ်ကြည့်တာမှာ လောင်းကစားမလုပ်ခင်က ( ၈၅ဝ ) ရှိရာကနေ ( ၃၈ဝ ) အထိ ထိုးဆင်းသွားတယ်။ အမေရိကားရောက် ဆင်းရဲသားပုံစံအတိုင်း ငွေသား - Cash ပဲ သုံးတဲ့အဆင့်ရောက်သွားတယ်။

.

.

---- နောက်ဆုံးမတော့ ပညာတတ်ရင် လက်ဖျားငွေသီးတဲ့ အမေရိကားမှာ တစ်နာရီ ( ၈ ) ဒေါ်လာ ကနေ ပြန်စလုပ်ရပြန်ရော။ ကိုယ်ကျင့်တရားကောင်းပေမယ့် စာရိတ္တပျက်တဲ့အခါ ကျွမ်းထိုးမှောက်ခုံဖြစ်ရတဲ့ လူ့ဘဝဇာတ်ခုံပေါ် ရုံမသွင်းပဲ ကပြလိုက်သလို A.L ဘဝ က မလှပခဲ့ပါ။ ဒါပေမယ့် A.L ကို ဘယ်တော့ကြည့်ကြည့်ပျော်ပျော်ပဲ။ စကားပြောတော့ အသံအကျယ်ကြီး၊ ဟေးလေး ဝါးလား နဲ့ ဘာမှ အလေးအနက်ရှိပုံမပေါ်ဘူး။ ဒါပေမယ့် သူပြောပြတယ်။ “ တော်ရုံတန်ရုံ ကျွန်တော် စိတ်မတိုဘူး၊ တစ်နှစ်လုံးနေတောင် နှစ်ခေါက်လောက်ပဲ စိတ်တိုဖြစ်တယ်။ တစ်ခါတိုရင် လူသတ်ချင်လောက်တဲ့အထိဖြစ်တတ်တော့ အန္တရာယ်ရှိတယ်တဲ့။ ကျွန်တော့ကိုယ်ကျွန်တော်လည်း ဒါကို သိတယ်။ ဒါကြောင့် ကျွန်တော် ပျော်ပျော်ပဲ နေတယ် “ တဲ့ ။

.

.

---- လူတွေက A.L လက်ရှိဘယ်လိုနေထိုင်တယ်ဆိုတာပဲ မြင်တာ သူ့အတွင်းစိတ်ကို မသိကြဘူး။ သူကလည်း ပကတိစိတ်ကို မရိပ်မိအောင် နေတတ်တယ်။ မြန်မာကြားထဲမှာ စကားပြောရင်း စ, လိုက် နောက်လိုက်နဲ့ အရိပ်မည်းကြီးကို ကြိုးစားမေ့ဖျောက်နေဟန်တူတယ်။ အစ်ကို က ဘဏ်မန်နေဂျာဖြစ်သွားပြီး မြန်မာနိုင်ငံက ကောင်မလေးကို ပြန်လက်ထပ်တယ်။ သူ့အမျိုးသမီးကို အမေရိကားခေါ်လာကာ  မိဘအိုနှစ်ပါးကို ပစ်ပြီး အိမ်ခွဲဆင်းသွားတော့ A.L တစ်ယောက်ရှာစာ ကို မိဘတွေ အားကိုးရတော့တာပေါ့။ ဒါကိုက ချစ်စရာကောင်းတဲ့ A.L ပါ။ လူငယ်မှာ အမှားမကင်းပါဘူး။ မှားမှန်းသိပြင် ဒါကို သိဖို့ပဲလိုတယ် မဟုတ်လား။ အခုထိ လူပျိုရည်မပျက်သေးတဲ့၊ လွယ်နေတောင်မှ သီလတစ်ပါးကို ထိန်းထားနိုင်တဲ့ ဆယ်ကျော်သက်စိတ်ဓါတ် က ပိုချစ်စရာကောင်းတယ်လို့ မြင်မိပါတယ်။

koko2yeye@gmail.com

" A.L " စာမူသည် ၂ဝ၁၄ စက်တင်ဘာလ ( ၂ဝ ) ရက်နေ့၊ စနေနေ့ထုတ် NetGuide နည်းပညာဂျာနယ် အတွဲ ( ၃ ) ၊ အမှတ် ( ၅၂ ) ၊ စာမျက်နှာ ( ၄၇ ) တွင် ဖော်ပြပါရှိသည်။ 

Download Link : http://www.mediafire.com/download/53d8njc4z3d33n9/Vol._3,_No._52.pdf