 |
| ဆောင်းပါးရှင် - ကိုညီညီ (တောင်ကြီး) |
Ventilator-ဗင်တလိတ်တာ ဆိုတာ အသက်ရှူလမ်းကြောင်းကတစ်ဆင့်လေရှူသွင်းနိုင် လေရှူထုတ်နိုင်အောင် လူနာကိုအောက်စီဂျင်ပေးတဲ့အသွင်းအထုတ်စက်တစ်မျိုးဖြစ်ပါတယ်။
"ဘယ်လိုလူနာတွေ Ventilator ကိုသုံးဖို့လိုတာလဲ?"
ခန္ဓာကိုယ်အားမရှိလို့၊ ကိုယ်ခံအားနည်းပါးလို့၊ အသက်ရှူပေမယ့် လုံလောက်တဲ့လေ (အောက်စီဂျင်) မရတဲ့လူနာတွေက Ventilator ကိုသုံးဖို့လိုပါတယ်။
"Ventilator ကို ဘယ်နေရာမှာသုံးတာလဲ?"
အထူးကြပ်မတ်ဆောင်-ICU (Intensive Care Unit) မှာ ကိုယ်ပိုင်ခွန်အားနဲ့အသက်မရှူနိုင်တဲ့လူနာတွေကို Ventilator သုံးပြီးအသက်ဝဝရှူစေနိုင်ပါတယ်။ Ventilator အများစုမှာ သူ့ချည်းချည်းမဟုတ်ဘဲ အတိုအရှည်ညှိနိုင်တဲ့လေပိုက်နဲ့ချိတ်ဆက်ထားပြီး စောင့်ကြည့်မျက်နှာပြင်-Monitor တစ်ခု အမြဲလိုလိုပါရှိပါတယ်။
"လူနာတစ်ယောက်ဟာ Ventilator သုံးပြီးအချိန်ဘယ်လောက်ကြာအောင်နေနိုင်ပါသလဲ?"
လနဲ့ချီပြီးနေနိုင်ပါတယ်။ လူနာပေါ်မူတည်ပြီး နလံထချိန်ကွာခြားနိင်ပါတယ်။ ရောဂါအပြင်း အပျော့ပေါ်မှာအခြေခံပြီး လဲလျောင်းနေတဲ့လူနာရဲ့အဆုတ်ဟာ သဘာဝအလျောက် အမှီအခိုကင်းကင်း (လေသွင်း/လေထုတ်) အသက်ဘယ်လောက်မြန်မြန်ပြန်ရှူနိုင်သလဲအပေါ်မှာအဆုံးအဖြတ်ပေးပါလိမ့်မယ်။
"လူနာတစ်ယောက်ဟာ Ventilator သုံးနေချိန်မှာသတိရှိနေနိုင်ပါသလား?"
ကုသခံနေရင်းနဲ့လူနာဟာ သက်သာလာတဲ့အချိန်နဲ့တစ်ပြေးညီ သတိရှိ-Conscious ဖြစ်နေနိုင်ပါတယ်။ သတိမေ့နေရင်လည်း ခန္ဓာကိုယ်ရဲ့ကိုယ်ခံစွမ်းအားနဲ့အသက်ရှူနေရင်း Ventilator ကို မှီခိုနေရဦးမှာဖြစ်ပါတယ်။
"Ventilator သုံးနေတဲ့လူနာရဲ့နားဟာ အကြားအာရုံရှိပါသလား?"
အများအားဖြင့် Ventilator အားကိုးပြီးအသက်ရှူနေသူလူနာကိုနားမကြားဘူးလို့အထင်မှားလေ့ရှိကြတယ်။ အမှန်က လူနာဟာမှိန်းနေတာ၊ သတိမေ့နေတာ၊ သိနေရင်တောင်မတုံ့ပြန်နိုင်တာ၊ စကားပြောထွက်ဖို့ လှုပ်ရှားပြဖို့ခွန်အားမရှိတာကြောင့် လူနာကြည့်သူတွေကအော်ပြောတတ်လေ့ရှိကြတယ်။ ဒီအပြုအမူတွေလူနာရှေ့မှာမလုပ်သင့်ပါ။ လူနာက Ventilator သုံးနေပေမယ့် နားကြားပါတယ်။
"Ventilator သုံးနေတဲ့လူနာဟာလန်းဆန်းနလံထလာနိုင်ပါသလား?"
ကုသမှုခံနေရသူလူနာအများစုဟာ အိပ်ငိုက်နေလေ့ရှိပါတယ်။ ဆေးအရှိန်မပြယ်သေးတာကြောင့် မျက်လုံးတွေဖွင့်ဖို့ခက်ပါလိမ့်မယ်။ ပါးစပ်မှာပိုက်တပ်ထားတာကြောင့်လည်း စကားပြောနိုင်မှာမဟုတ်ပါ။ နလံထဖို့ကြိုးစားနေတဲ့လူနာကိုအနှောင့်အယှက်မပေးသင့်ပါ။
"Ventilator သုံးနေရင်းနှလုံးခုန်ရပ်သွားနိုင်ပါသလား?"
ဦးနှောက်ရပ်သွားပြီလို့သတ်မှတ်ခံရတဲ့လူနာဟာသေဆုံးသွားပေမယ့် အောက်စီဂျင်ကိုပိုက်တွေကနေအဆုတ်ထံကိုမပြတ်ပို့ပေးနေတဲ့ Ventilator ကြောင့် နှလုံးဆက်ခုန်နေနိုင်ပါတယ်။ ဒီစက်ကိုရပ်ဆိုင်းလိုက်တာနဲ့ ခပ်မှေးမှေးခုန်နေတဲ့နှလုံးရပ်သွားမှာပါ။
