( ၁ဝ ) တန်းကျောင်းသားရဲ့ ကမ္ဘာ့သမိုင်းဖတ်စာအုပ်

ဆောင်းပါးရှင် - ကိုညီညီ ( တောင်ကြီး )

.

.

ကျောင်းက ဖတ်စာအုပ်တွေ ငှားပေးလိုက်တိုင်း ကျွန်တော်က “ စွမ်း ” အတွက် စာအုပ်ဖုံးပေးရတယ်။ ပြီးခဲ့တဲ့နှစ်က ( ၄ ) အုပ်၊ ဒီနှစ်တော့ အခု သူ ( ၂ ) အုပ်ယူလာတယ်။ ဒီနိုင်ငံရဲ့ ဖတ်စာအုပ် ပေါ်လစီ က အထက်တန်းကျောင်းအထိ သဘောတူညီမှုတစ်ခုအရ ကျောင်းသားကို ကျောင်းအုပ်ချုပ်ရေးရုံးက စာသင်နှစ်ပြီးသည်အထိ ငှားပေးတယ်။ ဒီအတွက် ငွေပေးစရာမလိုဘူး။ ကျောင်းသားကြောင့် တစ်ခုခုဖြစ်ခဲ့ရင် ဒါမှမဟုတ် ပျောက်ဆုံးခဲ့ရင် ခန်းမှန်းခြေ ( ၆၅ ) ဒေါ်လာ ပေးလျှော်ရမယ်လို့ဆိုတယ်။ စာအုပ်ရဲ့ထိပ်ဆုံးမှာ “ This Book Is The Property of ” ဆိုပြီး ကျောင်းနံမည်ရေးထားတယ်။

.

.

အောက်က အကွက်ထဲမှာမှ ကျောင်းသားဘယ်သူက ဘယ်စာသင်နှစ်အတွက်ငှားတယ်ဆိုပြီး ရေးစေတယ်။ ပြီးတော့ စာအုပ် Condition မှာ ထုတ်ပေးလိုက်တုန်းက Issued အခြေအနေနဲ့ ပြန်အပ်ချိန် Returned အခြေအနေကို မှတ်တမ်းတင်ထားဖို့ အကွက်လေးတွေပါတယ်။ ကျောင်းပိုင်အနေနဲ့ ကွန်ပျူတာဘားကုဒ်ပါတဲ့ ကဒ်ပြားလေးကပ်ထားပြီး စာအုပ်ဋ္ဌာန က စကင်နာ Scanner နဲ့ ကျောင်းသားကဒ်ကို တွဲပြီး သိမ်းဆည်းပါတယ်။

.

.

တစ်အုပ်က အသစ်စက်စက် World History ကမ္ဘာ့သမိုင်းဖတ်စာအုပ်ဖြစ်နေပြီး ချိန်လိုက်တာ ( ၅.၃၄ ပေါင် ) လေးတယ်။ ၂ဝ၁၂ ခုနှစ် ဘော့စတွန်မြို့မှာ ( ၇ ) ကြိမ်မြောက်ရိုက်နှိပ်တဲ့ ( ၉၉၂ ) စာမျက်နှာပါ ကဒ်ထူဖုံး စာအုပ်ဖြစ်ပြီး ပင်ဆန်ဗေးနီးယားတက္ကသိုလ် က ပါမောက္ခ ( ၂ ) ဦးတို့က ရေးသားပါတယ်။ စိတ်မထင်လို့ အမ်မဇွန်အွန်လိုင်းစတိုးမှာရှာကြည့်လိုက်တာ အသစ်ဆိုရင် ( ၂၁ဝ ) ဒေါ်လာ နဲ့ အသင့်တင့်သုံးပြီးသားဆိုရင် ( ၁၆၅ ) ဒေါ်လာပါ။ ဒါတောင် ဝယ်မယ်ဆိုရင် ကျသင့်ခွန်နဲ့ စာတိုက်ပို့ခ ထပ်ပေးရမယ်ဆိုတော့ ဒီထက်ပိုကုန်ကျပါဦးမယ်။

.

.

အခုက ကျောင်းက အခမဲ့ငှားပေးလိုက်တာဆိုတော့ ကလေးကို သပ်သပ်ရပ်ရပ်ကိုင်ခိုင်းမှ ရမယ်။ လျော်ရမယ်ဆိုရင် မစားသာဘူးလေ။ အထဲမှာ Chapter ( ၃ဝ ) ပါပြီး မာတိကာ၊ မြေပုံမာတိကာ နဲ့ Documents ကဏ္ဍတွေပါတယ်။ ကျောင်းသားမဟုတ်တဲ့ ကျွန်တော်စိတ်အဝင်စားဆုံးက CHRONOLOGIES အပိုင်းပါ။ လူသား နဲ့ လူမှုအသိုင်းအဝိုင်းဖြစ်တည်လာပုံအဆင့်ဆင့်ကို အသေးစိတ်ရေးပြထားလို့ အချိန်ပေးပြီးဖတ်ရင် တော်တော်စိတ်ဝင်စားစရာကောင်းမယ့် စာအုပ်ပါ။

.

.

 .

.

တစ်ဆက်တည်း ကျွန်တော်စဉ်းစားကြည့်တယ်။ ဒီစာအုပ်ကို ကလေးကို သင်တော့ သူဘာတတ်လာမလဲ? လူဖြစ်လို့ လူအကြောင်းသင်တာပေါ့လို့ ရိုးရိုးလေးပဲ တွေးမိတယ်။ ရှေးအစဉ်အဆက်ဆက် လူတွေဟာ ရှာဖွေတွေ့ရှိမှုတစ်ခုခုရတိုင်း တိုးတက်တီထွင်ခဲ့လိုက်ကြတာ အခုနောက်ဆုံး iPhone နဲ့ မောင်းသူမဲ့ယန္တရားများ - Drone ယာဉ်တွေအထိပဲလေ။ အမှားများစွာတွေ့ခဲ့တဲ့ လူ့ယဉ်ကျေးမှုကို နောင်လာနောက်သားတွေ သိမှ ပြင်နိုင်မယ်။ ပြင်ပြီးသကာလ ရှေ့ဆက်သွားဖို့ စဉ်းစားနိုင်ပြီဆိုရင် တူညီတဲ့အမှားမကျူးလွန်စေတော့ဘူး။ ဒါကြောင့် သမိုင်း ဟာ စာသင်သားအတွက်အရေးကြီးပါတယ်လို့ မြင်မိပါတယ်။

.

.                                    

စာရေးဆရာကြီးများပြောသလို ဟိုလူ့ငဲ့ရ ဒီလူ့ငဲ့ရ နဲ့ သမိုင်းကို အမှန်မပြောဘူးဆိုရင် လူ့လောက ကို သစ္စာဖောက်ရာကျတယ်ဆိုတာ ကို မှတ်သားဖူးပါတယ်။ ဒီစာအုပ်မှာ ဒုတိယကမ္ဘာစစ်ပြီးတဲ့နောက်ပိုင်းအထိပါလို့ လူသားအကြောင်း အပြည့်အစုံးနီးပါးပါတာ တွေ့ရတယ်။

.

.

လေဘာဒေး ကျောင်း ( ၃ ) ရက် ဆက်တိုက်ပိတ် သတ္တပတ်မှာ စွမ်း အိမ်စာ စလုပ်ရပါတယ်။ သူ့ကိုလည်း အိမ်စာတွေ ပြီးမှာ တစ်ခြားကိစ္စတွေလုပ်ဖို့ အမြဲမှာထားတယ်။ ပြီးတော့ ကျောင်းတက်တာကောင်းတယ်၊ ပညာသင်နေသူဟာ တစ်နေ့တစ်နေ့ အသစ်တွေကို သိခွင့်ရနေတယ်။ ဒီသင်ခန်းစာတွေက ကိုယ့်ကို တစ်ခုခု အမြဲသင်ကြားပေးနေတယ်လို့ ဆုံးမ ကြည့်တယ်။ သူက ဟုတ်ပါတယ် .. အသက်လည်းကြီးလာတော့ တစ်ဖြည်းဖြည်း တာဝန်ယူမှုက ပိုများလာတယ်လို့ ပြန်ပြောရှာတယ်။ 

.

.

.

.

တစ်ဆက်တည်း သူက အခုဆို အပြေးလည်းပါ၊ အတန်းတစ်တန်းလည်း တက်လာတော့ နားတဲ့အချိန်ဟာ အိမ်စာလုပ်ဖို့ဖြစ်လာတယ်၊ သီးသန့်နားဖို့အချိန်မရှိတော့ဘူးလို့ အားငယ်သလို ပြောပြတယ်။ အကျင့်တစ်ခုကောင်းတာက သူအိမ်စာတွေကို ချန်မထားဘူး။ ပေးတဲ့နေ့တိုင်းပြီးအောင်လုပ်တယ်။ နောက်နေ့ ဆရာ / ဆရာမ ကို ပြန်ထပ်တယ်။ ပင်ပန်းတယ်လို့ ပြောမယ်ဆိုလည်း ပြောစရာပါပဲ။ ဒီနေ့တစ်ရက်တည်း သူဖတ်ရတဲ့ အင်္ဂလိပ်စာအုပ် ကမ္ဘာ့သမိုင်းအိမ်စာက ( ၃၈ ) မျက်နှာ။

.

အထက်မှာ ဖတ်စာအုပ် ပုံများ နဲ့ မြန်မာနိုင်ငံမြေပုံပါ စာမျက်နှာကို ဖော်ပြပေးလိုက်ပါတယ်။

.

koko2yeye@gmail.com

" ( ၁ဝ ) တန်းကျောင်းသားရဲ့ ကမ္ဘာ့သမိုင်းဖတ်စာအုပ် " စာမူသည် ၂ဝ၁၄ အောက်တိုဘာလ ( ၂၅ ) ရက်နေ့၊ စနေနေ့ထုတ် NetGuide နည်းပညာဂျာနယ် အတွဲ ( ၃ ) ၊ အမှတ် ( ၅၇ ) ၊ စာမျက်နှာ ( ၄၇ ) တွင် ဖော်ပြပါရှိသည်။ 
Download Link :http://www.mediafire.com/download/yn4vkd544p50jc1/Vol._3,_No._57.pdf