ကားပူးလ်တော့စီးမယ် ဒိတ်တင်းတော့မလိုက်ပါရစေနဲ့

ဆောင်းပါးရှင် - ကိုညီညီ ( တောင်ကြီး )

.
.
မြန်မာနိုင်ငံမှာ ဘာအခကြေးငွေမှမပေးရတဲ့ ကားကြုံစီးတာကို အမေရိကားမှာ ကားပူးလ် - Carpool စီးတယ်လို့ခေါ်ပြီး ထိုက်သင့်တဲ့ငွေကြေးပေးရပါတယ်။ ငွေစကားပြောဖို့မကောင်းသူများကြားမှာတော့ သူတစ်လှည့် ကိုယ်တစ်လှည့် တစ်ရက်ခြားစီ၊ တစ်ပတ်ခြားစီ ကိုယ့်ကားကိုယ် ထုတ်မောင်းကြတယ်။ ကားမရှိသူ၊ ကားမောင်းလိုင်စင်မရသေးသူ၊ လိုင်စင်ဆိုင်းငံ့ခံထားရဖူးသူ၊ ကားမမောင်းတတ်သူများကျပြန်တော့ တစ်ကြောဘယ်လောက် စသဖြင့် ငွေရှင်းစီးနင်းကြပါတယ်။ အဓိက ကိုယ့်ကားဆီးဖိုးတစ်ဝက်သက်သာနိုင်တာမို့ အိမ်နီးနားချင်းဘယ်သူရှိလဲ အလုပ်မှာရှာကြတယ်၊ ကျောင်းမှာ သူငယ်ချင်းတွေကြားမှာ မေးကြတယ်။

.

ကားမောင်းလိုင်စင်ဖြေဖို့ အသက်မပြည့်သေးတဲ့သားသမီးတွေရဲ့မိဘများက သူငယ်ချင်းမိဘများနဲ့ ညှိပြီး တစ်ဦးက မနက်ပို့ နောက်တစ်ဦးက ကျောင်းဆင်းကြိုနဲ့ အဆင်ပြေအောင်ညှိကြတယ်။ မနက်အလုပ်လုပ်ပြီး နေ့လည်အလုပ်ကပြန်ချိန် ကလေးကျောင်းကြိုတဲ့မိဘတွေ ဒီနည်းလမ်းနဲ့  အဆင်ပြေစေသလို ညနေဘက် - Swing Shift အလုပ်လုပ်တဲ့မိဘတွေကလည်း အိပ်စက်အနားယူပြီး မနက်ကျမှ ကလေးကျောင်းထပ်ပို့ရလို့ အသက်ရှူချောင်စေပါတယ်။ ဒီအထိက အားလုံးအဆင်ပြေနေပုံပါပဲ။

.

အလုပ်အတွက်ပြင်ဆင်ချိန် နဲ့ အလုပ်သွား-အလုပ်ပြန် - Commute အချိန်တွေဟာ ပုံမှန်အလုပ်ချိန် ( ၈ ) နာရီ ရဲ့ ( ၂ဝ ) ရာခိုင်နှုန်းခန့် ရှိပါတယ်။ အချိန်ပိုလုပ်ရသူတွေအတွက် အားလပ်ချိန်ဆိုတာ မရှိသလောက်ပါပဲ။ တစ်နေ့ ( ၁ဝ ) နာရီလုပ်ရသူတစ်ယောက်ဟာ အိပ်ယာထစကနေ အလုပ်သွားပြီး အိမ်ပြန်ရောက်ချိန်အထိ စုစုပေါင်း ( ၁၂ ) နာရီလောက် အချိန်ကုန်ပါတယ်။ ဒါဟာ သဘာဝကပေးတဲ့ နေ့ရက်သက်တမ်းရဲ့ တစ်ဝက်ပါ။ အိမ်မှာ ချက်ပြုတ်၊ စားသောက်၊ အဝတ်လျှော်၊ အိမ်မှုကိစ္စလုပ် စတာတွေအားလုံးနှုတ်ပြီး အိပ်ချိန် ( ၆ ) နာရီကို ထပ်ခုတ်ချလိုက်ရင် ကိုယ်ပိုင်အားလပ်ချိန်ဆိုတာ ရှာမှရှားတဲ့ အမေရိကားကိုယ်တွေ့အရသာကို နဖူးတွေ့ ဒူးတွေ့ကြုံဖူးကြသူတိုင်း သိကြမှာပါ။

.

.

ဒီနေရာမှာ လူတွေဟာ အလုပ်မှာပဲနေ၊ အလုပ်မှာပဲစား၊ အလုပ်မှာပဲ အချိန်ကုန်ကြတော့ မသင့်တော်တဲ့အပျော်တွေရှာဖို့ကြိုးစားလာခဲ့ကြတယ်။ အားလုံးတော့မဟုတ်ပါ။

.

ကျွန်တော်တွေ့ဖူးတဲ့ထဲက တစ်ချို့အကြောင်း ဖတ်ရရင် ဆင်ခြင်စရာပါ။ မိနစ် ( ၅ဝ ) ခန့်မောင်းပြီးအလုပ်တက်ရတဲ့ လုပ်ဖော်ကိုင်ဖက် ( ၂ ) ဦးဟာ ကားပူးလ်စီးကြတယ်။ အတူသွား အတူလာ၊ အားလပ်ချိန် - Break လည်းအတူတူ အားလုံးကို အဆင်ပြေလို့။ ကြာလာတော့ လူတွေရဲ့မျက်စိထဲမှာ ပြောစရာတွေ ကိစ္စလေးတွေရှိလာတယ်။ အကြောင်းရင်းစစ်တော့ တစ်ယောက်က အမျိုးသားဖြစ်ပြီး နောက်တစ်ယောက်က အမျိုးသမီးဖြစ်နေလို့ပါ။ ( ၂ ) ယောက်စလုံးက အိမ်ထောင်ရှိကြတယ်တဲ့အပြင် ကလေးတွေကိုယ်စီနဲ့ပါ။

.

ပုံမှန်အလုပ်တက်တဲ့ မနက် ( ၇ ) နာရီမျိုးဆို အကြောင်းမဟုတ်ဘူး .. အချိန်ပိုဆင်းရတဲ့ မနက် ( ၅ ) နာရီ ဒါမှမဟုတ် ( ၆ ) နာရီ အရောက်သွားရတဲ့ရက်တွေဆို အစောကြီး ( ၃ ) နာရီကျော်ကတည်းက ထပြီး ပြင်ရဆင်ရပြီပေါ့။ ရှင်းရှင်းပြောရရင် အဲဒီအမျိုးသမီးရဲ့ ယောက်ျားနဲ့ ဘယ်နှစ်နာရီမှ မအိပ်ရသေးဘူး ကားပူးလ်လာကြိုသူက အိမ်ရှေ့ရောက်နေပြီ။ ကားပေါ်မှာကြာတဲ့အချိန်နဲ့ အလုပ်ချိန်မှာ ထိတွေ့တဲ့ စုစုပေါင်းအချိန် ( ၁၃ ) နာရီလောက်ဟာ ကိုယ့်ကာမပိုင်ယောက်ျားနဲ့ မိသားစုအတွက် ပေးရတဲ့အချိန်မဟုတ်ပဲ တစ်ခြားပုရိသယောက်ျားတစ်ဦးနဲ့ဖြစ်နေတာက အဓိက ပြသနာပါ။

.

တစ်ကယ် ထဲထဲဝင်ဝင်သိသူတွေက သူတို့ ( ၂ ) ယောက်ဟာ ထူးထူးခြားခြားဘာမှ ငြိစွန်းတာ မရှိမှန်းသိနေသော်ငြားလည်း ပတ်ဝန်းကျင်ရဲ့ တံတွေးခွက်မှာ နေ့တိုင်း အဝေဖန်ခံရလေတယ်။ ဒီလိုနဲ့ လပေါင်းများစွာကြာပြီး နောက်ဆုံး ကားပူးလ်မောင်းပေးသူ လုပ်ဖောက်ကိုင်ဖက်အမျိုးသား နောက်ထပ်အလုပ်တစ်ခုပြောင်းသွားပြီးသကာလ အဲဒီအမျိုးသမီးလည်း ကိုယ်တိုင်ကားမောင်းပြီး အလုပ်တက်တော့မှ သမားရိုးကျအတိုင်း ပတ်ဝန်းကျင်နဲ့အဆင်ပြေသွားတော့တယ်။ ဒီအခါကျမှ အပြောအဆိုခံရတဲ့ဘဝကနေ လွတ်မြောက်သွားတော့တယ်။

.

နောက်တစ်မျိုးက Dating အကြောင်းပါ။ အလုပ်မှာ အတူလျှောက်လည်ဖို့ ဒိတ် ရအောင်ကြိုးစားသူ ရှားရှားပါးပါး ( ၁ ) ယောက် တွေ့ဖူးတယ်။ လူမျိုးကိုတော့ အထူးမပြောလိုပါ။ ကျွန်တော်တို့မြန်မာနိုင်ငံနဲ့မဝေးတဲ့ အာရှတိုက်ထဲကပါပဲ။ သူက အမေရိကန်မြေမှာမွေးတယ်၊ ဘို စကားဆိုလည်း မွှတ်နေတာပဲ၊ လူမှုရေးလည်း နားလည်တယ်။ ကြည့်တော့လူက ကုတ်ကုတ်၊ မိန်းကလေး ( မိန်းမ ) တွေနဲ့ စကာပြောဖို့ပဲ လိုက်ချောင်းနေတယ်။ လူရွေးကလည်းတော်မှတော် အာရှတိုက်ကပဲဖြစ်ဖြစ် ဒီနိုင်ငံမွေးပဲ ဖြစ်ဖြစ် ဘို စကားကျွမ်းပြီး ဘို ယဉ်ကျေးမှုနဲ့ရင်းနှီးသူမှ သူက လိုက်ကပ်တယ်။ အလုပ်အားရင် စကားပြောဖို့လူပဲ လိုက်ရှာနေတတ်တယ်။ အလုပ်လုပ်နေရင်းတောင် သူများဘယ်သူအားလည်း အာရုံထားနေတတ်ပြီး တစ်ချို့အားတာနဲ့ သူ့အလုပ်ပစ်ထားပြီး မိန်းကလေးတွေကို အမိအရ စကားပြောတယ်၊ ဝေးလေးဝါးလား လုပ်တာလည်း ပိုင်သလားမပြောနဲ့။ မိန်းကလေးတွေဆိုတာမျိုးကလည်း ဒီလို အာဝဇ္ဇန်းရွင်သူကို ပိုကြွေတယ်မဟုတ်လား .. အထူးသဖြင့် အမေရိကားမှာ အင်္ဂလိပ်စကားကျွမ်းကျွမ်းကျင်ကျင်ပြောနိုင်သူကိုပေါ့။

.

အလုပ်ထဲကခေါင်းဆောင် - Lead က သူအလုပ်လုပ်တဲ့ ထွက်နှုန်း - Out Put ကို အမြဲကြည့် - Monitor လုပ်လေ့ရှိတယ်။ ကိန်းဂဏန်းကျဆင်းလာတော့ သူ့ကို ဂရုတစိုက် မျက်စိဒေါက်ထောက်ကြည့်တဲ့အခါ အလုပ်ထဲက ဘိုမ တစ်ယောက်ကို ဒိတ်တင်း ရဖို့ ကြိုးစားနေတာ သိလာရတယ်။ အဲဒီ ဘိုမလေးက ခေါင်းဆောင်ရဲ့ အားကိုးရသူဖြစ်နေပြီး ခေါင်းဆောင်အကြောင်းရှိလို့ အိမ်စောပြန်တဲ့အခါ ကျန်ရှိတဲ့အလုပ်ခွင်ကို ထိန်းပေးနေသူ ဖြစ်နေပြန်တယ်။ ဒါကို တွေ့ရှိသွားတဲ့ ခေါင်းဆောင်ရဲ့စိတ်ထဲမှာ ဘယ်လိုမှ အဆင်မပြေတာ ကျွန်တော်သတိထားမိလိုက်တယ်။

.

ခေါင်းဆောင်အနေနဲ့ ဘာဆက်လုပ်မယ်ဆိုတာကတော့ သူပဲ သိပါလိမ့်မယ်။ သေချာတာတစ်ခုက ခေါင်းဆောင်ကနေ အထက်ကြီးကြပ်ရေးမှူး - Supervisor ကို ပြောပြတဲ့အခါ အဆိုပါကောင်လေးရဲ့ အလုပ်အကိုင် နဲ့ အနာဂါတ်ဟာ ယိုင်နဲ့လာနိုင်ပါတယ်။ လူက တော်၊ ပညာလေးက တတ်သနဲ့ စိတ်ဓါတ်မမှန်တဲ့အခါ ဒီလိုလူမျိုး တစ်ယောက်ကို လက်ကိုင်ထား အလုပ်ခန့်သုံးစွဲဖို့ ရေရှည်ဖြစ်ပါ့မလား စဉ်းစားကြည့်စရာပါ။

.

.

ရန်ကုန်တက္ကသိုလ် ( လှိုင်နယ်မြေ ) တက်တုန်းက နယ်ကလာတဲ့ ကျွန်တော့်အဖို့ ( ၄၈ ) မထသ၊ ( ၅၁ ) ဗိုလ်တစ်ထောင်ဟိုင်းလက်စီးမှ ကျောင်းကိုရောက်ပါတယ်။ အဆင်ပြေတဲ့သူငယ်ချင်းတွေထဲက နှစ်ယောက်လောက်ဟာ ကိုယ်ပိုင်ကားရှိတဲ့အခါ အိမ်နီးတဲ့သူငယ်ချင်းတွေက လမ်းကြုံလိုက်စီးကြတာ မှတ်မိပါသေးတယ်။ ငယ်ငယ်တုန်းက ကားကြုံလိုက်စီးကြတာ ရိုးရိုးပါ။ အခုလို အမေရိကားရောက်မှ ကားပူးလ်စီးတာ ဘယ်လိုဆန်းဆန်းပြားပြားဖြစ်သွားရလဲ ကျွန်တော်တော့ မစဉ်းစားတတ်တော့ပါဘူး။ နောက်ပိုင်း ကြိုပြောထားလိုက်မယ် .. " ကားပူးတော့စီးမယ် ဒိတ်တင်းတော့မလိုက်ပါရစေနဲ့ " ဗျာ .. ကြောက်လွန်းလို့ပါ။

.

koko2yeye@gmail.com

.

ဓါတ်ပုံ - အင်တာနက်

" ကားပူးလ်တော့စီးမယ် ဒိတ်တင်းတော့ မလိုက်ပါရစေနဲ့ " စာမူသည် ၂ဝ၁၅ ဖေဖော်ဝါရီလ ( ၂၁ ) ရက်နေ့၊ စနေနေ့ထုတ် NetGuide နည်းပညာဂျာနယ် အတွဲ ( ၃ ) ၊ အမှတ် ( ၇၄

) ၊ စာမျက်နှာ ( ၅၁ ) တွင် ဖော်ပြပါရှိသည်။ Download Link: http://www.mediafire.com/download/xgpukj3he9p3r6b/NetGudie+Vol+3%2C+Issue+74.pdf