မက္ကဆီကန်အမျိုးသမီးတစ်ယောက်ရဲ့ဖွင့်ဟဖြေကြားချက်

ဆောင်းပါးရှင် - ကိုညီညီ ( တောင်ကြီး )

.

.

ကျွန်မက ( ၁၉ ) နှစ်နဲ့အိမ်ထောင်ကျတာ။ ကျွန်မအမျိုးသားက ကျွန်မထက် ( ၁ဝ ) နှစ်ကြီးတယ်။ ဒါပေမယ့် ယုံမလားတော့မသိဘူး .. ကျွန်မတို့ထူတုန်းက လက်ထပ်ထားတာမဟုတ်ဘူး။ Don’t get me wrong .. အထင်တော့မလွဲနဲ့ဦးနော်။ ကျွန်မတို့က လင်မယား - Couple ဆိုတာ အမှန်ပါ။ ကလေး ( ၂ ) ယောက်ရှိတယ်။ သူတို့နှစ်ယောက်က ( ၈ ) နှစ်ကွာတယ်။ သားယောက်ျားလေးတွေချည်း မွေးထားတာ နည်းနည်းကြီးလာတော့ စကားက သိပ်နားမထောင်ချင်ဘူး။

.

အကြီးကောင်က နည်းနည်းငြိမ်တယ်။ အငယ်လေးက အချစ်ဆုံး၊ အသဲဆုံး၊ အဲ .. အဆိုးဆုံးတော့ မဖြစ်ချင်ပဲ ဖြစ်လာခဲ့တယ်။ ဒီအပိုင်းကို နောက်ပိုင်းမှာ ဆက်ပြောပြမယ်။ ပထမဦးဆုံးပြောချင်တာက လူတွေက ကျွန်မအမေရိကန်အစစ်ဆိုပြီး အတင့်ရဲပြီး မကြာခဏလာမေးတဲ့မေးခွန်းတွေထဲက “ မင်းတို့အမေရိကန်တွေ လက်မထပ်ပဲ ဘာလို့ အတူနေတာလဲ ” .. ဒါက ပထမမေးခွန်း။

.

.

ဒီလိုအကြောင်းအရာကို အမေရိကန်စုံတွဲကိုမေးတာ ဖြစ်သင့်ပါတယ်။ ဒါပေမယ့် “ ဘို ” အစစ်က ကျွန်မယောက်ျား။ ကျွန်မက မက္ကဆီကိုမှာမွေးပြီး ဒီမှာကြီးတာ။ ကျွန်မတို့ တက္ကဆက်ပြည်နယ်မှာနေတာအကြာကြီး။ သူနဲ့တွေ့တယ်၊ ချစ်ကြတယ်၊ တစ်ယောက်လိုချင်တာ တစ်ယောက်လိုက်လျောညှိနှိုင်းပြီး အိမ်ငှားနေတယ် .. အိုးအိမ်ထူထောင်တယ်။ ဒီလောက်ပါပဲ။ Don’t get me wrong .. အထင်တော့မလွဲနဲ့ဦးနော်။ ကျွန်မကို မိန်းမအပေါစားလို့ထင်သွားမှာစိုးလို့ပါ။ ငယ်ငယ်တုန်းက ကျွန်မဒီလောက်မဝဘူး .. လှလှလေးရယ်။

.

အချိန်တစ်ခုရောက်လာတော့ ကယ်လီဖိုးနီးယားကို ပြောင်းဖို့ဖြစ်လာတယ်။ မဒဲစတို - Modesto မြို့မှာ အခြေချဖြစ်တယ်။ ဆန်ဖရန်စစ္စကိုနဲ့ဆို ( ၁ ) နာရီခွဲလောက်မောင်းရမယ့် နေရာလေးမှာပေါ့။ မပြောင်းခင်မှာ ကလေးက ( ၂ ) ယောက် ဖြစ်နေပြီ။ ဒါနဲ့ အဲဒီအချိန်က လက်မထပ်ရသေးတော့ ရည်းစား - Boy Friend တစ်ဖြစ်လဲ ကျွန်မယောက်ကျားကို ရှင်းပြတယ် .. “ ကျွန်မတို့လက်ထပ်ကြရအောင် ” လို့ ..။ ချက်ချင်းတော့ သူလက်မခံဘူး .. “ ဘာလုပ်ဖို့လဲ? အခုလဲ ဒီလိုနေနေလို့ရတာပဲမဟုတ်လား? လက်ထပ်တယ်ဆိုတာ စာရွက်အပိုင်းအစတစ်ခု - A Piece of Paper ပါ ” တဲ့။

.

.

အမေရိကန်မှာနေတော့ ဒီလိုထုံးစံတွေကြားမှာ ဒီလိုပဲ လက်ခံလေ့ရှိကြတာ “ ထုံးစံ ” ပါပဲ။ အခုက လိုလာပြီလေ။ နေနေကျ နေရာမှာက ပြသနာမရှိဘူး။ အခု ကယ်လီဖိုးနီးယားကိုပြောင်းပြီး အစကနေ ပြန်စရမယ်။ တစ်ခုခုဖြစ်ရင်ဘယ်လိုလုပ်မလဲ? ဆိုလိုတာက ကျွန်မက အရေးမကြီးဘူး။ လင်နဲ့မယား လေကြားလေးဝင်လို့ ထွေပြားသွားရင် ကလေး ( ၂ ) ယောက်နဲ့ ကျွန်မက ဘယ်လိုလုပ်မလဲ? Don’t get me wrong .. အထင်တော့မလွဲနဲ့ဦးနော်။ အစိုးရအသိအမှတ်ပြု လက်မထပ်ထားရင်၊ မတော်လို့ ယောက်ျားနဲ့ကွဲသွားရင် ကျွန်မနဲ့ကလေးတွေ လမ်းဆုံးသွားမယ် .. ဒါကိုပြောတာ။ သူတစ်ခုခုလုပ်ကြည့်၊ ကွဲကြည့် .. ကလေးတွေကိုထောက်ပံ့ကြေးပေးရမယ်။ ဟုတ်တယ် .. ကလေးတွေက သူနဲ့ မွေးထားတာလေ။

.

ဒါကြောင့် ကယ်လီ ကိုပြောင်းတော့ ကျွန်မတို့နဲ့အတူ လက်ထပ်စာချုပ်စာရွက်လေး ပါလာခဲ့တယ်။ လက်ထပ်ပွဲဆိုလို့ သူများတွေလို ဧည့်ခံပွဲတွေ ဘာတွေလုပ်တာမဟုတ်ဘူး။ တရားသူကြီးတစ်ယောက်ရှေ့မှာ ( ၂ ) ယောက် လက်မှတ်ထိုးလိုက်ရုံပဲ။ အဲဒီကနေအပြန် ယောက်ျား ကို မေးကြည့်တယ် .. ရှင် ဘယ်လိုခံစားရလဲလို့?  “ သူက ဘယ်လိုမှမခံစားရပါဘူး ” တဲ့။ ဒါပဲပြောတယ်။ ကျွန်မကရော ? ကျွန်မအတွက်လည်း ဘာမှသိပ်မထူးခြားပါဘူး။ Don’t get me wrong .. အထင်တော့မလွဲနဲ့ဦးနော်။ ဒီစာရွက်တစ်ရွက်က ကျွန်မတို့အတွက် လိုလို့သာလုပ်လိုက်တယ် .. ဘယ်လိုမှ သိပ်မခံစားရလို့ပါ။

.

.

ဒုတိယမေးခွန်းက နည်းနည်းခက်တယ်။ မေးပုံကလည်းကြည့်ဦး “ မိန်းမတွေက ယောက်ျားမယူပဲ ဘာလို့ကလေးမွေးပြီး တစ်ကိုယ်ရည်မိခင် - Single Mother လုပ်ကြတာလဲ ? ” တဲ့။ ဘယ်သူက အဖေမပေါ်တဲ့ကလေးမွေးချင်မှာလဲ? အခြေအနေအရပေါ့။ ဘယ်သူတစ်ဦးတစ်ယောက်ကမှ စုံတွဲမကွဲချင်ဘူး .. ကျွန်မယုံတယ်။ ဒီလိုယဉ်ကျေးမှုရှိတဲ့မြေမှာ ဒီလိုပဲ အဖို နဲ့ အမ ပေါင်းဖက်ကြတယ်။ တစ်ယောက်ဆီမှာ တစ်ယောက်လိုချင်တာရှိမလား ရှာကြတယ်။ Don’t get me wrong .. အထင်တော့မလွဲနဲ့ဦးနော်။ အရှာလွန်သွားတော့ ကလေး မွေးလာတယ်။

.

ကြာကြာပေါင်းတော့အကြောင်းသိ ဆိုသလို တစ်ယောက်အပေါ်တစ်ယောက် သည်းမခံနိုင်တာတွေရှိလာတယ်။ နားလည်မှု ထပ်ရှာတယ်။ ဒါနဲ့ပဲ ကလေးတွေထပ်မွေးတယ် .. ကြီးလာတယ်။ အိမ်မှုစားရိတ်တက်လာတာနဲ့အမျှ ကလေးတွေအတွက် ငွေပိုရှာရတယ်။ ဖယ်ဒရယ်အစိုးရက ကလေးကြီးလာလေ ထောက်ပံ့ကြေးလျှော့ပေးလေပဲ။ အလုပ်ချိန်မှာအချိန်ကုန်တာများလာတော့ မိသားစုအတွက် အချိန်မရှိတော့ပြန်ဘူး။ ဒီကြားထဲ အိမ်ရှင်ထီးဖြစ်ဖြစ် အိမ်ရှင်မဖြစ်ဖြစ် ဇာတ်လမ်း - Affair ရှိပြီဆိုရင် တစ်ကယ့်ဇာတ်လမ်းစ,ပြီ။

.

ဒီအချိန်ရောက်မှတော့ ဘယ်လိုလုပ်ဆက်ပေါင်းနိုင်တော့မလဲ? အမေပဲ တာဝန်ယူရတာပေါ့။ ဒါကို မှိူချိုး မျစ်ချိုးပြောကြတယ်။ အားလို့ယားလို့ Single Mother  ဖြစ်ရတာမဟုတ်ပါဘူး .. တစ်ကယ်ပါ။ တစ်ခုတော့ရှိတယ်။ မိန်းကလေး နဲ့ ယောက်ျားလေးနဲ့ ညိကြတဲ့အခါ ညှိဖို့လိုအပ်တယ်။ လက်ထပ်မှာလား လက်မထပ်ဘူးလား ? .. ဟား .. မရယ်နဲ့ .. တစ်ကယ်ပြောတာ။ Don’t get me wrong .. အထင်တော့မလွဲနဲ့ဦးနော်။ နောက်တစ်ဆင့်တက်ပြီး ဆွေးနွေးသင့်ရင် ရဲရဲဝင့်ဝင့်ဆွေးနွေးရမယ် .. “ ကလေးယူမှာလား .. မယူဘူးလား?”

.

.

သူမရဲ့စကား ဖြေသံတွေကြားပြီး သက်ပြင်းရှည်ကြီးချရတယ်။ ကျွန်တော် အသက်တစ်ဝကြီးရှူလိုက်တယ်။ သိပ်မကြားချင်ပေမယ့် ရှောင်လွှဲလို့မရတဲ့ လောကဓံဆိုတာ ဒါမျိုးကို ခေါ်တာထင်တယ်။ မြန်မာ့နား နဲ့ နားထောင်ရင် မကြားဝံ့မနာသာဖြစ်နေသော်ငြားလည်း အနောက်နိုင်ငံတွေကို မြန်မာတွေ ပြောင်းရွှေ့မှု - Immigration များလာတယ်မဟုတ်လား? မကြိုက်တော့လည်း လေ့လာပေါ့။ နားမလည်သော်လည်း ဖတ်ကြည့်ပြီး မြေခြားနယ်ခြားရောက်နေတဲ့ ကိုယ့်ဆွေမျိုးတွေကို နားချကြပေါ့။ လက်မခံနိုင်ပေမယ့်လည်း ပုထုဇဉ်လူသားတွေမှာ မဖြစ်နိုင်ဘူးဆိုတာ မရှိပါဘူး။ Don’t get me wrong .. အထင်တော့မလွဲနဲ့ဦးနော်။

.

koko2yeye@gmail.com

.

ဓါတ်ပုံ - အင်တာနက်