အင်္ဂလိပ်စာသိပ်မတတ်ဘဲလာလို့မရဘူးလား

 

ဆောင်းပါးရှင် - ကိုညီညီ (တောင်ကြီး)

ဟောလီဝုဒ် ရုပ်ရှင်ကားတွေကြည့်ပြီး အမေရိကားကို လာလို့မရပါဘူး။ ရုပ်ရှင်ထဲမှာ ကြားရတာတွေက လမ်းဘေးမှာပြောနေတဲ့ Street Talk လို့ခေါ်တဲ့ ခပ်ကြမ်းကြမ်း ခပ်ရမ်းရမ်းစကားတွေ ဒီအမေရိကားရဲ့ အလုပ်ခွင်မှာပြောရင် ကျိမ်စာသင့်သွားနိုင်ပါတယ်။

ရုပ်ရှင်ထဲက ကျော်ဟိန်းပြောတဲ့စကားဟာ အပြင်မှာ နေ့တိုင်း ကြားမှ မကြားရတာပဲလေ။ ဒါပေမဲ့ ကျော်ဟိန်းပြောသလို လိုက်ပြောတယ်၊ ကျော်ဟိန်းဝတ်သလို လိုက်ဝတ်တယ်။ ကျော်ဟိန်းနဲ့ တူချင်တယ်။ ဒါဟာ ခေတ်တစ်ခုပဲ။ ဒါဟာ အမှန်တရားပဲ။

အမေရိကားကို လူတွေသိနိုင်တာက အဓိက ၂ နေရာရှိတယ်။ တစ်ခုက အမေရိကန်အင်္ဂလိပ်စာ၊ နောက်တစ်ခုက အ‌ရှေ့ကပြောခဲ့တဲ့ မီဒီယာတွေ၊ မြူးဇစ်တွေ၊ ‌‌ဖျော်ဖြေရေးတွေ၊ ဒေတာတွေ အကုန်စုပေါင်းနေတဲ့ ဟောလီဝုဒ်။ အဲဒီ ဟောလီဝုဒ်က ကမ္ဘာမှာ တစ်နေရာထဲ ရှိတယ်။

ဘာမဆိုအကုန်လိုက်တုနိုင်တဲ့ ခြိုင်းဏားလူမျိုးတွေဟာ ဟောလီဝုဒ်ကို ဘယ်လိုမှ မတုနိုင်ဘူး။ ဒါပေမဲ့ သူတို့မှာ ငွေရှိတယ်။ ဒါကြောင့် မတုနိုင်တဲ့ ဟောလီဝုဒ်ကို ငွေပေးပြီးဝယ်တယ်။ ရှယ်ယာ ထည့်တယ်။ ကဲ အကြွေးပူသူကြီး အန်ကယ်ဆမ် နောက်ဆုံးတော့ ငွေလိုတော့ ‌ရောင်းရတာပဲ။

အမေရိကားမှာ အရိုက်ခံရရင် U Visa ရှိတယ်

 

ဆောင်းပါးရှင် - ကိုညီညီ (တောင်ကြီး)

အပြီး ပြည်ဝင်ပြောင်းရွှေခွင့်မရတဲ့ Nonimmigrant Status တစ်ခုကို အမေရိကန်အစိုးရက တရားဝင် လျှောက်တင်ခွင့်ပေးထားပါတယ်။ လူကုန်ကူးမှု တိုက်ဖျက်ရေးနဲ့ အကြမ်းဖက်မှုမှ ကာကွယ်ရေးအတွက် အမေရိကန် ကွန်ကရက်က သက္ကရာဇ် ၂ဝဝဝ အောက်တိုဘာလမှာ ချမှတ်ပေးခဲ့တာပါ။ စစ်ဒဏ်ကြောင့် ခိုလှုံလာခဲ့ကြတဲ့ ပြည်ပြေးအမျိုးသမီးထုကို ကာကွယ်ဖို့ ရည်ရွယ်ချက်တစ်ခုကလည်း ပါဝင်ခဲ့တာ ဖြစ်ပါတယ်။

ဒါကို U Visa လို့ခေါ်ပြီး အမေရိကန် လ.ဝ.က စာမျက်နှာမှာ Victims of Criminal Activity: U Nonimmigrant Status လို့ ရှာကြည့်နိုင်ပါတယ်။ အိမ်တွင်းအကြမ်းဖက်မှု၊ ကာမအိန္ဒြေထိပါးစော်ကားမှု၊ နိုင်ငံသားမဟုတ်သူတွေကို လူကုန်ကူးမှု၊ စိတ်ဝေဒနာရရှိအောင်ထိပါးခံရမှု၊ ရုပ်ခန္ဓာထိပါးမှုတို့ကို ကာကွယ်နိုင်သမျှ ကာကွယ်နိုင်အောင် ဒီဥပဒေအရိပ်ကို ပေးခိုလှုံမှာပါ။

U Visa ကို
.
၁. အထက်ပါခံစားရမှုတစ်ခုခုနဲ့ အကျုံးဝင်ရင်
.
၂. မတရားခံစားရမှုအချက်အလက်တွေ ရှိနေပေမဲ့ အသက် ၁၆ နှစ်အောက် ဖြစ်နေရင်
.
၃. ဒီလိုကျူးလွန်မှုတွေဟာ အမေရိကန်ပြည်ထောင်စုထဲမှာ ဖြစ်နေပြီး ဒီက ဥပဒေတွေကို ချိုးဖောက်ထားရင် လျှောက်ထားနိုင်ပါတယ်။ (အမေရိကားပြင်ပကနေ အမေရိကားကို ဝင်ဖို့ သံရုံးကအင်တာဗျူးတဲ့ ဗီဆာအမျိုးအစား မဟုတ်ပါ။ လျှောက်လို့ မရပါ)

ကျေးဇူးရှိသူများသို့

 

ဆောင်းပါးရှင် - ကိုညီညီ (တောင်ကြီး)

ကျွန်တော် အမေရိကား လာရတော့မယ်ဆိုတုန်းက သိပ်သိချင် သိပ်စပ်စုချင်ခဲ့တာတွေကို ပြောပြသူက ၂ ယောက်ပဲ ရှိတယ်ဗျ။ တစ်ယောက်က ဒီကခေါ်တဲ့ အစ်မရယ်၊ သူ့ယောက်ျားရယ်။

နောက်တစ်ယောက်က မခင်အေးဝင်းလို့ခေါ်တဲ့ တောင်ကြီးက အိမ်နီးနားချင်းတစ်ယောက်ရယ် သိပ်ကောင်းကြတာ။

ဘယ်လောက်‌တောင်သိချင်သလဲဆိုရင် ဒီမှာ စောင်၁ ထည်ဘယ်လောက်ဆိုတာအထိ ဈေးနှုန်းပါ သိချင်ခဲ့တာ။ အဲတော့ ကျွန်တော့အစ်မက နင်သိပ်လျှာရှည်တယ်တဲ့။

နောက် လိုက်မေးတဲ့အထဲမှာ ၇ လမ်းမှာ နေပြီး DV ပေါက်သွားတဲ့ မမေဝင်းမောင်ဆိုတဲ့ နယူးယောက်မှာနေတဲ့ ကျွန်တော့်အမျိုးသမီးနဲ့ အိမ်နီးနားချင်း။ သူက ဘာပြောတယ် မှတ်သလဲ။ (ကိုညီညီ အဲဒီတုန်းက ဘာအဆင့်မှမရှိသေးတော့ ညီညီ ပေါ့ ဟာဟ)

"ညီညီ နင် မြန်မာနိုင်ငံမှာ ၁ လကို ၁ဝ သိန်းရှာနိုင်ရင် ‌အမေရိကားမလာနဲ့ ပင်ပန်းတယ်" တဲ့

နှ‌မြောမိတဲ့အင်္ဂလိပ်စာ

 

ဆောင်းပါးရှင် - ကိုညီညီ (တောင်ကြီး)

အင်္ဂလိပ်စာကို ချစ်မြတ်နိုးသူ တစ်ယောက်အတွက် အပျော်ဆုံးအချိန်ဟာ အင်္ဂလိပ်စာကို လက်တွေ့အသုံးချသူတွေ ရှိတဲ့နေရာကို ရောက်သွားတဲ့အချိန်ပါပဲ။ ဒါ့ထက်ပို ကြည်နူးဖို့ကောင်းတာက အင်္ဂလိပ်စကားကို မွေးကတည်းကပြောတဲ့ မိခင်ဘာသာစကား တိုင်းပြည်မှာ လေ့လာခွင့် ရနေတာပါ။

တကယ် လေ့လာချင်သူတွေကတော့ အသက်အရွယ်ကိုလိုက်ပြီး မိမိဘဝကို နောက်တဆင့်မြှင့်တက်စေမယ့် ကျောင်းတက်တာတို့၊ လေ့လာမှုတစ်ခုကို ဆက်လက်လုပ်ဆောင်နေတာတို့ကို တွေ့ရတော့ အင်မတန် အားတက်မိတယ်။

ဒါတွေက ကျွန်တော်တို့ မြန်မာနိုင်ငံအပါအဝင် အင်္ဂလိပ်စကား အဓိကမပြော၊ မသုံး၊ မရေးတဲ့ တိုင်းပြည်ကလာသူတွေအတွက် အထူးအခွင့်ရေးလို ဖြစ်နေပေမဲ့ ဒီဘက်မြေမှာမွေးပြီး အင်္ဂလိပ်စကားကို ဘာမှသင်စရာမလိုတဲ့ အိမ်မွေးခြံပေါက် ဘိုလိုပေါက်ရောက်နေသူတွေ အတွက်က ဘာမှ အရေးမကြီးသလို ခံစားရတယ်။

သူတို့နဲ့ ရင်ဆိုင်လိုက်ရင် ESL Speaker သမားဟာ အလိုလို အားငယ်နေရသလို ဒီဘိုတွေကလည်း ကြိမ်ဖန်များစွာ (လူအကုန်လုံးကို မဆိုလိုပါ) အထင်သေးကြလေ့ရှိတယ်။ ဒါပေမဲ့ ၂၁ ရာစုရောက်လာတဲ့နောက်ပိုင်း ဒီလို နှိမ့်ချဆက်ဆံမှုတွေဟာ မမြင်ရသလောက် ကွယ်ပျောက်လာပါတယ်။

ဒီလို ကျွန်တော်တန်ဖိုးထားတဲ့ အင်္ဂလိပ်စာ၊ အင်္ဂလိပ်စကားကို အသုံးမကျအောင်လုပ်ပစ်တဲ့ လူတစ်ယောက်အကြောင်း ပြောပြချင်တယ်။ သူပြောတာ ဆိုတာကိုနားထောင်ပြီး သူတတ်ထားတဲ့ အင်္ဂလိပ်စာကို နှမြောတယ်။ သူသွားလာလှုပ်ရှားနေတာကိုကြည့်ပြီး သူကျင်လည်တဲ့နေရာတွေမှာ ကျွန်တော် မတတ်သေးတဲ့ အင်္ဂလိပ်စာတွေကို နှမြောတယ်။ ကျွန်တော် နားလည်နိုင်စွမ်းမရှိတဲ့ သူအမြဲနားထောင်နေတဲ့ Rap ၊ R&B သီချင်းတွေကိုကြားမိတိုင်း သူ့အင်္ဂလိပ်စာတွေကို နှမြောမိတယ်။

ဆရာကြီးဆိုသူများသို့

ကျွန်တော်ဘဝတလျှောက်မှာ ဆရာတွေအများကြီး ရှိပေမဲ့ ဆရာကြီးဆိုသူတွေထဲမှာ ကျောင်းအုပ်ဆရာကြီးတစ်ယောက်ပဲ ကျွန်တော်လေးစားတယ်။ ဒါတောင် အမျိုးသမီး။ အ.လ.က ၅ က ကျောင်းအုပ်ဆရာမကြီး။ အခု အင်တာနက်ပေါ်မှာက ဆရာကြီးလို့သုံးလိုက်ရင် အဲဒါ ရွဲ့စောင်းပြောတာ၊ ချိတ်တာ၊ ဖဲ့တာ၊ အထင်သေးလို့ပြောတာ၊ ငယ်ငယ် ကျောင်းတုန်းက စကားနဲ့ပြောရင် အကြီးကြီးလုပ်တာ။ မူလစာလုံးဟာ လူတွေရဲ့ တလွဲယူမှု ခေတ်ရေစီးကြောင်းကြောင့် အဓိပ္ပာယ်ပြောင်းလာရတယ်။

ကျွန်တော်ဟာ ဆရာကြီးတစ်ယောက် မဟုတ်ပါ။ ဘာဘွဲ့မှ မရထားပါ။ သာမန်ဘဝကနေ အခက်အခဲများစွာကို ကျော်ဖြတ်ပြီး အခုလိုအချိန်မှာ "ပြည်လည်အသိပညာမျှဝေသူ" အဆင့်ထိရောက်ဖို့ တဖြည်းဖြည်းတက်လှမ်းခဲ့သူ ဖြစ်ပါတယ်။ စာအုပ်ထုတ်တယ်ဆိုတာလည်း ကိုယ်ရေးထားတာတွေဟာ တချိန်ချိန် အင်တာနက်ကြီး မည်းမှောင်ကျသွားရင် နောက်လူတွေ အမေရိကားအကြောင်း လေ့လာနိုင်အောင်ဆိုတဲ့ ရည်ရွယ်ချက်နဲ့ ထုတ်ခဲ့တာ ဖြစ်ပါတယ်။ စုစုပေါင်း ၂ အုပ်ထုတ်ထားပြီ။ မသေခင်အထိ ၇ အုပ်ပြည့်အောင် ထုတ်အုံးမယ်။ စာတွေက အဆင်သင့်။

နေရာသစ်မှာ ခြေလာချတာက အဓိက သားသမီးပညာရေးကောင်းဖို့။ ကျန်တာတွေက သာမညတွေ။ ဖြစ်လည်း ရတယ်။ မဖြစ်လည်း ရတယ်။ ဒီလိုစိတ်မျိုး ထားထားတာ ဘာကြောင့် ဆရာကြီး ဖြစ်ချင်ရမှာလဲ။ ကျွန်တော့ဘဝမှာ တက္ကသိုလ်ပညာ သင်ရင်းတန်းလန်း ငွေစက္ကူ တရားမဝင်ဘူး ကြေငြာတယ်။ အဲဒါတောင် ဒုတိယတစ်ကြိမ်။ အဝေးသင်ရောက်သွားလည်း ကျောင်းက တက်လို့မရတော့ဘူး။ ဒီလို ခါးကျိုးခဲ့ကတည်းက အသေမှတ်ထားတာ "ငါ့သားသမီးအလှည့်ကျရင် ဒီလို မဖြစ်စေရဘူး"

လိုရင်းကို ပြန်ကောက်ရရင် အင်တာနက်မှာ စာရေးရင်းနဲ့ အမေရိကားနဲ့ ပတ်သက်ရင် ကိုညီညီ (တောင်ကြီး) ရေးတာကို ဖတ်ကြမယ်ဆိုပြီး ဖြစ်လာတယ်။ နာမည်ကြီးတာကို ကျွန်တော် စိတ်မဝင်စားဘူး။ အလုပ်ရှုတ်တယ်။ ဒါကလည်း ကျွန်တော်ဖြစ်ချင်လို့ လုပ်ထားတဲ့ဘဝ မဟုတ်ဘူး။ ကျွန်တော် လုပ်ချင်တာကို ရွေးလုပ်ရင်း ဖြစ်လာတဲ့ဘဝ။ ဒါကို ဘာကြောင့် ဆရာကြီး ဖြစ်ချင်ရမှာလဲ။ ကျွန်‌တော့ခေါင်းပေါ်မှာ ဆရာကြီးဆိုတာ မရှိဘူး။ ကျွန်တော့ခေါင်းပေါ်မှာ အမှိုက်ပုံး မရှိဘူး။ လာသွန်လို့ မရဘူး။ လက်မခံထားဘူး။

ဝင်းဗိုလ်၊ ဖိုးထောင်နဲ့ မောင်မောင်နိုင် ငယ်သူငယ်ချင်း ၂ ယောက်အကြောင်း

ခပ်ငယ်ငယ်အရွယ် ကျောင်းတုန်းက ကျောင်းနေဘက် သူငယ်ချင်း၂ ယောက်ကို ပြန်သတိရမိတယ်။ တကယ့်အဖြစ်အပျက်ဆိုတော့ နာမည်အစစ်မှန်တွေသုံးပြီး ရေးပြသွားပါမယ်။

တစ်ယောက်က ဝင်းဗိုလ်၊ နောက်တစ်ယောက်က ဖိုးထောင်။ သူတို့နှစ်ယောက်လုံးမှာ တူညီတဲ့ အချက်တစ်ခုရှိတယ်။ အဲဒါကတော့ ကျန်တဲ့ ကျောင်းသူကျောင်းသားတွေထက် လူကောင်ကြီး၊ အသက်ကြီးနေတာပါ။

ဝင်းဗိုလ်ရဲ့ အဖေဟာ အဲဒီတုန်းက ဆတ်သားကင်၊ ဆိတ်သားကင်တို့ကို လှည့်လည်ရောင်းချသူပါ။ ဝင်းဗိုလ်ဟာ ကျောင်းမလာခင်နဲ့ ကျောင်းဆင်းသွားတဲ့နောက်ပိုင်းမှာ တစ်ရက်လုပ်မှ တစ်ရက်စားရတဲ့ မိသားစု တနိုင်တပိုင် စီးပွားရေးကို ကူလုပ်ရတယ်။

ဆရာမက အိမ်စာပေးလိုက်တိုင်း နောက်နေ့မှာ ပြန်မတင်နိုင်လို့ အမြဲလိုလို ဒဏ်ပေးခံရတယ်။ အဲဒီဒဏ်ကလွတ်အောင် ဝင်းဗိုလ်ဟာ အတန်းထဲရောက်လာရင် ကျောင်းသားငယ်တွေဆီက အိမ်စာကိုအမြန်ကူးပြီး တင်တယ်။

ဒီလိုလုပ်နိုင်တာက ၁ ရက် ၂ ရက်၊ အိမ်စာ မတင်နိုင်တာက အကြိမ်အများကြီးဆိုတော့ သူ့ခန္ဓာကိုယ်က ကြီးကောင်ကြီးမားပေမဲ့ ထိုင်ခုံပေါ် မတ်တပ်ရပ်ပြီး ဒဏ်ပေးခံရပြီပေါ့။

ဝင်းဗိုလ်ဟာ သ်ပ်ပျော်တတ်တဲ့ သူငယ်ချင်းတစ်ယောက်ပါ။ ကျွန်တော်နဲ့ ရွယ်တူ ကျောင်းသူ ကျောင်းသားတွေထက် ၂ နှစ် ကြီးနေတာက ၄ တန်းနဲ့ ၅ တန်းတို့မှာ ၁ နှစ်စီ ကျထားလို့ပါ။

စာမေးပွဲတွေကျ၊ အတန်းတွေကျလို့ အသက်ကြီးလာပေမဲ့ ဝင်းဗိုလ်ဟာ ဘယ်တော့မှ စိတ်မညစ်ဘူး။ သူ့ညီငယ် ညီမလေးတွေကို အမြဲလိုလို စတတ် နောက်တတ်တယ်။ ခုံပေါ်တက်ပြီး ဒ‌ဏ်ပေးခံရတိုင်း မတ်တပ်ရပ်နေတုန်းမှာ တစ်ခန်းလုံးကို "ဟေ့ ဒီမှာကြည့်ကြ" လို့ အော်တတ်တယ်။

တစ်ခန်းလုံးက သူ့ကိုကြည့်ပြီလည်းဆိုရော ကမ္ဘာစိုးအတွင်းခံဘောင်းဘီ မပါတဲ့ သူဝတ်ထားတဲ့ပုဆိုးကို က္ငင်းလုံးကျွတ် ချွတ်ချလိုက်တယ်။ ဒီတော့ သူ့ရဲ့ ကမ္ဘာဦးက "တပင်တိုင်မြနန်းနဲ့ ပတ္တမြားကြီး ၂ လုံး" ကို လူစုံ လူစေ့ မြင်သွားကြရတော့တာပေါ့။ မမြင်ကွယ်ရာ၊ မနှစ်သက်ဖွယ်ရာ ဖြစ်ပေမဲ့ ဝင်းဗိုလ်ဟာ ဒဏ်ပေးခံရတိုင်း ဆရာမ မရှိတဲ့အချိန်ဆိုရင် ဒီလိုမျိုး အမြဲလုပ်တတ်တယ်။

၁ နှစ်ကျော်သွားတဲ့ ပြည်ပရောက် ဂရင်းကတ် ပြန်ဝင်နိုင်ဖို့

 

ဆောင်းပါးရှင် - ကိုညီညီ (တောင်ကြီး)

‌

ကပ်ရောဂါကြောင့်၊ ကျန်းမာရေးကြောင့်၊ ထိခိုက်ဒဏ်ရာရမှုကြောင့်၊ နေထိုင်ရတာ မပျော်ရွှင်တော့တာကြောင့် စတဲ့ အကြောင်းတစ်ခုခုကြောင့် အမေရိကန်နိုင်ငံ ပြင်ပရောက်နေတဲ့ ၁ နှစ်ထက် ကျော်လွန်အောင် နေထိုင်ထားတဲ့ ဂရင်းကတ်ပိုင်ရှင်ဟာ ပြည်ပြန်ၒင်လို့ရသလားလို့ ကျွန်တော့ကို လာမေးကြပါတယ်။

အမှန်က ဂရင်းကတ်သမားဟာ ပြည်ပမှာ ၁ နှစ်ထက်ကျော်အောင် နေထိုင်မယ်ဆိုရင် ၂ နှစ်အထိ ပြည်ပြန်ဝင်ခွင့်ရှိတဲ့ Re-Entry ပါမစ်- I-131, Application for Travel Document- https://bit.ly/3xQE3YV ကို လျှောက်ထားပြီး လက်ဗွေနှိပ်ရင် စာအုပ်ထွက်လာပါတယ်။ ဒါ‌လျှောက်ပြီး ဂရင်းကတ်နဲ့ထွက်ပြီး Re-Entry နဲ့ ပြန်ဝင်တာတွေကို မြန်မာတွေ လုပ်နေကျပါ။

အခုက ဒီလို ဂရင်းကတ် ၁ နှစ်၊ Re-Entry ၂ နှစ် တို့ထက်ကျော်ပြီး နေထိုင်သူတွေဟာ အမေရိကားကို ပြန်ဝင်ချင်နေကြပါတယ်။ သူတို့အတွက် လုပ်ဆောင်စရာတွေက များပါတယ်။

လက်ထဲမှာ ဂရင်းကတ်သက်တမ်းရှိနေပေမဲ့လည်း ပြန်ဝင်ရမယ့်နေ့ထက် ရက်လွန်နေကြတယ်။ ဒါကို ပြန်လျှောက်ရတဲ့ ဖောင် Returning Resident (SB-1) Immigrant Visa- ကိုရဖို့ I-117, Application to Determine Returning Resident Status- https://bit.ly/2Tk1YB9 ကို ဒေါ်လာ ၁၈ဝ ပေးပြီး ပြန်လျှောက်ရမှာပါ။

မလျှောက်ခင် ၃ လလောက်အလိုမှာ‌ လျှောက်တင်တော့မယ်လို့ နီးစပ်ရာ ‌အမေရိကန်သံရုံးကို အကြောင်းကြားသင့်တယ်လို့ တရားဝင်စာမျက်နှာမှာ ရေးထားပါတယ်။ စာတင်ဖို့၊ ဆေးစစ်ဖို့၊ ကာကွယ်ဆေး အပြည့်အဝထိုးဖို့၊ အင်တာဗျူးဝင်ဖို့အတွက် ၃ လ ဆိုတာ လုံလောက်တဲ့ အချိန်လို့လည်း ပြောပြထားပါတယ်။

ခရီးလွန်သူဟာ ဒီလို ပြည်ဝင်ခွင့် ပြန်လျှောက်ဆိုလို့သာ လျှောက်နေရတယ် သူ့လက်ထဲမှာ ဂရင်းကတ်က ရှိနေဆဲပါ။ သက်တမ်းလည်း ကျန်ကောင်း ကျန်နေနိုင်ပါတယ်။ သံမှူးက သိချင်တဲ့ အကြောင်းပြချက်တွေက ရှင်းရှင်းလေးပါ။ ဖောင်ထဲမှာ နံပါတ်တွေအရ

"https://www.talkenglish.com/" ကို နှိပ်လိုက်ပါ

 

#KNNTgi

"https://www.talkenglish.com/" ကို နှိပ်လိုက်ပါ
သာမန် အင်္ဂလိပ်စာကို စိတ်ဝင်စားသူ၊ ရထားတဲ့ဘွဲ့နဲ့ ကာလဝေးကွာ အင်္ဂလိပ်စာ ပြန်မလေ့လာဖြစ်သူ၊ မေ့နေသမျှ အင်္ဂလိပ်စကားပြော ပြန်ရချင်သူ၊ အမေရိကန်အသံထွက်နဲ့ အမေရိကန်အသုံးအနှုန်းတွေကို လူကြီး၊ လူရွယ်၊ လူငယ်ပါမကျန် လိုက်မီနိုင်မယ့် Free Web Based English Teaching Site တစ်ခုကို စမ်းသပ်ပြီး အိမ်မှာနေတဲ့ မိခင်တို့၊ ဖခင်တို့ ပြန်ကြိုးစားကြည့်ကြရအောင်။
.
ဒီစာမျက်နှာရဲ့ အားသာချက်က
-App တစ်ခုသီးသန့်အဖြစ် ဖုန်းထဲမှာ ရှိနေဖို့မလိုတာ
-ဘယ်လိုဖုန်းမျိုးမှာမဆို အင်တာနက်ရှိရုံနဲ့ ဖွင့်နိုင် လေ့ကျင့်နိုင်တာ
-အသံထွက် Player ပါဝင်လို့ လိုက်ပြောကြည့်နိုင်တာ
-Play ချင်ရင် အပြာရောင် Highlight စာကြောင်းကိုနှိပ်တာနဲ့တင် အမေရိကန်အသံနဲ့ ဖတ်ပြတာ
-အသံဖိုင်ရဲ့အောက်မှာ ဘာကိုဖတ်နေတယ်ဆိုတာ တပြိုင်တည်းလိုက်ကြည့်နိုင်တာ
-အခမဲ့ဖြစ်လို့ မကျွမ်းကျွမ်းအောင် အကြိမ်ကြိမ် ဆရာမလိုဘဲ လေ့ကျင့်နိုင်တာ
-နေ့စဉ်ဘဝရဲ့ အမေရိကားအသံတွေကို စာမျက်နှာတစ်ခုထဲမှာ ကြားနိုင်တာ တို့ဖြစ်ပါတယ်

ဒီစာမျက်နှာရဲ့ အားနည်းချက်က
-Google ပလက်ဖောင်းပေါ်မှာသုံးထားလို့ ကြော်ငြာဝင်နေတာ
-မှားယွင်းနှိပ်ပြီး သင်ခန်းစာမဟုတ်တာတွေကို ‌ရောက်သွားနိုင်တာ
-ဖုန်းသုံးနေကျမဟုတ်သူက Home Screen Shortcut မလုပ်ထားတတ်တာ
-App တစ်ခုမဟုတ်တော့ လိုချင်တဲ့အချိန် ပြန်မရှာတတ်တာ စတဲ့ ပြင်ဆင်ရလွယ်တဲ့ အခက်အခဲအသေးစားလေးတွေသာ ဖြစ်ပါတယ်။

တိုးနီလား? မအားဘူး ကိုဗစ်ဖြစ်နေတယ်

 

#KNNTgi ။ ။ ကိုတိုးနီရေ၊ မင်္ဂလာပါ မိသားစုအားလုံး ဘေးကင်းလုံခြုံပါရဲ့လား သတိရတယ်နော်။ အစ်ကို့ ဒုတိယစာအုပ်ထွက်လို့ ကိုတိုးနီကို စာအုပ်လက်ဆောင်ပေးမလို့ပါ။ ကိုတိုးနီအကြောင်းပါတဲ့ စာအုပ်ထွက်လို့ ဖြစ်ရပ်မှန်ဆောင်းပါးကိုပြောပြတဲ့အတွက်ရော၊ စာအုပ်ထဲ ထည့်ခွင့်ပေးခဲ့တဲ့အတွက်ရော ကျေးဇူးတင်ပါတယ်။ စာအုပ်လက်ဆောင် ပို့ပေးပါရစေ။

.
တိုးနီ။ ။ ဆရာညီညီရေ အားလုံး လုံခြုံဘေးကင်းပါတယ်။ စာအုပ် ထပ်ထွက်လို့ ဆရာညီညီအတွက် ဂုဏ်ယူပါတယ်။ Congratulations...ပါ။
.
ကျွန်တော် လက်ရှိ မင်္ဂလာဒုံ (နေရာလွှဲက) က မိဘအိမ်ရောက်နေပါတယ်။ အဲဒီအိမ်လိပ်စာပဲ ပို့ပေးပါနော်။ ကျွန်တော် Covid-19 ဖြစ်နေလို့ ဒီဘက်မှာလာရှောင်နေတာ ၁ဝ ရက်ကျော်ပြီ😭။ ဘာပဲဖြစ်ဖြစ် သတိရလို့ကျေးဇူးတင်ပါတယ်။ Address က _______ ဆိုရင် ရောက်ပါတယ်။ ဖုန်းနံပါတ်က ________ ပါ။ ဆရာညီညီလည်း ဒီထက် မက အောင်မြင်ပါစေ၊ ဆန္ဒနှင့်ဘဝ တထပ်ထဲကျပါစေ။🙏
.
.
#KNNTgi ။ ။ လက်ဆောင်ပြန်ပေးဖို့ ဘယ်နှအုပ်ယူပါမလဲ။
.
တိုးနီ။ ။ ရပါတယ် စာအုပ်က သယ်လာပေးမဲ့လူပေါ်မူတည်ပြီးထည့်ပေးလိုက်ပါ။ ကျွန်တော်က OK ပါတယ်။ ခုချိန် Covid-19 ဖြစ်ရင် စိတ်ညစ်ရတယ်။ ပိုက်ဆံလည်းသောက်သောက်လဲ ကုန်တယ်။ အဲဒါဆို ၅ အုပ်ဆို ရပါပြီ။
.
.
#KNNTgi ။ ။ အေးဗျာ စိတ်မကောင်းစရာ။ ဘယ်လိုစဖြစ်တယ်ဆိုတာ ပြောပြပါအုံး။
.
တိုးနီ။ ။ ရပါတယ်။ တယောက်နဲ့တယောက် ကူးစက်ပုံတွေကမတူကြဘူး။ ကျွန်တော်က သတိထားမိတာတော့ သိမ်ကြီးဈေးမှာကူးတာဖြစ်မယ်။ ပထမတော့ ပုံမှန်ဖျားတယ်။ အထူးသဖြင့် ညနေဘက်ဆိုရင် အဖျားတက်တယ်။ ညနေတိုင်း . . အဲဒါမကောင်းဘူး။
.
မိသားစုနဲ့ ပထမတော့ တူတူနေ တူတူဆော့ သတိမထားမိဘူး။ နောက်ဆေးခန်းသွားပြတာ ဆရာက သိပ်မသင်္ကာဘူးတဲ့။ ဒါနဲ့ ဓါတ်မှန်ရိုက်ခိုင်းတော့ ပေါ်တာပဲ။ ရိုက်ကြည့်လိုက်တော့ အဆုတ်မှာ အဖြူစက်တွေ သွားတွေ့တယ်။ သိသိချင်း ခွဲနေတယ် ဘယ်သူနဲ့မှ အတွေ့မခံဘူး။
.
.
#KNNTgi ။ ။ ဆက်ပြောပြပါအုံး။
.
တိုးနီ။ ။ ဟုတ်ကဲ့။ ဖြစ်ဖြစ်ချင်းကတော့ အိမ်ထဲမှာ တစ်ယောက်ထဲပဲ။ အမေက အိမ်ရှေ့မှာ ထမင်း၊ ဟင်း လာချပေးတယ်။ ကျွန်တော်က အခန်းထဲမှာ ဘယ်မှ မထွက်ဘူး။ အဝတ်အစားတွေကတော့ ကြားထဲမှာ တောင်းတစ်လုံးချထားပြီး လျှော်ပေးဖို့ လာယူကြတာပေါ့။

မိခင်တို့၊ ဖခင်တို့ကို တိုက်တွန်းစာ

 

#KNNTgi

ဒီအဖွဲ့ထဲကို ရေးပြချင်တဲ့စာပါ။ ကိုယ့် Timeline မှာ စာအုပ်ထွက်တာနဲ့ ကြုံနေလို့ အပြောခံ၊ အကောခံနေရ‌တော့ ဒီမှာပဲ ရေးတဲ့စာလို့ ပြောရတာပါ။ အခုက တော်လှန်ရေးမလုပ်ရင်ဘဲ လူရှေ့ထွက်လို့မရတော့တဲ့ Facebook ရွာကြီးထဲမှာ ကျွန်တော်တို့ နေကြပါတယ်။ ကြိုက်တယ်ထား မကြိုက်တယ်ထား မိဘတွေဟာ သားသမီးငယ်တွေကို မျက်စိရှေ့က အပျောက်မခံရဲလောက်အောင် ကပ်ရောဂါနဲ့ အာဏာရှင်ကြားမှာ ဗျာများနေရတာကို ကိုယ်ချင်းစာပါတယ်။

ဒီလိုဆိုတော့ ကလေးရဲ့အသက်က ကျောင်းရဲ့အတန်းကို စောင့်မနေပါဘူး။ နေ့တိုင်း အသက်ကြီးလာနေပါတယ်။ နဂိုကတည်းက ပိုက်ဆံတတ်နိုင်သူတွေဟာ မြန်မာကျောင်းအစား အတန်းအစားအမျိုးမျိုး၊ ဈေးအသီးသီးရှိကြတဲ့ အင်္ဂလိပ်စာသင်ကျောင်းတွေကို ပို့နေတာ ဆယ်စုနှစ် ၂ ခုထက်မက ရှိနေပါပြီ။ အဲဒီတုန်းက အလယ်တန်းတက်ခဲ့သူတွေကိုယ်တိုင် ကလေးငယ်တွေရဲ့ မိခင်၊ ဖခင် ဖြစ်လာကြပြီ။

ဒီတော့ အခု စစ်အုပ်ချုပ်ရေးကာလမှာ ဘာလုပ်မှာလဲ?

မိခင်တို့၊ ဖခင်တို့၊ ဦးဦးတို့၊ ဒေါ်ဒေါ်တို့ စဉ်းစားထားတာ အမျိုးမျိုးရှိချင် ရှိနေပါမယ်။ မတူတာတွေ တွေးနေကြပါလိမ့်မယ်။ အောက်စီဂျင် ခပ်မျှဉ်းမျှဉ်းလေးရှူရင်း မသိမသာ သက်ပြင်းလေး ချမိပါလိမ့်မယ်။ နောက်တစ်ရက်အတွက် စားစရာဟာ မိခင်တို့၊ ဖခင်တို့ရဲ့ စားပွဲပေါ်မရောက်လာမှာ စိုးရိမ်နေပါလိမ့်မယ်။ ဒါက လတ်တလော ရှောင်လွှဲလို့မရသေးတာဟာ ကျွန်တော်တို့ ကံဆိုးတာ မဟုတ်ပါဘူး။ ကလေးတွေ ပညာရေးတဆစ်ချိုးကွေ့နိုင်ဖို့ "‌ကောင်းဖို့ ဖြစ်လာတာပါ"။

အမြင်မတူဘူးလား? ရှင်းပြပါမယ်ခင်ဗျ။

အမေရိကားရောက် မြန်မာစစ်သားမိန်းမတစ်ယောက်ရဲ့ရင်ဖွင့်သံ

"မြန်မာပြည်ရဲ့ ဓမ္မနဲ့အဓမ္မ"

#ဖြစ်ရပ်မှန်ဆောင်းပါးရှည်
(၁)
မင်္ဂလာပါ ဦးညီရေ ကျမက အခု အမေရိကားမှာပါ။ ကျမဘဝရဲ့ တရားမျှတမူကို ရှာဖွေချင်လို့ နေ့စဉ်နဲ့အမျှ တနုံ့နုံ့ခံစားရလွန်းလို့ ဒီစာကိုကျမရေးပြီး စာဖတ်သူတွေကို သိစေချင်ပါတယ်။ အကြောက်တရားကို ရွံမုန်းစွာနဲ့ မြန်မာနိုင်ငံရဲ့ နှစ်ပေါင်း ၇ဝ ကျော်ပျက်စီးခဲ့တဲ့ စနစ်ဆိုးထဲမှာ လူသားမျိုးဆက် သက်တမ်း ၂ ဆက် ပျက်စီးခဲ့တာ အားလုံးအသိပါပဲ။ လူသားမျိုးဆက်တွေက ဘယ်လိုပျက်စီးခဲ့တာပါလဲ။

အဲဒီခေတ်တွေမှာ တရားမျှတမှုဆိုတာ ဘယ်ဆီနေမှန်းမသိ၊ ကိုယ်ပိုင်ဦးနှောက်၊ ကိုယ့်ခြေကိုယ့်လက်နဲ့ ရှာဖွေဖို့မစဉ်းစားဘဲ ကိုယ်ချင်းစာစိတ်ကင်းမဲ့တဲ့ အတ္တအပြည့်လူသားတွေနဲ့ သူတို့သားသမီးတွေကြောင့် ပြည်သူတွေ စိတ်ဓာတ်ရေးရာ ပျက်စီးသွားခဲ့ရတယ်။ အကောင်းအဆိုး၊ အကြောင်းအကျိုး၊ အမှားအမှန် ဝေဖန်ပိုင်းခြားနိုင်တဲ့ဉာဏ်ဖြစ်တဲ့ ဆင်ခြင်တုံတရား ကင်းမဲ့ကြတယ်။

ကျမတို့မိဘ၊ အဖိုးအဖွားတို့က စီးပွားရေးကို တစ်မိသားစုလုံး ကျားကုတ်ကျားခဲ လုပ်ကြတဲ့မိသားစုတွေ ဖြစ်ပါတယ် ဦးညီ။ အမျိုးသားရဲ့ မိသားစုက ခေတ်ပျက်ထဲက သူဌေးတွေပေါ့။ နှဖူးကချွေး ခြေမကျမှရတဲ့ငွေနဲ့ ချမ်းသာသူက ငွေကိုတန်ဖိုးထား နားလည်သလို စာနာစိတ်အပြည့်နဲ့ မာန်မာနမရှိ သိုသိုသိပ်သိပ် နေတတ်သူတွေက တစ်အုပ်စု။

အသက် ၂ဝ ကျော်ကျော် "ဥုံဖွ" ဆိုပြီး ရာထူးရချိန်၊ ခေတ်ပျက်ချိန်နဲ့ တိုက်တိုက်ဆိုင်ဆိုင် လက်နက်ပါကိုင်ခွင့်ရတဲ့နေရာကို ရခဲ့လေတော့ ရှိသမျှထန်းတော ငါ့ထန်းတော ငါ့ထန်းတော ဆိုတဲ့စိတ်နဲ့ အပိုင်စားရတဲ့ နယ်တခွင်မှာ ငါ့အမိန့် ငါ့အာဏာ ငါ့ ကြောက်ရမယ်ဆိုပြီး လုပ်စားလိုက်တာ နှစ်အနည်းငယ်အတွင်းမှာ ချမ်းသာသွားတာက အမျိုးသားဘက်က တစ်အုပ်စု။

မြို့တက်၊ တိုက်ဆောက်၊ ရွှေလင်ပန်းနဲ့ အချင်းဆေး။ ချမ်းသာလာသလိုနဲ့ နေလိုက်ကြတာ ဆိုပေမဲ့ ဘယ်လိုပဲ ငွေရှိလို့ လူချမ်းသာစာရင်းထဲ ရောက်ရောက် နှုတ်ထွက်စကားနဲ့ လူ့စရိုက်ကတော့ အဆင့်အတန်း ခွဲခြားလို့ရပါတယ်။ နှစ်အနည်းငယ်အတွင်းမှာ ငါ့အမိန့် ငါ့အာဏာ ငါ့ ကြောက်ရမယ်ဆိုတဲ့ စာနာမှုကင်းမဲ့တဲ့ အုပ်ချုပ်မှုက ငွေရဖို့တင်မဟုတ်ဘဲ မိသားစုကိုပါ ပုံစံတစ်ခုနဲ့ အုပ်ချုပ်လာခဲ့တယ်။

ဒါစား၊ ဒီလိုနေ၊ ဒါပဲလုပ်၊ ငါပြောသလိုလုပ်၊ ငါလုပ်သလိုမလုပ်နဲ့ဆိုတဲ့ မူနဲ့ အုပ်ချုပ်လိုက်တာ သားသမီးတွေဟာ မှန်နေပါရက်နဲ့ ကြောက်ပြီး မှားပေးရတဲ့ဘဝ၊ မစားချင်ပါဘဲနဲ့ ကြောက်ပြီး စားခဲ့ရတဲ့ဘဝ၊ စိတ်မပါ ပါဘဲနဲ့ ကြောက်လို့လုပ်ခဲ့ရတဲ့ဘဝနဲ့ ကြီးပြင်းလာခဲ့ရတယ်။ ဒီလိုနဲ့ သူတို့ရဲ့ သားသမီး ၃ ယောက်ဟာ သူ့လိုအမိန့် အာဏာရှိတဲ့ နေရာတစ်နေရာရောက်ဖို့ အပြင်းအထန် ကြိုးစားပါတော့တယ်။ သူဆိုတာက ကျမအမျိုးသားဖြစ်လာမယ့် "သူ" ပေါ့။ လက်နက်ကိုင် အရာရှိတစ်ယောက်ဖြစ်ဖို့ ငွေရှိရင် ဖြစ်တယ်လေ။

ပိုမိုစည်းရုံးလာသော ပြည်ပရောက်မြန်မာတွေ

 

ဆောင်းပါးရှင် - ကိုညီညီ (တောင်ကြီး)

          အကောင်းရေးမယ့်စာ ဖြစ်ပါတယ်။ ဖရုသဝါစာ မရေးရဲပါ။ တိုင်းပြည်အတွက် နေ့တိုင်းသုံးနေတဲ့ ဒီအကောင့်ကိုလည်း အထိခိုက်မခံလိုပါ။ လူတကာ ဆဲရေးတိုင်းထွာ၊ ကြိမ်စာတိုက်၊ နှလုံးခိုက်အောင် နာကျင်ရတဲ့ စကစကို ကျေးဇူးတင်ချင်တာ တစ်ခုရှိပါတယ်။ တစ်ကြိမ်တစ်ခါမှ ဒီလောက်မညီညွတ်ဖူးတဲ့ ပြည်ပရောက် တိုင်းရင်းသားတွေ၊ မြန်မာတွေ စည်းလုံးခြင်းမက စည်းလုံးလာအောင် "ဘုံရန်သူပက်ပက်ဆိုး" အဖြစ် ရပ်တည်ပေးနေလို့ ဖြစ်ပါတယ်။

          ပြည်ပရောက်မြန်မာတွေမှာ သီတင်း ၁ ပတ်မှာ အနည်းဆုံး ၁ ရက် မဖြစ်မနေ ဒီ "ဘုံရန်သူပက်ပက်ဆိုး" အတွက် မဖြစ်မနေ ချန်ထားပေးကြတယ်။ ဒါက အမာခံ တော်လှန်သူ။

အတွင်းကျကျ တော်လှန်သူတွေက ပွဲဖြစ်မြောက်အောင် စီစဉ်သူ၊ ရံပုံငွေကောက်ပေးသူ၊ ဆိုရှယ်မီဒီယာ တာဝန်ယူပေးသူ၊ အခမ်းအနား ကျင်းပပေးသူ၊ တီးမှုတ်ဖျော်ဖြေပေးသူ၊ Banner စီစဉ်ပေးသူ၊ မြို့ပိုင် နယ်ပိုင်တွေနဲ့ စကားပြောပေးသူ၊ အမေရိကန်အစိုးရ (တခြားနိုင်ငံအစိုးရ) တာဝန်ရှိသူတွေနဲ့ ချိတ်ဆက်ပေးသူ၊ နွေဦး‌တော်လှန်ရေး အလှူငွေ ကောက်ခံပေးသူ၊ အစားအသောက် ‌ရောင်းချပေးသူ၊ အစားအသောက်ရောင်းချမယ့် နေရာထိုင်ခင်း ဆင်ယင်ပေးသူ၊ ဧည့်ကြို နေရာထိုင်ခင်းပေးသူ၊ ဓာတ်ပုံ ရိုက်ပေးသူ၊ ဗီဒီယို ရိုက်ပေးသူ၊ အင်္ဂလိပ်က မြန်မာ-မြန်မာက အင်္ဂလိပ် ဘာသာပြန်ပေးသူ၊ ကားရပ်နားဖို့ လမ်းရှင်းပေးသူ၊ ရဲ့တပ်ဖွဲ့‌နဲ့ပူးပေါင်းပြီး လုပ်ဆောင်ပေးသူ၊ ဆန္ဒပြပွဲလာ ‌‌ရွှေမြန်မာတွေအတွက် လုံခြုံရေးယူပေးသူ

. . . စတဲ့

ကိုယ်ကျိုးစွန့်၊ အနစ်နာခံ၊ အချိန်အပြည့်ပေး၊ အစည်းအဝေးတက်ပေးကြတဲ့ ၁၉၇၄ မျိုးဆက်ကနေ ၂ဝ၂၁ မျိုးဆက်သစ်အထိ အရွယ်အသီးသီး၊ အသက်အထွေထွေ၊ စားဝတ်နေရေး အခြေအနေတွေကို လျစ်လျူရှုပြီး ရုံးပိတ်ရက် စနေရော၊ တနင်္ဂနွေရော နေ့ရော ညပါ မနားမနေ လုပ်ဆောင်ပေးကြသူတွေမှာ ရုံးသာပိတ်သွားတယ် မနားရသေး။ ရုံးသာ ပြန်ဖွင့်လာတယ် အိပ်ရေးက မ‌ဝသေး။ ဆန္ဒပြပွဲသာ ပြီးသွားတယ် စိတ်ထဲမှာ "ဘုံရန်သူပက်ပက်ဆိုး" ကို တော်လှန်လို့ မပြီးသေး မစီးသေး။ ဒီလောက်အထိ စိတ်ဆန္ဒပြင်းပြကြတာ တစ်ခါမှ မမြင်ဖူးကြဘူး။

"လူသားချင်းစာနာတဲ့ UNHCR" အပိုင်းဆက်

 "လူသားချင်းစာနာတဲ့ UNHCR" အပိုင်း ၁။ #UNHCR ဆိုတာ ဘာလဲ

ဆောင်းပါးရှင် - ကိုညီညီ (တောင်ကြီး)

#UNHCR ဆိုတာ ဘာလဲ
_______________ UNHCR ဆိုတာ ကုလသမဂ္ဂလက်အောက်ခံ လူသားအကူအညီပေးအဖွဲ့ခွဲဌာနတစ်ခုဖြစ်ပြီး the United Nations High Commissioner for Refugees ရဲ့ ထိပ်စည်းစာလုံးတွေကို တွဲရေးထားတာပါ။ အများက "ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး" လို့ခေါ်ပြီး ပြည်ပရောက်မြန်မာတွေကြားမှာ "ယူအန်ရုံး" ၊ "ယူအန်ကတ်ရုံး" လို့ အသိများကြတယ်။


UNHCR ကို ဘယ်တုန်းကတည်ထောင်ခဲ့တာလဲ
_______________ ဒုတိယကမ္ဘာစစ် ပြီးတဲ့နောက် ၁၉၅ဝ ခုနှစ်မှာပါ။ အဲဒီတုန်းက ကမ္ဘာစစ်ကြောင့် သန်းနဲ့ချီပြီးထွက်ပြေးရတဲ့ ဥရောပစစ်ဘေးရှောင်နဲ့ နေရပ်စွန့်ခွာသူ ဒုက္ခသည်တွေကို ကယ်တင်ဖို့ တည်ထောင်ခဲ့တာဖြစ်ပါတယ်။


UNHCR က ဘာလုပ်တာလဲ
_______________ စစ်ဘေးသင့် စစ်ဘေးရှောင် ဒုက္ခသည်တွေကို ကူညီမယ်၊ ခိုလှုံခွင့် လျှောက်ထားလိုသူတွေကို လက်ခံနိုင်မယ့် တတိယနိုင်ငံကို ရွေးပေးမယ်၊ စိစစ်ပေးမယ်။ တိုင်းပြည်မဲ့လူသားတွေ‌‌ကို လျှော့ချမယ်။ သူတို့အခွင့်အရေးကို ကာကွယ်ပေးမယ်။ နေရပ်စွန့်ခွာလူသားတွေကို အထောက်အကူပေးဖို့ အမှုကိစ္စတွေကို‌ ဆောင်ရွက်ပါတယ်။

စွမ်း ဘွဲ့ ၂ ခု ရတဲ့နေ့‌

 

ဆောင်းပါးရှင် - ကိုညီညီ (တောင်ကြီး)

ဒီနေ့ကိုရောက်ဖို့ စောင့်ရတာ ၄၃၈၅ ရက် ရှိပြီ။ တနည်းအားဖြင့် ၁၂ နှစ်နဲ့ ၂ ရက်တိတိ ကျွန်တော်တို့ စိတ်ရှည်လက်ရှည် စောင့်ခဲ့ကြတယ်။ ဒီနိုင်ငံရောက်လာတဲ့ ရည်ရွယ်ချက်ကိုက သားသမီးတွေ ကမ္ဘာ့အဆင့်မီပညာတွေ သင်နိုင်ဖို့။ အခု ကျွန်တော့သားလေး ဘွဲ့ရပြီ။ သူ ပညာတတ်တစ်ယောက် ဖြစ်လေပြီ။

ကျွန်တော့ဘဝကို ၁ ခု လို့တွက်မယ်ဆိုရင် ချစ်သူဇနီးသည်က ၁ အပေါ်က နှစ်ထပ်ကိန်းပေါ့။ သမီးက ဘွဲ့ရပြီးသွားတော့ ရင်သွေး ၂ ဦးမှာ သူတို့ရဲ့ပညာရေးက ကိန်းပြည့် ၁ဝဝ ရဲ့ ၅ဝ% ကိစ္စပြီးမြောက် အောင်မြင်ပြီးသား။ အခု သားလေး ဘွဲ့ထပ်ရတော့ သူ့ရဲ့ဘဝ အချိုးအကွေ့ ပညာရေးအထွဋ်အထိပ်အတွက် တစိမ်းမြေမှာ ကျွန်တော်တို့မိသားစု မျှော်မှန်းခဲ့တဲ့ ပန်းတိုင်ကို စမြင်နေရပါပြီ။

ဒီအဆင့်အထိရောက်ဖို့ရာ ကျွန်တော်တို့ဟာ ချမ်းသာသူတွေ လုပ်သလို ငွေလမ်းခင်းသွားခဲ့ကြတာ မဟုတ်ဘူး။ ဒီလှေခါးထစ်ကို ကျော်ဖြတ်သွားနိုင်ဖို့ရာ ကျွန်တော်တို့ဟာ အခွင့်အလမ်း လက်ရမ်းကို ဖြတ်သန်းသွားခဲ့ကြတာ မဟုတ်ပေဘူး။

လိုချင်တာတွေကို မျိုသိပ်ပြီး သားဟာ စာနဲ့ပတ်သက်လာရင် အမြဲ ပြီး‌မြောက်အောင်မြင်အောင်လုပ်တယ်။ လူမှု ဆက်ဆံရေးကောင်းဖို့၊ လူကိုလူလို သိဖို့နဲ့ လူတိုင်းကို တန်ဖိုးတစ်ခုထား ဆက်ဆံတတ်ဖို့ကို သားဟာ ခြေစုံနှစ် ကြိုးစားခဲ့တယ်။

မိဘရဲ့ ၂ဝ၁၉-အိမ်အသစ်နဲ့ဝေးရာမှာ သားဟာ ကိုယ်စွမ်းကိုယ်စရှာပြီး အဆောင်မှာ စာသင်၊ ‌အဆောင်မှာ နား၊ ကိုယ်တိုင် လျှော်ဖွပ်၊ ကိုယ်တိုင် ချက်စားခြင်းအပြင် သူ့သူငယ်ချင်းတွေနဲ့ ပညာသင်ရင်း ကိုယ်ထူကိုယ်ထစံနစ်ကို သက်သေပြတယ်။

"ကျွန်တော် အောင်ပြီ" "ယုံကြည်စွာ ခိုလှုံရာ" အပြီးသတ် အပိုင်း ၁ဝ။

 

ဆောင်းပါးရှင် - ကိုညီညီ (တောင်ကြီး)

ကျွန်တော် မင်းပိုင်ထွန်းပါ ဦးညီရေ
__________________________ ကျွန်တော် Asylum အောင်ပြီဗျ။ ကျွန်တော် ဒီကို အလည်ဗီဇာနဲ့ ၂ဝ၂ဝ၊ __ လပိုင်းမှာရောက်ပါတယ်။ ရောက်ပြီး ၉ လ ကျော်မှ ရှေ့နေနဲ့တွေ့ပြီး Asylum အတွက် အမှုအပ်ခဲ့တယ်။ ကံကောင်းချင်တော့ အမှုလက်ခံကြောင်းစာကို ၁ ပတ်အတွင်း ရတယ် ဦးညီ။

နောက် ၁ လ အကြာမှာ
___________________ လက်ဗွေနှိပ်ရတယ်။ ၂ဝ၂၁၊ ၁ လပိုင်း အလယ်လောက်မှာ အင်တာဗျူးရက်ချိန်း ရတယ်။ အင်တာဗျူးရက်က ၂ လ ပိုင်းဆိုတော့ ကျန်တဲ့ ၂ ပတ်ထဲမှာ စာရွက်စာတမ်းတင်ဖို့ အသင့်မဖြစ်သေးတာကြောင့် ‌ရှေ့နေနဲ့တိုင်ပင်ပြီး ရက်ချိန်းကို နောက် ၁ လ ပြန်‌‌‌ရွှေ့လိုက်တယ် ဦးညီ။

၃ လ ပိုင်း ပထမအပတ် USCIS
___________________________ မှာ အင်တာဗျူး သွားဖြေတယ်။ မေးတဲ့အရာရှိက အတော်လေးစိတ်ရှည်ပြီး အတွင်းကျကျ မေးတယ်။ မေးတဲ့အချိန် ၃ နာရီ ကြာတယ်။
အဖြေကို ၂ ပတ်ကနေ ၂ လအတွင်း ပို့ပေးမယ် ပြောလိုက်တာကို ဦးညီကို ဒီစာရေးပြတဲ့အချိန် မနေ့က လက်ခံကြောင်း စာပို့တယ်ဗျ။

အိမ်လိပ်စာက
____________ သူငယ်ချင်းအိမ်သုံးထားတော့ စာတွေကရောက်နေပြီ၊ သွားမယူရသေးလို့ လက်ထဲတော့ မရောက်သေးဘူး ဦးညီ။ တချို့ကတ်တွေလည်း ရှေ့နေဆီ ရောက်နေပြီးသား ရှိနေတယ်။

ကျွန်တော်အလုပ်အပ်ခဲ့တာက နယူးယောက်က ဒေါ်စန္ဒီခိုင် ပါ။ မိသားစုကို ဒေါ်လာ ၃၅ဝဝ ပေးရပါတယ်။ ကျွန်တော်က နားမလည်တော့ ကိုယ်တိုင်မလျှောက်ရဲလို့ ရှေ့နေအပ်တာပါ။

NYC ကို ရောက်ရောက်ချင်းတော့ ဘာကတ်မှ မရှိပါဘူး။ City ID လုပ်လိုက်တယ်။ ကျန်းမာရေး အာမခံကတ်တွေ လုပ်တယ် ဒီလောက်ပါပဲ။ DMV Learner Permit ရှိတယ်
အဲဒီကတ်တွေနဲ့ပဲ နေရတာ။

ကျမ ရောက်ပါပြီ

ဆောင်းပါးရှင် - ကိုညီညီ (တောင်ကြီး)

ဆရာ မင်္ဂလာပါရှင့်
ကျမနာမည် မမေသူရှင်းပါ
_______________________ ဆရာ့စာတွေ အကုန်ဖတ်ပါတယ်။ စာအုပ်လည်း ဝယ်ဖတ်ပါတယ်။ ဆရာ့စာအုပ်က ဆရာလည်းကုသိုလ်ရ၊ ဖတ်သူလည်း လက်တွေ့အကျိုးရ။ ကျမလည်း သူများကိုရှင်းပြရတာ ဝါသနာကြီးပါတယ်။ တချိန်ကျရင် ဆရာ့လို သူများတွေကို ပြန်ကူညီပေးဖြစ်မှာပါ။ အခုတော့ ကျမအကြံဉာဏ်လေးတစ်ခု တောင်းချင်လို့ပါ။

ကျမက အခု မန္တလေးက ပုဂ္ဂလိကစက်ရုံတစ်ခုမှာ မန်နေဂျာလုပ်ပါတယ်။ ကျမ အမျိုးသားက တက္ကသိုလ်ကြီးတစ်ခုက ပါမောက္ခဌာနမှူးပါ။ လက်ရှိ အမေရိကန်သံရုံး‌ရဲ့ ပရိုဂရမ်တစ်ခုနဲ့ ချီကာဂိုတက္ကသိုလ် (အမည်လွှဲ) မှာ Higher Education Scholarships နဲ့ ရောက်နေပါတယ်။ ၈ လပိုင်း အထိ Visa ရှိသေးပါတယ်။

သူက ဒီအရေးတော်ပုံ ဖြစ်သွားတော့ မြန်မာပြည်ကို မပြန်ချင်တော့ဘူး။ အဲဒီမှာရှိတဲ့ မြန်မာမိသားစုတွေဆီမှာ ဆူရှီကူလုပ်ရင်း Work Permit လျှောက်ပြီး ဆက်နေချင်တယ်။ ကျမကို J2 Visa လျှောက်ပြီးလိုက်လာစေချင်တယ် ပြောပါတယ်။ ကျမ လိုက်သွားသင့်သလား မလိုက်သွားသင့်ဘူးလားဆို‌တာ ဝေခွဲမရလို့ ဆရာ့ Suggestion လေး တောင်းခံတာပါရှင့်။

လိုက်လာသင့်လား မလိုက်လာသင့်လား
________________________________
မေးစရာမလိုပါဘူး လိုက်လာပါ
_________________________

"ယုံကြည်စွာ ခိုလှုံရာ" အပိုင်းဆက်

 "ယုံကြည်စွာ ခိုလှုံရာ" အပိုင်း ၁။ #Asylum+#Refugee မိတ်ဆက်

          တချိန်တုန်းက အဆိုင်လန်ခံသူ၊ ခိုလှုံခွင့်တောင်းခံသူတွေဟာ အရင်ရောက်ပြီးနေသူတွေရဲ့ လူအချင်းချင်း ခွဲခြားဆက်ဆံခံရတဲ့ သမိုင်းကြောင်းတွေ ရှိခဲ့ပါတယ်။ ဘယ်သူတွေက ဘာကြောင့် ဒီလိုဖြစ်ရတယ်ဆိုတာက ပစ်လာတဲ့မြှားကိုသာ အပြစ်အနေနဲ့ ရှုမြင်နေတာဖြစ်ပြီး ဘာကြောင့် ဒီလိုဖြစ်ကြတာလဲဆိုတဲ့ မြှားလာရာလမ်းကြောင်းကို ကျွန်တော် ရှာဖွေလေ့လာထားမိသလောက် ဒီနေ့ တင်ပြကြည့်ပါမယ်။

          တင်ပြပုံမှာ တစ်ခုခု ကျန်ရစ်ခဲ့ရင် ရေးသူရဲ့ အချိန်မလောက်မှု၊ တင်ပြပုံ အားနည်းမှုလို့ မှတ်ယူပေးပါ။ တကယ်မှန်နေရင်တော့ အခုချိန်ကစပြီး အမေရိကန်နိုင်ငံ အစိုးရရဲ့ လုံခြုံတဲ့အုပ်ချုပ်မှုအောက်ကို တိုးဝင်လာသူ ဖြူဖြူမည်းမည်း ဝါဝါညိုညို စိတ်မငြိုငြင်ကြဖို့ တိုက်တွန်းလိုက်ပါရစေ။

          ခိုလှုံလာသူမှာ အစစအရာရာ အားနည်းနေတတ်ပါတယ်။ ငွေအား၊ ဓနအား၊ ဘာသာစကားအားနဲ့ စိတ်ပိုင်း ရုပ်ပိုင်းဆိုင်ရာတွေမှာ အမြဲအားငယ်နေတတ်တာကြောင့် အမှုလျှောက်ဆဲကာလ၊ လူတွေ့စစ်ဆေးမှုရက်ချိန်းကို စောင့်နေတဲ့ကာလနဲ့ လက်ဗွေနှိပ်ပြီး တရားသူကြီးနဲ့တွေ့ဖို့ စောင့်ရတဲ့ ကာလတွေမှာ တရားဝင်ကတ်ပြားတွေနဲ့ ငွေကြေး၊ အစားသောက် အထောက်အပံ့တချို့ ပေးကြရပါတယ်။ မပေးထားရင် အစိမ်းသက်သက်ကြီး အမေရိကားလာသူက စစချင်း ဘယ်လိုမှ မရပ်တည်နိုင်ပါ။

ဒီငွေတွေကို အိမ်ဖြူတော်အစိုးရနဲ့ ခိုလှုံသူနေထိုင်တဲ့ ဖယ်ဒရယ်အစိုးရတို့က ကျခံရပါတယ်။

ဒီအစိုးရ အဖွဲ့တွေက ငွေဘယ်ကရသလဲ- အခွန်ထမ်းတွေဆီက ရပါတယ်။

ဘယ်သူက အခွန်ထမ်းတာလဲ- အရင်ရောက်နေသူတွေက အခွန်ပေးရပါတယ်။

          ဒါက ဖော်မြူလာပါ။ ဒါကြောင့် စကားဦးသန်းခဲ့တဲ့အတိုင်း "ငါတို့ဆောင်ထားတဲ့ အခွန်ငွေတွေ အလကားလာယူနေတယ်" လို့ ယူဆပြီး မကျေမနပ်ဖြစ်နေတာက အကြောင်းရင်း အဖြစ်မှန် ဖြစ်ကြောင်း အပိုင်း ၁။ အနေနဲ့ တင်ပြလိုက်ပါတယ်။

ခင်လျက်
ကိုညီညီ (တောင်ကြီး)
05-18-2021

"ယုံကြည်စွာ ခိုလှုံရာ" အပိုင်း ၂။ (ခိုလှုံခွင့်က ၅ မျိုးလား ၆ မျိုးလား) #Asylum+ #Refugee

နယ်စပ်လုံခြုံရေး (အမိမြေလုံခြုံရေး) DHS ရဲ့ ထုတ်ပြန်ချက်ထဲမှာ အမေရိကန်မြေပေါ်ကို တရားမဝင် ဝင်ရောက်လာသူ၊ ခိုးဝင်လာသူ၊ နယ်စပ်ကျော်ဖြတ်လာသူ၊ ဗီဆာသက်တမ်းလွန် နေထိုင်သူတွေနဲ့ အခြေအနေပေါင်း မြောက်များစွာသောလူတွေကို ထိန်းသိမ်းခွင့်၊ ဖယ်ရှားခွင့်၊ လာရာတိုင်းပြည် ပြန်ပို့ခွင့် အထူးအာဏာရှိပါတယ်။

လူတစ်ယောက်ရဲ့ အသက်ရှင်နေထိုင်မှုနဲ့ လွတ်လပ်ခွင့် (လွတ်လပ်ခွင့်မှာ အဓိပ္ပာယ်အများကြီးပါဝင်တယ်) တို့ဟာ အခြိမ်းခြောက်ခံနေရပြီဆိုရင် ဒီအာဏာတွေကို ဆန့်ကျင်ပြီး တရားသူကြီးက မဖယ်ရှားဘဲ နေခွင့်ပြုလို့ ရပြန်ပါတယ်။

အဲဒီထဲက တစ်ဦးတစ်ယောက်ဟာ သူ့ရဲ့
.
၁. လူမျိုးကြောင့်
.
၂. ကိုးကွယ်တဲ့ဘာသာကြောင့်
.
၃. ခံယူထားတဲ့နိုင်ငံသားကြောင့် အပြင်
.
ဒီလူဟာ
.
၄. လူမျိုးစုတစ်ခုရဲ့အဖွဲ့ဝင်တစ်ယောက် ဖြစ်နေ‌တာကြောင့် နဲ့
.
၅. နိုင်ငံရေးခံယူချက်ကြောင့် ဆိုတဲ့ အချက်အလက်တွေနဲ့ ထည့်သွင်းစဉ်းစားပါတယ်။

ဒီ့အပြင် အခြေခံ မူဝါဒတွေထဲက အကြမ်းဖက် တိုက်ခိုက်ရေးအုပ်စုထဲ ပါခဲ့တာ၊ အမေရိကန်နိုင်ငံကို ထိပါးအောင် ရည်ရွယ်ဖွဲ့စည်းထားတဲ့ အဖွဲ့တွေနဲ့ ပတ်သက်တာတွေကြောင့် တရားသူကြီးက တဖန် ဖမ်းဆီး အချုပ်ချနိုင်ပါတယ်။

ခိုလှုံခွင့်တောင်းတဲ့ ဖောင်နံပါတ် I-589 https://cutt.ly/zbLlGMV ထဲမှာတော့
.
1.. Race
.
2.. Religion
.
3.. Nationality
.
4.. Political Opinion
.
5.. Membership in Particular Social Group အပြင်
.
6.. Torture Convention တို့ထဲက ခိုလှုံလိုသူ အခြိမ်းခြောက်ခံရသမျှကို အမှတ်ခြစ် လျှောက်ထားနိုင်ပါတယ်။

နောက်တစ်ခုက ဒီနိုင်ငံတွင်းရောက်ပြီး ၁ နှစ်မပြည့်ခင် Asylum လျှောက်ထားတာနဲ့ ၁ နှစ်ကျော်အောင် စောင့်ပြီးမှ လျှောက်ထားတာဟာ ဘယ်ဟာက အားသာချက်၊ အားနည်းချက်ရှိတယ်ဆိုတာမျိုး အမြင်မတူကြတာကို သတိထားလာမိတယ်။ ဒီအကြောင်းတွေက အွန်လိုင်းမှာ လေ့လာလေလေ၊ မြေပြင်မှာ နက်ရှိုင်းလာလေလေ အတွေးမတူ၊ အဖြေမတူ ဖြစ်နိုင်တာကြောင့် နောက်အပိုင်းတွေမှာ ဆက်လက်ဖော်ပြပါအုံးမယ်။

ခင်လျက်
ကိုညီညီ (တောင်ကြီး)
05-20-2021

"ယုံကြည်စွာ ခိုလှုံရာ" အပိုင်း ၃။ (အမေရိကန်နိုင်ငံ၏ ခိုလှုံသူကယ်ဆယ်ရေးတွင် ပါဝင်မှု) #Asylum+#Refugee

အမေရိကန်ပြည်ထောင်စုဟာ ဥရောပသမဂ္ဂနဲ့ ဂျာမဏီတို့နဲ့အတူ UNHCR အတွက် အများဆုံးအလှူရှင်စာရင်းမှာ ထိပ်တန်းကပါဝင်ပါတယ်။ လူသားချင်းစာနာမှုကြောင့်ပဲ ခိုလှုံသူတစ်ယောက်ဟာ အမေရိကန်အစိုးရရဲ့ ကာကွယ်မှုအောက်မှာနေဖို့ အရည်အချင်း ပြည့်မှီ မပြည့်မှီဆိုတာကို ဆုံးဖြတ်ဆောင်ရွက်ကြပါတယ်။

ခိုလှုံသူဟာ သူ့ရဲ့ကိုယ်ရေးအချက်အလက်တွေကို ပြီးပြီးရော လုပ်လို့မရဘဲ ပြည်ထောင်စုကချထားတဲ့ ဥပဒေတွေကို လိုက်နာဖို့လိုသလို နောက်ကြောင်းပြန်စစ်ဆေးခြင်းတွေကိုပါ ခံယူရမှာပါ။

အမေရိကန်ပြည်အတွင်းမှာ UNHCR က ခိုလုံသူကို စာရင်းမသွင်းပေးပါ။ ခိုလုံသူလျှောက်လွှာကို လက်ခံ မဆောင်ရွက်ပေးပါ။ ခိုလုံသူရဲ့စာရွက်စာတမ်းတွေကို မထုတ်ပြန်ပေးပါ။ သဘောက‌တော့ အမေရိကန်နိုင်ငံဆီသွားမယ့် ကိစ္စအဝဝကို ဒီအစိုးရရုံးဝန်ထမ်းတွေကသာ ကိုင်တွယ်ပြီး UNHCR က လက်နဲ့ မတို့တော့ပါ။

ဒါပေမဲ့ Refugee တစ်‌ယောက်ဟာ နိုင်ငံပြင်ပမှာ ရှိနေပြီး အမေရိကန်အောက် ခိုလှုံချင်တယ်ဆိုရင် အဖွဲ့အစည်း ၃ မျိုးထဲက တစ်ခုခုက ထောက်ခံပေးမှ ဖြစ်မြောက်မှာပါ။ အဲဒါတွေကတော့ ကမ္ဘာအရပ်ရပ်က UNHCR ၊ အမေရိကန်သံရုံးများနဲ့ အစိုးရမဟုတ်တဲ့လူမှုအဖွဲ့အစည်းတွေ ဖြစ်ပါတယ်။

ဒါ့အပြင် အမေရိကန်အစိုးရအသိအမှတ်ပြု သီးခြားနိုင်ငံတွေထဲက သီးခြားအဖွဲ့အစည်းတွေကတဆင့် ခိုလှုံမှုကို လျှောက်ထားနိုင်ပါတယ်။ ပိုကောင်းတာက မိမိရဲ့ သွေးသားရင်း- Anchor Relatives တစ်ယောက်ဟာ အမေရိကန်နိုင်ငံမှာ နဂိုကတည်းက ခိုလှုံသူဖြစ်ပြီးသားရှိရင် ပြန်လည်ပေါင်းစည်းရေး လဝက-USCIS စည်းမျဉ်းတွေနဲ့အညီ နောက်ကနေ လိုက်လျှောက်လို့ရပါတယ်။

အထက်ကဆိုခဲ့သလို ခိုလှုံမှုလျှောက်ထားသူ Refugee တစ်‌ယောက်ဟာ အမေရိကန်နိုင်ငံပြင်ပမှာ ရှိနေမယ်ဆိုပေမဲ့ အမေရိကန်ခိုလှုံမှုကိုင်တွယ်သည့်ပရိုဂရမ်-USRAP (United States Refugee Admissions Program) က အဲဒီလူရှိတဲ့နိုင်ငံတွေမှာ လိုက်ပါဆောင်ရွက်ပေးတဲ့ ကိစ္စတချို့ရှိနေပြန်ပါတယ်။

Refugee တစ်‌ယောက် အမေရိကားကိုဝင်ဖို့ နောက်ကြောင်းပြန် စစ်ဆေးရာမှာ မတော်တဆ ရာဇဝတ်မှု၊ ကျန်းမာရေးနဲ့ လုံခြုံရေးနောက်ခံတွေမှာ ‌မအောင်ခဲ့ရင် တစ်ခြား ခိုလှုံခွင့်ပေးမယ့် နိုင်ငံတစ်ခုခုကို ညွှန်ပေးဖို့ UNHCR ကို တောင်းဆိုနိုင်ပါတယ်။

To apply for asylum in the U.S., you must be physically present in the U.S. or be seeking entry into the U.S. at a port of entry. ဒီစာသားအရ အမေရိကန်နိုင်ငံမှာ ခိုလှုံခွင့် Asylum တောင်းခံသူဟာ အနည်းဆုံး ပြည်ဝင်အဝ (နယ်စပ်၊ ရေဆိပ်၊ လေဆိပ်) ‌တွေမှာ ရောက်နေပြီးသား ဖြစ်ရမှာပါ။

ဒါကို Asylum-Seekers လို့ ခေါ်ပါတယ်။ စာရင်းအသွင်းခံရပြီး လျှောက်ထားချက်အဖြေကို စောင့်နေသူတွေ၊ အင်တာဗျူးဖြေဖို့ စောင့်နေသူတွေကို Asylees လို့ ခေါ်ပြီး ဒီဆောင်းပါးတစ်ပုဒ်လုံးမှာ ပြောခဲ့တဲ့ အမေရိကန်ပြင်ပက ဒုက္ခသည် (စစ်ပွဲရှောင်၊ အသက်ဘေးရှောင်၊ သဘာဝဘေးအန္တရာယ်ရှောင်) တွေကိုတော့ Refugee-ဘေးကင်းလိုသူ၊ ခိုဝင်လိုသူတွေသာ ဖြစ်ကြောင်း တင်ပြလိုက်ပါတယ်။

ဒီအထိ ဖတ်လာပြီးရင်တော့ #Refugee နဲ့ #Asylum-Seekers ဘာကွာသလဲဆိုတာ ကွဲကွဲပြားပြားသိလောက်ပါပြီ။ တော်လှန်ရေးစာတွေကြားမှာ ဒီအကြောင်းတွေရေးရတာ ကျွန်တော့ဆီမှာ ရည်ရွယ်ချက် တိတိကျကျ ရှိပါတယ်။ အကြောင်းကတော့ စစ်အုပ်ချုပ်ရေးကို တော်လှန်သူတချို့ဟာ လွတ်မြောက်နယ်မြေ‌တွေကို ရောက်ရှိနေကြပြီး ဘယ်အကြောင်းအရာက ဘာဆိုတာ ရှင်းရှင်းလင်းလင်း သိရှိဖို့ လိုအပ်နေတာကြောင့် ဖြစ်ပါတယ်။

မှတ်ချက်။

အမေရိကန်
Asylees 🔄 နိင်ငံအတွင်း🔄

အမေရိကန်
Refugees ⬅️ နိုင်ငံပြင်ပ ➡️

အရေးတော်ပုံ မကြာမီ မုချ အောင်မည်။

ခင်လျက်
ကိုညီညီ (တောင်ကြီး)
05-21-2021

"ယုံကြည်စွာ ခိုလှုံရာ" အပိုင်း ၄။ (ခိုလှုံသူတစ်ယောက်၏ခံစားခွင့်) #Refugee

ဒီအပိုင်းက တော်လှန်ရေးသမားတွေအတွက် အင်မတန်အရေးကြီးပါတယ်။
Refugees should receive at least the same rights and basic help as any other foreigner who is a legal resident, including freedom of thought, of movement, and freedom from torture and degrading treatment.

"ခိုလှုံသူတစ်ယောက်သည် အခြား အမြဲတမ်းနေထိုင်ခွင့်ရထားသူ-PR များကဲ့သို့ အ‌ခြေခံအခွင့်အရေးနှင့် အကူအညီများ တန်းတူရရှိစေပြီး လွတ်လပ်စွာတွေးခေါ်ခြင်း၊ လွတ်လပ်စွာလှုပ်ရှားသွားလာခြင်း၊ ညှင်းပန်းနှိပ်စက်ခြင်းမှ ကင်းလွတ်ခြင်းနှင့် နှိမ့်ချဆက်ဆံခြင်းမှကင်းလွတ်ခြင်းများကို ရရှိခံစားစေရမည်" တိုက်ရိုက်ဘာသာပြန်လိုက်တာပါ။

ခိုလှုံသူဟု ယူဆရသူ Refugee တစ်ယောက်ဟာ အမေရိကန် လဝကမူအရ ၅ ချက် https://cutt.ly/KbLcBGb နဲ့ ကိုက်ညီရပါမယ်။

၁.. နိုင်ငံအပြင်ဘက်မှာ ရှိနေရမယ်

၂.. အမေရိကန်ပြည်ထောင်စုအတွက် လူသားချင်း စိုးရိမ်စာနာမှု သက်ရောက်ရမယ်

၃.. လူမျိုး၊ ဘာသာ၊ နိုင်ငံသား တစ်ခုခုကြောင့် (သို့) နိုင်ငံရေးအသင်းအဖွဲ့၊ လူမှုအသင်းအဖွဲ့ဝင် တစ်ခုခုကနေ အသက်ရန် ခြိမ်းခြောက်မှု ရှိနေရမယ်

၄.. တခြားနိုင်ငံမှာ ခိုလှုံခွင့်တောင်းထားသူ မဖြစ်ရဘူး

၅.. နောက်ကြောင်းစစ်ဆေးခံနိုင်ပြီး အမေရိကန်ပြည်ထောင်စုကို ဝင်ရောက်နိုင်တဲ့ အရည်အချင်း ပြည့်မှီရမယ်- ဒါတွေပါပါတယ်။

Refugee တစ်ယောက်ရဲ့ ပထမဦးဆုံး မပါမဖြစ်က USRAP ရဲ့ ထောက်ခံချက်-Referral ဖြစ်တယ်။ ဟုတ်ပြီ အမေရိကန်ရုံးဌာနက အသိအမှတ်ပြု စာရင်းပေါက်ပြီဆိုရင် ဝမ်းသာလို့ရပြီ။ ဘာဖြစ်လို့လဲဆိုတော့ ဒီအဆင့်ရောက်ဖို့ ကမ္ဘာအရပ်ရပ်က ဒုက္ခသည်စခန်းတွေမှာ ထောင်သောင်းနဲ့ချီတဲ့လူတွေ မရောက်လှမ်းနိုင်သေးတဲ့ အဖန်ဖန်အလှန်လှန် စစ်ဆေးမှုတွေကို ခက်ခက်ခဲခဲ ကျော်ဖြတ်ခဲ့ပြီးလို့ပါပဲ။

Referral ရထားပြီးတဲ့ ခိုလှုံသူကို ဖောင်ဖြည့်ဖို့နဲ့ ပြည်ပရောက် အထူးကျွမ်းကျင် အမေရိကန် လဝက ရုံးဝန်ထမ်းက အင်တာဗျူးပြီး ကိုယ်ရေးအချက်အလက်စုဆောင်းခြင်းတွေကို လုပ်ပေးခြင်းဟာ ပထမဦးဆုံးရတဲ့ အကူအညီဖြစ်ပါတယ်။ ဒီ‌အချိန်ကျမှ ခိုလှုံသူအဖြစ် လက်ခံ လက်မခံကို အဖြေထွက်မှာပါ။

Refugee တစ်ယောက်ဟာ မိန်းမ (သို့) ယောက်ျားနဲ့ ၂၁ နှစ်အောက်ကလေးတွေကို ခိုလှုံသူစာရင်းထဲ တပါတည်းထည့်သွင်းနိုင်ပြီး အင်မတန်နည်းပါးတဲ့ ကန့်သတ်ချက်ဖြစ်နိုင်ခြေတွေနဲ့ တခြားမိသားစုဝင်တွေကို အတူခေါ်သွားနိုင်ပါတယ်။ လိင်တူထိမ်းမြားခွင့်ကို ဥ‌ပေဒေနဲ့ ခွင့်ပြုထားတဲ့တိုင်းပြည်က Refugee တွေဟာလည်း ဒီခိုလှုံခွင့်ကို လျှောက်ထားနိုင်ပါတယ်။

ဒီထိမ်းမြားထားသူ Refugee ၂ ယောက်ဟာ တစ်နေရာထဲမှာ မရှိနေပေမဲ့ တရားဝင်ထိမ်းမြားမှုကို တိတိကျကျ သက်သေပြနိုင်ရင် တချိန်တည်း အမှုတွဲတင်၊ တချိန်တည်း အင်တာဗျူးထိုင်ပြီး အမေရိကားက တစ်နေရာတည်းမှာ အတူတူ အ‌ခြေချနိုင်အောင် ဆောင်ရွက်ပေးတာက စိတ်ဝင်စားဖို့ ကောင်းပါတယ်။

Refugee လျှောက်ဖို့ ဘာအခကြေးငွေမှ မကုန်ကျပါ။ လျှောက်ထားသူရဲ့ အချက်အလက်တွေကို အမေရိကန်အစိုးရက ခိုလုံသူ မူလထွက်လာခဲ့တဲ့ တိုင်းပြည်ကို ဘယ်တော့မှ အသိပေး မျှဝေသွားမှာ မဟုတ်လို့ ဆိုထားပါတယ်။ ကိုယ့်အလှည့်ရောက်ပြီဆိုရင်တော့ ဘာနောက်ကြောင်းမှ ပြန်မကြည့်ဘဲ စိတ်ချလက်ချ လျှောက်ကြပါ။

ခင်လျက်
ကိုညီညီ (တောင်ကြီး)
05-22-2021

"ယုံကြည်စွာ ခိုလှုံရာ" အပိုင်း ၅။ (Refugee တစ်ယောက်၏ပထမဦးဆုံးနေ့များ) #Refugee

ခိုလှုံသူ Refugee တစ်ယောက်အနေနဲ့ အမေရိကန်အစိုးရက အသိအမှတ်ပြုပြီဆိုရင် ကျန်းမာရေးစစ်ပေးပါမယ်၊ မတူညီတဲ့ယဉ်ကျေးမှုကို မိတ်‌ဆက်ပေး၊ သင်တန်းပေးပါမယ်၊ ခရီးသွားဖို့ ခရီးစဉ်ဆွဲပေးပါမယ်၊ အမေရိကားကိုသွားဖို့ ခရီးစားရိတ်ကို ငွေချေးပေးပါမယ်၊ ဒီဘက်မြေကို ခြေချတဲ့အခါ ကျန်းမာရေးစောင့်ရှောက်ခွင့်နဲ့ ငွေအထောက်အပံ့ကို ပေးပါလိမ့်မယ်။

Security အဆင့်
______________ ဒီအဆင့်မှာ ခိုလှုံရေးစခန်းမှာရှိတဲ့ လူပုဂ္ဂိုလ်ကို ကနဦးစစ်ဆေးခြင်း-Pre-Screening လုပ်ပါမယ်။ ပြီးရင် အဲဒီလူရှိတဲ့ အမေရိကန်ပြင်ပနေရာမှာပဲ အမေရိကန် လဝက ဝန်ထမ်းက လူတွေ့စစ်ဆေးပါမယ်။ နောက်ဆုံးမှာတော့ လုံခြုံရေးနဲ့ စာရိတ္တနောက်ကြောင်း ရှင်းမရှင်း စစ်ဆေးပြီး လက်ဗွေနှိပ်တာပြီးရင် အမေရိကားကို ခရီးစထွက်နိုင်ပါပြီ။


Placement အဆင့်
_________________ ဒီအဆင့်ကို ကိုင်တာကျတော့ အမေရိကန်နိုင်ငံရဲ့ ဝန်ကြီးဌာန‌ဖြစ်တဲ့ လူဦးရေ၊ ခိုလှုံသူနဲ့ ပြည်ဝင်ပြောင်း‌ရွှေ့ခွင့်တွေကိုကိုင်တဲ့ Bureau of Population, Refugees, and Migration နဲ့ တိုက်ရိုက်ပတ်သက်လာပါပြီ။ လေဆိပ်တွေကနေ ကြိုပေးပြီး သူတို့ဟာ ခိုလှုံသူတွေကို ကြားက ဝန်ဆောင်မှုပေးတဲ့ အေဂျင်စီ ၉ ခုထဲက တစ်ခုခုနဲ့ ချိတ်ဆက်ပေးတယ်။ သူတို့ဟာ ပြည်နယ် ၅ဝ အတွင်းမှာ နားခိုရာဌာနေ ၂၅ဝ ‌‌ကျော်ကို စီမံခန့်ခွဲလေ့ကျင့်ပေးနေတာ ဖြစ်ပါတယ်။

အဲဒီနေရာတွေမှာ ၁-၃ လ လောက်နေရတတ်ပြီး ယဉ်ကျေးမှုဖလှယ်ရေးနဲ့ ခိုလှုံသူနောက်ဆုံးသွားချင်တဲ့ ပြည်နယ်နဲ့မြို့တွေကို ထွက်ခွာခရီးနှင်ဖို့ လမ်းကြောင်းတွေကို သင်ပေးပါတယ်။ ဒါကတော့ ပြည်တွင်းကို ရောက်လာမယ့် ခိုလှုံသူ၊ ခိုလှုံသူမိသားစုရဲ့ အမေရိကားရဲ့ နွေးထွေးစွာ ဆက်ဆံခံရခြင်း တစိတ်တဒေသ ဖြစ်ပါတယ်။


Transition အဆင့်
________________ လူ့ဘဝထဲကို အ‌ခြေချရင် ကျန်းမာရေးကောင်းဖို့လိုသလို အမေရိကားကို အ‌ခြေချရင် ငွေလိုပါတယ်။ ဒီ ၂ မျိုးလုံးကို အမေရိကန်ကျန်းမာရေးဌာနရဲ့ ဒုက္ခသည်နေရာချ‌ထားရေးဌာနက ထောက်ပံ့ပေးပါတယ်။

ကျန်းမာရေးစစ်တာကစလို့ အလုပ်ခွင်ဝင်ပုံဝင်နည်းတွေကို သင်ပေးတယ်။ အင်္ဂလိပ်စာမတတ်သူတွေကို အင်္ဂလိပ်စာကို ဒုတိယဘာသာစကားအနေနဲ့ သင်ပေးတဲ့ ESL သင်တန်းတွေမှာ တက်စေတယ်။ အရင်တတ်လာသူတွေကိုလည်း ပိုမိုခိုင်မာအောင် ဘာသာစကားပေါင်းကူးစံနစ်နဲ့ စစ်ဆေးပေးတယ်။

မိုက်ခရိုစီးပွားရေး (အိမ်တွင်းမှု) လုပ်တတ်အောင် နည်းလမ်းပေးတယ်။ ပြန်လည်ထူထောင်ရေးကို သင်ကြားပေးတယ်။ ငွေရေးကြေးရေး စီမံခန့်ခွဲမှုသင်တန်းပေးတယ်။ တိုင်းရင်းသားအချင်းချင်း ဘယ်လို ပေါင်းစည်းနေထိုင်ရမယ်ဆိုတာ သင်ပေးတယ်။ စိုက်ပျိုးမွေးမြူရေးလုပ်ငန်းနဲ့ အခြေခံကျကျ ဘယ်လိုရပ်တည်ရမလဲဆိုတာ သင်ပြပေးတယ်။

IDA-Individual Development Accounts လို့ခေါ်တဲ့ ဘဏ်စာရင်းဖွင့်နည်း၊ ရင်းနှီးမြှုပ်နှံမှုလုပ်နည်းနဲ့ မိမိရဲ့ကိုယ်ပိုင်‌ငွေကို ဘယ်လိုကိုင်တွယ်ထိန်းသိမ်းရမယ်ဆိုတာတို့ကိုပါ တပါတည်း သင်ပေးလိုက်ပါတယ်။

ဒီ‌အဆင့်မှာ နောက်ထပ်အရေးကြီးတာတစ်ခုကို သင်ပေးလိုက်တာက ညှဉ်းပန်းနှိပ်စက်မှုမှ လွတ်မြောက်နည်းနဲ့ဆိုင်တဲ့ အသိတရားကို ဘယ်လိုမွေးထားရမယ်ဆိုတာက သိပ်ကောင်းတယ်။

ဒုက္ခသည်တစ်ယောက်ရဲ့ သူ့နိုင်ငံက မထွက်ပြေးခင် ခံစားခဲ့ရသမျှ အမေရိကန်အိပ်မက်မှာ အရိပ်မည်းကြီး နောက်ကလိုက်မနေအောင် စိတ်ပိုင်းဆိုင်ရာကို ပြုပြင်ပေးလိုက်တာကြောင့် သိပ်လိုက်ဖက်တဲ့ လူသားဆန်မှုလို့ မြင်မိပါတယ်။

လူကို လူလို ဆက်ဆံတဲ့ အမေရိကားဟာ ဘေးပေါင်းစုံ၊ ဒုက္ခပေါင်းစုံ၊ အန္တရာယ်ပေါင်းစုံကရှောင်လာတဲ့ ခိုလှုံသူတွေရဲ့ ယုံကြည်ရတဲ့ နားခိုရာ တစ်ခုပါ။ ဒါကြောင့်လည်း UNHCR ရဲ့ တတိယနိုင်ငံကို ခိုလှုံခွင့်ပေးထားတဲ့စာရင်းမှာ အမေရိကားကိုသွားရောက် အခြေချနိုင်ရေးဟာ လူတော်တော်များများရဲ့ နားကျည်းမှုတွေကနေ ပေါက်ဖွားလာတဲ့ လွတ်မြောက်နယ်မြေ ဖြစ်ပါတယ်။

ခင်လျက်
ကိုညီညီ (တောင်ကြီး)
05-23-2021

"ယုံကြည်စွာ ခိုလှုံရာ" အပိုင်း ၆။ (Refugee တစ်ယောက်၏အတွင်းပိုင်းနေ့များ) #Refugee

ခိုလှုံသူ Refugee တွေဟာ လူတစ်ဦးတစ်ယောက်တည်း ထွက်ပြေးရတာမျိုး၊ စစ်ရှောင်ရတာမျိုး မဟုတ်ပါ။ ဇနီးနဲ့ သမီးသားနဲ့ ကလေး‌ငယ်တွေပါတဲ့အခါ အမေရိကန်ဒုက္ခသည်ကယ်ဆယ်ရေးအလုပ်မှာ ORR-Office of Refugee Resettlement ဌာနကို လူကြီးမပါလာတဲ့ ကလေးအရွယ်ခိုလှုံသူတွေကို သီးသန့် ကိုင်တွယ်စေပါတယ်။

ORR ရဲ့ စာရင်းအရ ၂ဝဝ၃ ခုနှစ်ကနေ စကယ်တင်လိုက်တဲ့ အရွယ်မရောက်သေးတဲ့ ကလေးသီးသန့် ၄ဝ၉၅၅ဝ ဦး ရှိလာတယ်။ ORR ဟာ ကလေးတွေကို ကိုယ်တိုင်ဒဏ်ရာရအောင်လုပ်ခြင်းမှ၄င်း၊ တပါးသူက ဒဏ်ရာရအောင်လုပ်ခြင်းမှ၄င်း၊ လူမှုအသိုင်းအဝိုင်းကို ဒဏ်ရာရအောင်လုပ်ခြင်းမှ၄င်း၊ အချင်းချင်းခိုက်ရန်ဖြစ်ပွားခြင်းမှ၄င်း ကင်း‌ဝေးအောင် ထိန်းသိမ်းပျိုးထောင်တယ်လို့ ‌ဆိုပါတယ်။

ဒီလို အစီအစဉ်တွေရှိနေလို့ သမ္မတဒေါ်နယ်ထရမ့် လက်ထက်မှာ ကလေးတွေကိုသာခေါ်ထားပြီး မိဘတွေ၊ အုပ်ထိန်းသူတွေကို ပြန်ပို့ရုံမက နယ်စပ်ကခြံကွက်‌တွေထဲမှာ အပူထုတ်လွှတ်ပေးတဲ့ သတ္တုစောင်လေးတွေခြုံထားတဲ့ ကလေးတွေအများကြီးစုနေတဲ့သတင်းကို တီဗီမှာ တွေ့ဖူးကြမှာပေါ့။

ဒါကို ထရမ့်က မောင်းထုတ်ဖို့ လုပ်တာလေ။ မမောင်းထုတ်နိုင်ရင်တောင် နောက်ထပ်မလာဖို့ ‌‌‌ခြိမ်းခြောက်ထားလိုက်တော့ သိန်းနဲ့ချီတဲ့ လူအုပ်ကြီးကို တားလိုက်နိုင်တယ်။ အခု ဂျိုးဘိုင်ဒင်-ဟဲရစ် အစိုးရမှာလည်း ဒီကလေးအုပ်ကြီးကို ရွေးကောက်ပွဲ မဲဆွယ်တုန်းက ပေးခဲ့တဲ့ ကတိအတိုင်း အကုန်ပေးဝင် မပေးဝင်ဆိုတဲ့ အဝေဖန်ကို အကြီးအကျယ်ခံနေလေတယ်။

အမေရိကားမှာ ၁၉၈ဝ က ပြဌာန်းခဲ့တဲ့ Refugee Act က ပေးဖြတ်သန်းသမျှ ခိုလှုံသူဦးရေဟာ ၃၁ သိန်း ရှိပြီးနေပါပြီ။ ပြည်ဝင်ခွင့်ဥ‌ပဒေ- INA-Immigration and Nationality Act မှာကျတော့ အပိုဒ်ခွဲ ၂ဝ၇-under Section 207 of the INA နဲ့ အပိုဒ်ခွဲ ၂ဝ၈-under Section 208 of the INA တို့ ရှိပြန်ပါတယ်။

ဒီဆောင်းပါးအတွဲရဲ့ ထိပ်ပိုင်းမှာ ကနဦးပြောခဲ့သလို အမေရိကန်နိုင်ငံပြင်ပက ခိုလှုံခွင့်တောင်းခံသူဟာ Refugee (207) ဖြစ်ပြီး အကြောင်းရင်းတစ်ခုရှာပြီး အမေရိကန်မြေပေါ်ကိုရောက်မှ ခိုလှုံခွင့်လျှောက်သူဟာ Asylum (208) ဖြစ်တာကို မှတ်မိကြအုံးမှာပေါ့။

သို့သော်လည်း အမေရိကန်နိုင်ငံက စစ်ရေးအရ ထဲထဲဝင်ဝင်ပါဝင်ပတ်သက်နေတဲ့ အီရတ်နဲ့ ဆီးရီးယားတို့က ခိုလှုံသူတွေဟာ ဒုက္ခသည်စာရင်း မဝင်ပါဘူး။ သူတို့ဟာ အထူးပြောင်းရွှေ့ပြည်ဝင်ခွင့်- SIV-Special Immigrant Visa ကိုင်ဆောင်ခွင့် ရှိထားပါတယ်။

ဘယ်နည်းနဲ့လာလာ ခိုလှုံသူဆိုရင်တော့ USRAP ရဲ့ အောက်က ကြိုဆိုလက်ခံရေးနှင့် ပြည်လည်နေရာချထားရေးဌာန- Reception and Placement ရဲ့ ကြီးကြပ်မှုအောက်ကို မဖြစ်မနေ ဖြတ်သန်းရပါတယ်။

ခင်လျက်
ကိုညီညီ (တောင်ကြီး)
05-25-2021

"ယုံကြည်စွာ ခိုလှုံရာ" အပိုင်း ၇။ (Refugee နေရာချထားရေးအဆင့်များ) #Refugee

အမေရိကန်အစိုးရ စာမျက်နှာရဲ့ ဖော်ပြချက်အရ ခိုလှုံသူ Refugee အများစုဟာ သူတို့ရဲ့ဆွေတွေ မျိုးတွေက အမေရိကားမှာ ရှိကြတယ်ဆိုတာ သိရတယ်။ ဒီလိုလူအုပ်ကြီးကိုကျတော့ ပြန်လည်နေရာချထားရေး-R&P-Reception and Placement ဌာနက သူတို့အမျိုးရှိတဲ့နေရာတွေနဲ့ ချိတ်ဆက်ပေးလိုက်ရတော့ သက်သာတယ် ပြောရမယ်။

ကျန်တဲ့လူတွေကိုကျတော့ သူတို့တတ်မြောက်ထားတဲ့ အတတ်ပညာနဲ့ ပညာရေးစွမ်းအားတွေအပေါ်မူတည်ပြီး ကြီးမားအောင်မြင်နိုင်ခြေရှိတဲ့ နေရာဒေသတွေကို ပို့ပေးတယ်လို့ ရေးထားပါတယ်။

R&P က Refugee တစ်ယောက်ကို အမေရိကန်‌မြေပေါ်နင်းပြီး ၃ လအတွင်း ပြန်ပေးစရာမလိုတဲ့ ငွေသားအထောက်အကူ ၁ ကြိမ် ပေးပါတယ်။ တချို့စင်တာတွေမှာ အစိုးရအထောက်အပံ့ပေါ်မူတည်ပြီး အသုံးအဆောင်နဲ့ ငွေသားပေးတယ်လို့ သိရတယ်။ ဒီနေရာမှာ ထပ်ခါ ထပ်ခါ ရှင်းအောင် ပြောချင်တာက Asylum သမား Asylees တွေဟာ ဒီမြေကိုရောက်ပြီးသားဖြစ်လို့ ဒီအဆင့်တွေမှာ အကျုံးမဝင်ပါဘူး။ ဒါဟာ Refugee အတွက် ဖြစ်ပါတယ်။ မရှုတ်စေချင်ပါဘူး။

Refugee တစ်ယောက် အမေရိကားရောက်ပြီဆိုရင် R&P က အရာရှိနဲ့ စတွေ့ရမှာပါ။ မိသားစု၊ သူငယ်ချင်းနဲ့တွေ့ဖို့ အခွင့်အရေးလည်း ရှိပါတယ်။ ဒီ့နောက်မှာ သူတို့နေရမယ့် နေရာမှာ အစားအသောက်၊ အဝတ်အထည်နဲ့ အခြေခံလူသုံးကုန်တွေကို ဖြည့်ဆည်းပေးပါတယ်။ ကလေးသူငယ်နဲ့ လူငယ်ဆိုရင် ကျောင်းအပ်ပေးတယ်။ အလုပ်လုပ်နိုင်သူဆိုရင် အလုပ်ဆင်းဖို့ သင်တန်းပေးတယ်။ SSN ကတ် လျှောက်ပေးတယ်။

အင်္ဂလိပ်စကားမရသူဆိုရင် ဘာသာပြန်အဖွဲ့၊ လူမှုအသင်းအဖွဲ့တွေနဲ့ ချိတ်ဆက်ပေးတယ်။ လိုရင်းကတော့ အမေရိကန်မြေပေါ် ရောက်ပြီးတာနဲ့ ကိုယ့်ခြေထောက်ပေါ်ကိုယ် မားမားမတ်မတ်ရပ်တည်နိုင်ဖို့ လုပ်ဆောင်ပေးကြပါတယ်။

ဒါကြောင့် အလုပ်လုပ်ပိုင်ခွင့်ကတ်ပြား- ဝေါ့ပါမစ်-Employment Authorization Document ကို ရောက်ရောက်ချင်းထုတ်ပေးပြီး အမေရိကန် ကုမ္ပဏီယန္တရားရဲ့ ခွေးသွားစိတ်ကလေးတွေဖြစ်အောင် အမြန်ဆုံး အလုပ်ဝင်နိုင်ရေး ဆောင်ရွက်ပေးကြပါတယ်။

R&P ဟာ လုပ်ပိုင်ခွင့်က ၃ လ အကန့်အသတ်ရှိတာကြောင့် ဒီ့ထက်ပိုနေရတဲ့ ခိုလှုံသူတွေဟာ နောက်ပိုင်းမှာ ကျန်းမာရေးစောင့်ရှောက်မှု၊ ဘာသာစကားအခက်အခဲဖြေရှင်းရေး၊ အလုပ်ရရေးနဲ့ လူမှုအသိုင်းအဝိုင်းနဲ့ ရုံးကိစ္စတွေမှာ လုပ်ဆောင်တတ်ရေးတို့ကို အစိုးရဌာနကြီးတွေဆီကို တာဝန်လွှဲပြောင်းပေးလိုက်ပါတယ်။ ဒီကနေ အောင်နိုင်သွားသူတွေကတော့ မိမိအမျိုးတွေ ရှိရာကို ပြောင်းနေနေ၊ သူငယ်ချင်းတွေ ရှိရာဒေသကို အခြေချချ၊ ဒေါင်ကျ ပြားကျ လှပမယ့်ဘဝကို ပုံဖော်ခွင့်ရကြပြီပေါ့ဗျာ။

တကယ်ပြန်စဉ်းစားကြည့်ရင် အမေရိကားဟာ သူ့အကျိုးသူပဲကြည့်ရင် ဘယ်ဒုက္ခသည်၊ ဘယ်ခိုလှုံသူ‌ကိုမှ "ကယ်တင်စရာမလိုဘူး" လို့ တွေးလို့ရသလို "ကယ်တင်ရမှာပေါ့" လို့ ပြောသူတွေကလည်း ရှိနေပါတယ်။ သူတို့ဟာ ငါတို့နိုင်ငံထဲကို ဘာပညာမှမတတ်၊ ဘာဓနဥစ္စာမှ မယူလာ၊ ဘယ်လိုကောင်းတဲ့ အနာဂတ်ကိုမှ မျှော်လင့်လို့မရ၊ ငါတို့ရဲ့ လုပ်အားနဲ့ရင်းပြီး ဆောင်ထားတဲ့ အခွန်တွေကို လာသဲ့ယူဖို့ ကြိုးစားနေသူတွေ၊ သူတို့ကြီးလာရင်လည်း ပင်စင်တွေ ထိုင်စားတဲ့အထိ အစိုးရက ထောက်ပံ့ရအုံးမှာလို့ တွေးသူတွေရှိကြတယ်။

ဒီလူတွေဟာ ကယ်တင်စရာ မလိုဘူးလို့ ခံယူချက်ရှိသူတွေပေါ့။

နယ်စပ်ကလူ‌တွေက သူတို့ဘဝ တိုးတက်ဖောက်ထွက်ဖို့ အမေရိကားမှာ အလုပ်လုပ်ချင်ကြတယ်။ ဒီလူတွေထက်စာရင် တကယ့်စစ်မျက်နှာပြင်တွေက ကလေးသူငယ်၊ အမျိုးသမီးမိခင်တွေနဲ့ လူငယ် လူရွယ်တွေရဲ့ဘဝဟာ အဆပေါင်းများစွာ ဆိုးရွားကြမ်းတမ်းကြတယ်။ ဒီလူတွေဟာ အမေရိကားရောက်လာရင် ဘာအလုပ်မှ မရွေးကြဘူး။ တူပေ ဒဏ်ပေခံလို့ အခြေခံအလုပ်ကြမ်းက လုပ်သားလိုအပ်ချက်ကို ဖြည့်စွမ်းပြီးသား ဖြစ်သွားတယ်။

ဒါက ကယ်တင်ဖို့လိုတယ်လို့ တွေးသူတွေရဲ့ စဉ်းစားပုံ စဉ်းစားနည်း။

တနည်းအားဖြင့် နိုင်ငံရေးအရ လိုအပ်ချက်ကြောင့် ဒီဒုက္ခသည်ကယ်ဆယ်ရေးစင်တာတွေဖွင့်တာကို နားလည်စေချင်တယ်။ တကယ် အခက်အခဲဖြစ်သူတွေအတွက် အမေရိကားဟာ ယုံကြည်စရာ နားခိုရာဖြစ်တယ်။ လက်နက်ရောင်းချင်လို့ စစ်ရေးမှာ ဝင်စွက်။ နောက်ဆုံးမှာ ဒုက္ခသည်တွေကို ပြည်တွင်းမှာ လက်ခံ။ ဒါက အမ်ကယ်ဆမ်။ UNHCR က လက်ခံ လက်မခံက ပြောင်းရွှေ့ပြီး ဘဝဆက်ဖို့ကြိုးစားနေတဲ့ မိတ်ဆွေရဲ့ "ကံ" ။

ခင်လျက်
ကိုညီညီ (တောင်ကြီး)

05-27-2021

"ယုံကြည်စွာ ခိုလှုံရာ" အပိုင်း ၈။ (Asylee ဖြစ်ဖို့ အဆင်သင့်ဖြစ်ပြီလား) #Asylum

Asylum-Seekers တွေဟာ နိုင်ငံတစ်နိုင်ငံက ဒုက္ခသည်လျှောက်ပြီးလာသူ Refugee တွေနဲ့ လာပုံလာနည်းချင်း မတူပါဘူး။ Refugee က လျှောက်ပြီးမှ လာရတယ်။ Asylum က လာပြီးမှ လျှောက်ရတယ်။ ရှုတ်သွားပါသလား။ အပေါ်မှာလည်း အကြိမ်ကြိမ်အခါခါ ရှင်းပြခဲ့ပါတယ်။

ခိုလှုံခွင့်တောင်းခံသူကို Asylum-Seekers လို့ ‌ခေါ်ပါတယ်။ ခိုလှုံခွင့်လျှောက်ထားသူ၊ ခိုလှုံခွင့်ကျဖို့ စောင့်ဆိုင်းနေသူကို ခေါ်တော့ Asylees ပါ။ ဒုက္ခသည်ကိုတော့ Refugees လို့ ခေါ်ပြန်ရော။ တစ်ခုကွာတာက "အမေရိကန်ပြည်ထောင်စုထဲရောက်နေသူက" လျှောက်ထားနိုင်တာက Asylum ပါ။ "အမေရိကန်နိုင်ငံပြင်ပက" ခိုလှုံခွင့်တောင်းခံသူဆိုရင် ဒါ Refugees ဖြစ်သွားပါပြီ။

A Grant of Asylum ကို ဘောင်ဝင်ဖို့ လူပုဂ္ဂိုလ်တစ်ဦး၊ မိသားစုတစ်စုဟာ အမေရိကန်‌‌မြေပေါ်မှာ ခိုကပ်နေဖို့ လိုပါတယ်။ အကြောင်းတစ်ခုနဲ့ ပြန်ထွက်သွားမိရင် ပြန်ဝင်လာလို့ မရတော့ပါဘူး။

Asylum-Seekers တွေဟာ နိုင်ငံထဲကို ကြိုရောက်နေသူတွေ ဖြစ်တာကြောင့် State Department ရဲ့ တရားဝင်ဖော်ပြမှုထဲမှာ ကျောင်းသားဗီဆာနဲ့ ဝင်လာသူ၊ နယ်လှည့်ခရီးသွားဗီဆာနဲ့ ဝင်လာသူ၊ စီးပွားရေး အကြောင်းပြချက်နဲ့ ဝင်လာသူအပြင် ဘာစာရွက်စာတမ်းမှမရှိဘဲ ဝင်လာသူ၊ နယ်စပ်အပေါက်ဝ (လေ‌ဆိပ်/ရေဆိပ်/နယ်စပ်ခိုးဝင်) ကနေ ဝင်လာသူတွေကို ခေါ်ဆိုတဲ့အကြောင်း "Asylees do not enter the United States as refugees. They may enter as students, tourists, businessmen, or even in undocumented status" ဒီလို ရေးထားပါတယ်။

အဆိုပါနေရာတွေရောက်မှ "ငါ Asylum တင်ချင်တယ်" ဆိုတဲ့ ဇာတ်လမ်းကို အမိမြေလုံခြုံရေးဝန်ကြီးဌာနအောက်က စကြရတာပါ။ ဒါကြောင့် Asylum တင်တာ တရားမဝင်ဘူး၊ အလည်နဲ့လာတာဟာ အိုဗာစတေးနေဖို့ လမ်းကြောင်းရှာတာလို့ ဘယ်သူတွေ ဘာပြောပြော အမေရိကန်အစိုးရကိုယ်တိုင်က "ဒီလိုလုပ်ပါလို့ မပြောရုံကလွဲပြီး" ၊ "ဒီလိုလူတွေက Asylum လျှောက်ကြတယ်" လို့ တရားဝင်လက်ခံထားတာကို မြင်အောင်ကြည့်ကြပါ။ ဥပဒေက တရားဝင်ခိုလှုံခွင့်ပေးထားတာကို ဘယ်သူက တရားမဝင်ဘူးလို့ နှိမ်ချင်နေကြတာလဲ။

ဒီ Asylum တင်ဖို့ အမေရိကန်ပြည်ထောင်စုကို ဝင်ရောက်လာတဲ့အချိန်ရဲ့သက်သေ U.S Custom and Border Protection ဌာနက ထုတ်ပေးတဲ့ကတ်ပြား ဖြစ်တဲ့ Arrival/Departure Record- I-94 လက်မှတ်ကို သိမ်းထားပါ။ တရားဝင် မဖြစ်မချင်း ဒီစာရွက်လေးတစ်ရွက်က ပြည်ဝင်ခွင့်သမိုင်း အချက်အလက်များစွာကို သက်သေခံပါတယ်။

အမှန်ကတော့ အလည်ဗီဆာနဲ့ ဝင်ခဲ့လို့ လူတိုင်းက ခိုလှုံခွင့်လျှောက်ကြမှာမှ မဟုတ်ကြတာ။ တချို့မှာ ဒီ I-94 စာရွက် ဘယ်ရှိပါ့မလဲ။ မပူပါနဲ့။ အမေရိကားရောက်လို့ လည်ချင်ရာလည်ပြီး မပြန်တော့ဘူးဆိုရင် I-94 ကို https://cutt.ly/bb7gmfx ဒီမှာ ပြန်လျှောက်လို့ရပါတယ်။

I-94 ထဲမှာ
___ ဂဏန်း ၁၁ လုံးပါတဲ့ Admission Record Number

___ ဝင်လာတဲ့ရက်စွဲ-Most Recent Date of Entry

___ ဝင်လာတဲ့ဗီဆာအမျိုးအစား-Class of Admission

___ ဗီဆာသက်တမ်း-Admit Until Date

___ နာမည်

___ မွေးနေ့သက္ကရာဇ်

___ ပါ့စပို့နံပါတ်

___ ပါ့စပို့ထုတ်ပေးတဲ့နိုင်ငံ

ဒီအချက်အလက်တွေဟာ အားလုံး စာရွက်တစ်ရွက်ထဲမှာ အကုန်ပါနေတာပါ။ ဒီစာရွက်ကပဲ မိတ်ဆွေ Asylee တစ်ယောက်ရဲ့ အနာဂတ်ကို ပြည်ဝင်ခဲ့တဲ့အထောက်အထားတွေကနေ ကောင်းမွန်တဲ့ တရားဝင် အနာဂတ်ကို ချောချောမွေ့မွေ့ ခေါ်ဆောင်သွားမယ်လို့ ယုံကြည်မိပါတယ်။

ခင်လျက်
ကိုညီညီ (တောင်ကြီး)
05-28-2021

"ယုံကြည်စွာ ခိုလှုံရာ" အပိုင်း ၉။ (Asylee တစ်ယောက်ရဲ့လုပ်ငန်းစဉ်) #Asylum

Asylum Process မှာ ထိပ်ဆုံးဖောင်တင်ပြီးရင် အလုပ်လုပ်ခွင့် EAD ကတ် ရပါမယ်။ အများအားဖြင့် Asylum တင်ပြီး ၃ လအတွင်း A နံပါတ် ရနိုင်ပါတယ်။ နောက် ၁ လ မှာ လက်ဗွေနှိပ်နိုင်ပါတယ်။ နောက်များမကြာခင် အင်တာဗျူးဒိတ် ရနိုင်ပါတယ်။ ‌နောက်ဆက်တွဲ လုပ်ဆောင်ရန်တွေကြားမှာ ဒုတိယအင်တာဗျူးပြီးလို့ Asylum အောင်မြင်သွားရင် ၁ နှစ်အတွင်း Green Card လျှောက်ခွင့်ရှိပါတယ်။ ဒါက ၁ နှစ်ကနေ ၃ နှစ်အထိကြာတတ်တဲ့ ကိစ္စကို အားလုံးအဆင်ချောသယောင်ယောင် စာတစ်ကြောင်းထဲနဲ့ အပြီးရေးထားတာ။

အဲဒီ Green Card ဟာ ယာယီကတ်မဟုတ်ပါ။ သက်တမ်း ၁ဝ နှစ်ရှိပြီး ဆက်တိုက်နေထိုင်မှု-Residency ၅ နှစ်ဆက်တိုက်ရှိရင် အမေရိကန်နိုင်ငံသားဖြစ်ဖို့ Neutralization Test ဖြေပြီး ကျမ်းကျိမ်လိုက်တာနဲ့ အများနည်းတူ မဲပေးခွင့်ရတဲ့ နိုင်ငံသားအဆင့်ကို တက်လှမ်းနိုင်မှာ ဖြစ်ပါတယ်။

အမေရိကားရောက်ပြီး ၁ နှစ်အတွင်း Asylum တင်ရင် မိမိကသာ ရုံးကိစ္စအကုန်လုပ်တတ်ရင်၊ ပြည့်စုံအောင် လုပ်နိုင်ရင် ရှေ့နေမပါဘဲ တင်သူတွေ ရှိပါတယ်။ အမှားအယွင်းရှိရင်လည်း ရုံးက လိုအပ်ချက်ကိုပြင်ဖို့ စာပို့တာကြောင့် စာသွား စာလာတွေကို ဂရုစိုက်ရပါမယ်။ ဒီအမေရိကန်မြေပေါ်ရောက်တဲ့ရက်ကစ ၁ နှစ်ကျော်သွားသူမှာ Asylum လျှောက်လို့ မရတော့ပါဘူး။

ဒီအောက်မှာတော့ လျှောက်ရမယ့်ဖောင်နံပါတ်တွေကို သတ်သတ်စီဖွင့်ဖတ်နိုင်ပါတယ်။

Asylum လျှောက်ဖို့ဖောင်- I-589, Application for Asylum and for Withholding of Removal $50 - https://cutt.ly/Lnimjzl

လက်ဗွေနှိပ်ဖို့ကတ်ပြား- FD-258 Fingerprint Card- https://cutt.ly/SnimbkV

အလုပ်လုပ်ခွင့်ဖောင်- I-765, Application for Employment Authorization $410- https://cutt.ly/9nimITP

Social Security Card လျှောက်ဖို့ဖောင်- https://www.ssa.gov/forms/ss-5.pdf

Green Card လျှောက်ဖို့ဖောင်- I-485, Application to Register Permanent Residence or Adjust Status $1130- https://cutt.ly/9nimJnA

ရောက်ရှိ/ထွက်ခွာ I-94 ကတ်ပြားဖြည့်ဖို့နေရာ- https://cutt.ly/inimXPb

Over Stay အတွက် တင်ရန် ဖောင်- I-601 $1010/$960- https://cutt.ly/Fnim6kH

Refugee Travel Document ခရီးသွားခွင့်ဖောင်- I-131 $590- https://cutt.ly/DniQyEy

အိမ်လိပ်စာပြောင်းတဲ့ဖောင်- AR-11-- https://cutt.ly/SniQoRk


အားနည်းချက် အားသာချက်
________________________ Asylum-Seeker တစ်ယောက်ရဲ့ဘဝဟာ Refugee လောက် မငြိမ့်ပါဘူး။ Refugee က ရေမီးအစုံ၊ အခြေချစရာ၊ အစိုးရအထောက်အပံ့နဲ့ သင်တန်းနဲ့ Status အပါ လာရတာ ဖြစ်ပြီး Asylum-Seeker တစ်ယောက်က ဒီမြေပေါ်ရောက်မှ Status ရဖို့ အစကနေ ပြန်ကြိုးစားရတာ ဖြစ်ပါတယ်။


အားသာချက် အားနည်းချက်
________________________ Asylum-Seeker က ဒီမြေကို အရင်ရောက်ပြီးမှ တရားဝင်မှုကို နောက်မှ ရှာရတာဖြစ်ပြီး Refugee က ပြည်ပမှာကတည်းက တရားဝင်ဖြစ်ခဲ့ပေမဲ့ မိမိအလှည့်ကျဖို့ ကာလ‌ရှည်ကြာ စောင့်ဆိုင်းရလေ့ ရှိပါတယ်။


ဒါပေမဲ့ ဒီ ၂ မျိုးလုံးဟာ ခိုလှုံသူတွေသာဖြစ်ပြီး အစိုးရစာမျက်နှာမှာ "You must meet the definition of a refugee in order to be eligible for asylum" လို့ အဓိပ္ပာယ်ဖွင့်ဆိုထားတာကို အရှိအတိုင်း တင်ပြလိုက်ပါတယ်။

အောင်‌မြေနင်း၍ အောင်ပန်းကိုဆင် စစ်အုပ်စုကို အမြစ်က ဖြတ်ချနိုင်ပါစေ။

ခင်လျက်
ကိုညီညီ (တောင်ကြီး)
05-29-2021